شىبىن. (اڭگىمە) - بەيبىت سارىباي
تۇسكە دەيىن تەرەزەنىڭ اينەگىنە تاقالىپ الىپ ىزىلداۋمەن بولدى. ءارىقاراتاي ءوتىپ كەتپەك بولىپ اۋرەگە ءتۇستى.
بۇنىڭ ىزىڭىنان ويانىپ كەتكەن پەرنەش دەگەن ايەل قولىنا ىلىككەن ورامالدى الا سالىپ ارى- بەرى بۇلعاپ بۇنى قۋالادى دەيسىڭ. ايتەۋىر سونىڭ ايداۋىمەن باعانادان بەرى تاپپاي اۋرەگە تۇسكەن اشىق ەسىكتى كوزى شالىپ، سىرتقا قاراي بەت الدى.
قارىن توق، قايعى جوق. ۇشىپ شىققان كۇيى سيىردىڭ جاڭا تۇسكەن جاپاسىنا قوندى. ارتقى ءتورت اياعىمەن تۇرا قالىپ، الدىڭعى ەكى قولىن ىسقىلاپ- ىسقىلاپ الدى دا، ءدامىن تاتىپ كورىپ ەدى، ونشا ۇنامادى. سوسىن ماماعاشتا بايلاۋلى تۇرعان ءابۋدىڭ كوك بەستىسىنىڭ ۇستىنە قوندى.
كۇنى بويى اربا سۇيرەپ ابدەن تيتىقتاعان بايعۇس ەندى عانا كۇننىڭ توگىلە تۇسكەن ساۋلەسىنىڭ ءداپ استىنا جانتايا قالىپ كوزىن جۇمعانى سول ەدى و بايعۇستىڭ دا. شىبىن قونعان تۇستى دالدەپ تۇرىپ قۇيرىق جالىمەن سالىپ قالدى. انا پالە ۇشىپ ۇلگەردى. بىرەر جەردى اينالىپ بارىپ، قايتا قوندى. اناۋ تاعى سالىپ قالدى.
بۇل تاعى ۇشىپ ۇلگەردى. نە كەرەك وسى كورىنىس بىرنەشە مارتە قايتالانىپ، ونسىزدا شارشاۋ تۇرعان بەستى ات ونان ارى قاجىپ كەتتى. جىلقى مالىنىڭ جۇيكەسى ابدەن جۇقاردى- اۋ دەگەندە اجەتحانادان ءبىراق شىقتى. ودان شىققاننان كەيىن لاپاستىڭ ۇستىنە ءاجىحان اپانىڭ جايىپ قويعان، ءالى كەۋىپ ۇلگەرمەگەن قۇرتىنا قوندى.
بەتىنە جاۋىپ قويعان داكەنىڭ ءوزى سياتىنداي جىرتىعىنان كىرىپ، يىسكەپ- تاتىپ، ارتىنشا ول جەردەن دە ۇزاپ كەتتى.
سالىپ ۇرىپ قايشانىڭ جوزسىسىنىڭ ۇستىنەن ءبىراق شىقتى. قايشا ءومىرى داستارحان جيمايتىن سالاق ايەل. ەڭ بولماسا داستارحاننىڭ ءۇستىن ءبىر شەتكە جيىستىرىپ، بەتىنە ورامال، گازەت سىندى بىردەڭە جاۋىپ قويسا ەتتى. قايشانىڭ سالاقتىعىنىڭ قىزىعىن كوردى دەيسىڭ بۇل شىبىن. اۋەلى ءاپ دەگەندە كوزىنە تۇسكەنى سارى ماي ەدى، ونى ءبىر جالاپ الدى.
قاتار تۇرعاسىن قايماقتان دا ءبىر جالاپ قويدى. داستارحاننىڭ ارعى جاق بەتىندەگى ورىكتىڭ ۆارەنيەسىنە قونباق ەدى، قاتار تۇرعان ەكى بال اراسى مىنەز كورسەتتى.
بۇل جەردەن قايىر بولماعاسىن سەرۆانتتىڭ جانىندا تۇرعان ءۇش ليترىك بانكىدەگى تاڭقۋرايدىڭ ۆارەنيەسىنە تۇسكەن. تۇسەرىن ءتۇسىپ الىپ شىعا الساشى. ءاۋ باستا قايناتپاعا مالتىعىپ قالىپ اۋرەگە تۇسسە، ارتىنان بانكانىڭ ساعال-ساعال اينەك كەرەگەسىنەن جوعارىعا ورلەۋ قيىنعا ءتۇستى... شىققاننان كەيىن دە بىردەن ۇشىپ كەتە المادى. ابدەن جاعالدانعان قاناتتارىن قاعا المادى. كەپكەننەن كەيىن بارىپ ۇشىپ ەدى، ۇزاققا بارماسىن ءبىلىپ، وسى ءۇيدىڭ ەگەسى، قايشانىڭ كۇيەۋى، جەكە شارۋا سەرىكتەستىگىنىڭ ءتوراعاسى، مۇكىمنىڭ قاق شەكەسىنە قوندى. مۇكام تاڭدا ەرتە تۇرىپ كەتەتىندىكتەن تۇسكى استان كەيىن اينالاسىن قورىلعا باسىپ ءبىر ساعات، جارىم ساعات ۇيىقتاپ الاتىن ەدى وسىلاي.
بۇل ۇيىقتاعاندا شىبىن قونباق تۇگىل ارا شاقسا دا ويانا قويۋى نەعايبىل. سونىڭ ماۋباستىعىن پايدالانعان ءبىزدىڭ شىبىن شەكەسىنەن مويىنىنا قاراتاي، سوسىن مويىنىنان جەلكە جاققا اينالىپ ءبىرىر ءسات تۇردى. ودان كەيىن قالقالاۋ تۇستى پايدالانىپ قالعىسى كەلدى مە ەكەن مۇكامنىڭ قۇلاعىنىڭ ىشىنە كىرىپ «بىرش» ەتكىزىپ قايتا شىقتى.
ەندىگى شارۋا قورا جاق. سول جاقتى بەتكە الدى. قورانىڭ ىشىنە كىرىپ قاراڭعى بۇرىش جاققا بارعانى سول ەدى، الدەنەگە ورالدى دا قالدى. ءوزى قىلداي جىڭىشكە. ءبىراق بۇنى بوساتار ەمەس. قوزعالعان سايىن بۇنى وراي ءتۇستى. بۇل ازاردا بەزەر. ءبىر ۋاقىتتا بۇعان قاراتاي ورمەكشىنىڭ جاقىنداپ كەلە جاتقانىن كوردى. ول اسىقپاي، اپتىقپاي كەلدى دە ابدەن سەمىرگەن بۇنىڭ دەنەسىنە (ورتاڭعى بۋناعىنا) ءبىز تۇمسىعىن قاداپ، «كۇللى الەمدى» شارلاپ بويىنا جيناعان قان-جىنىن ءبىر-اق ساتتە سورىپ الا قويدى.
شىبىن جانىنىڭ شىعىپ بارا جاتقانىن سەزىپ تە ۇلگەرمەدى. اقىر ءىشىپ-جەپ، تويىپ، كۇللى دۇنيەنى لاستاپ بولعاسىن اۆستراليا جاققا قاراي ۇشپاي ما، قورا جاقتا نەسى بار. ميسىز.
ءومىر دەگەن قىزىق، ءا...
جازۋشى بەيبىت سارىبايدىڭ الەۋمەتتىك جەلىدەگى جازباسىنان الىندى.