الەمدەگى ەڭ ۇلكەن عيمارات قىتايدا
ورتاشا ەسەپپەن بۇل عيماراتتىڭ اۋدانى 1,76 ميلليون كۆادىرات مەتىر اۋماقتى الىپ جاتىر. نىسان بىرنەشە بولىككە بولىنەن. ەڭ ورتاڭعى، نەگىزگى بولىگىنە جۇمىس كەڭسەلەرى، ءماجىلىس زالدارى جانە 1000 ادامعا ارنالعان ەكى بىردەي بەس جۇلدىزدى قوناق ءۇي ورنالاستىرىلعان. ال 400 كۆادىرات مەتر اۋماقتى ساۋدا پاۆيلوندارى مەن دۇكەندەر الىپ جاتىر.
«جاڭا داۋىردە» سوڭعى ۇلگىدەگى ۋنيۆەرسيتەت كامپۋستارى دا بار. 14 زالدان تۇراتىن كينوتەاتر، زاماناۋي مادەنيەت ورتالىعىنا اينالعان 30 مىڭ كۆادىرات مەتىر جەردى الىپ جاتقان مۇراجاي، 1800 ادامعا قىزمەت اتقاراتىن تەاتر دا وسى جەردە. جىلدىڭ قاي مەزىلى بولسا دا، قىزمەتىن توقتاتپايتىن جەرورتا تەڭىزى جاعالاۋىنداعى اۋىلدى بەينەلەپ تۇرعان ۇلكەن سىرعاناق الاڭى - تۋريستەردى ەڭ كوپ قابىلدايتىن ورىن. ال، عيماراتتىڭ ەڭ كورىكتى ورىندارىنىڭ ءبىرى - «پاراديز ارالى» اكۆاساياباعى.
بۇل اكۆاساياباقتى ارالاپ ءجۇرىپ جاساندى جاعالاۋعا شىعۋعا مۇمكىندىك بار. ول جاعالاۋدىڭ ادەمىلىگى سونشا، ءتىپتى ادام ءوزىن تەڭىز جاعاسىندا دەمالىپ جۇرگەندەي سەزىنەدى. قۇم توسەلگەن ايلاققا تولقىن ۇرىپ، كەي كەزدە جاساندى جەل دە سوعىلادى ەكەن. بۇل جاعاجايدا ءبىر مەزەتتە 600 ادامعا دەيىن دەمالا الادى.
بۇل عيماراتقا اپتانىڭ بارلىق كۇنىندە جاساندى كۇن ساۋلەسى ءتۇسىپ تۇرادى. بۇل مەحانيكالىق قۇرىلعى ءبىر ۋاقىتتا جارىقتى رەتتەپ، ءزاۋلىم سارايدىڭ ىشىندەگى جىلۋدى رەتتەيدى. وسى كۇنگە دەيىن جاساندى كۇن جۇيەسىن مۇنداي ۇلكەن عيماراتتارعا ورناتقان ەمەس. سوندىقتان، «جاڭا ءداۋىردىڭ» ەڭ باستى ەرەكشەلىكتەرىنىڭ ءبىرى- وسى ارتىقشىلىق. ساۋدا ورىندارىنان ءدامدى تاعامعا قارىن تويدارۋعا بولادى. ءدامحانالاردىڭ كوپتىگى سونشا - ءتىپتى جاعالاۋلاردا دا تاماقتانۋ ورتالىقتارى قاپتاپ تۇر.
ورتالىقتىڭ جانىندا كولىك تۇراعىنا 15 مىڭ ورىن بولىنگەن. ال، عيماراتتىڭ قاق الدىنا بيلەيتىن ۇلكەن سۋبۇرقاقتار ورناتىلعان. بۇل سۋبۇرقاقتىڭ قۇرىلىسى قيىن بولعانى سونشا، ماماندار ونى سالۋ ءۇشىن 3 -جىل ۋاقىت كەتىرگەن. عيماراتتىڭ بارلىق قۇرىلىسىنا جاۋاپتى، وسى يدەيانى جۇزەگە اسىرعان بريتان ارحيتەكتورى - زاحا حاديد. وسى جۇمىسى ءۇشىن زاحاعا 2004 -جىلى الەمدىك دەڭگەيدە ۇلكەن جۇلدە تابىستالدى.
Massaget.kz