سيفرلاندىرۋ ماسەلەسىندە بىرلەسىپ ارەكەت ەتۋ كەرەك - ساعىنتايەۆ
باقىتجان ساعىنتايەۆ بايانداماسىندا سيفرلىق كۇن تارتىبىنە بايلانىستى قازاقستان تاراپىنان اتقارىلىپ جاتقان جۇمىستارمەن ءبولىستى.
«ءبىز سيفرلىق كۇن تارتىبىندە وسىمەن ەكىنشى جىل ءومىر ءسۇرىپ جاتىرمىز. قازاقستان ەلەكتروندى قىزمەت كورسەتۋدى 10 جىل بۇرىن باستادى. ءبىزدىڭ ماقساتىمىز - مەملەكەتتىك قىزمەتتەردىڭ 80 پايىزىن ەلەكتروندى فورماتقا كوشىرۋ. ينفراقۇرىلىم ءۇشىن قازاقستان اۋماعى وتە ۇلكەن. ءبىز اۋىلداردى كەڭ جولاقتى ينتەرنەتپەن قامتاماسىز ەتۋدى 2020-جىلعا دەيىن اياقتاۋدى جوسپارلاپ وتىرمىز. حالىقتى سيفرلىق قىزمەت تۇرىنە تارتۋ كەرەك، ونى قولدانۋ سانگە اينالۋى كەرەك.
ءبىز مەكتەپ قابىرعاسىنان ماتەماتيكتەر مەن باعدارلاماشىلاردى ازىرلەپ، جوعارى وقۋ ورىندارىن وسى سالاعا باعىتتاپ جاتىرمىز. يننوۆاتسيا كەرەك، سول ءۇشىن ءبىز شەتەلدىك ارىپتەستەرمەن قارىم-قاتىناس ورناتامىز، اسىرەسە سيفرلاندىرۋ ماسەلەسىندە بىرگە ارەكەت ەتۋ ماڭىزدى. ءسوز جوق، ءار مەملەكەت وزىنشە داميدى، دەگەنمەن، ەڭ ماڭىزدىسى - فورۋمنان كەيىن سيفرلاندىرۋ سالاسىندا ىنتىماقتاسا الۋىمىزدا بولىپ وتىر»، - دەدى باقىتجان ساعىنتايەۆ.
بايانداماسىندا ق ر پرەمەر-ءمينيسترى ەلىمىزدە تەحنولوگيالىق كاسىپكەرلىككە جاعداي جاسالىپ وتىرعانىن ايتتى.
«ەكسپو اۋماعىندا IT- حاب جۇمىسىن جارتى جىلدان كەيىن ىسكە قوسامىز. ول تۋرالى شەشىم قابىلداندى، زاڭ شىعارىلدى. اعىلشىن قۇقىعىنداعى استانا حالىقارالىق قارجى ورتالىعى تۋرالى كونسيتۋتسيالىق زاڭ قابىلداندى، ءبىزدىڭ IT- حاب وسى ورتالىققا قوسىلدى. ءبىز وعان الەمنىڭ دارىندى ادامدارىن تارتقىمىز كەلەدى. سونىمەن قاتار، ءبىز كيبەرقاۋىپسىزدىك تۋرالى ۇمىتپاۋىمىز كەرەك. ە ا ە و ماسەلەسىنە كەلگەندە ءبىز كەلىسىمدى ازىرلەۋ بارىسىندا ەكونوميكا قۇرۋ سالاسىندا عانا ينتەگراتسيا ورناتۋعا كەلىسكەنبىز. ءبىراق، ۋاقىت وتە كەلە ءبىز شەكارالاردىڭ اشىقتىعانا جەتەمىز، سەبەبى، سيفرلىق پلاتفورمادا شەكتەۋ، شەكارا دەگەن جوق، وسى وي مەنى ءجيى مازالايدى»، - دەدى ب. ساعىنتايەۆ.
ق ر پرەمەرىنەن كەيىن ءسوز العان ارمەنيا ۇكىمەتىنىڭ باسشىسى كارەن كاراپەتيان 2030-جىلى ارمەنيا مەملەكەت پەن بيزنەستىڭ قارىم-قاتىناسىندا 100 پايىز سيفرلاندىرۋعا وتكەلى وتىرعانىن جەتكىزدى.
اۆتور: الماس مۇقاش ۇلى