قوستاناي وبلىسىندا تاعى ءبىر قالا پايدا بولادى

قوستاناي. قازاقپارات - قوستاناي وبلىسىندا تاعى دا ءبىر قالا پايدا بولۋى مۇمكىن. بۇل تۋرالى وبلىس اكىمدىگىندە وتكەن اپپارات ماجىلىسىندە ايتىلدى، دەپ حابارلايدى قازاقپارات.

جيىندا بەلگىلى بولعانداي، جولداردى قايتا جوندەۋ، كۇردەلى جوندەۋدەن وتكىزۋ جانە ينجەنەرلىك-كوممۋنيكاتسيالىق جەلىلەردى جۇرگىزۋ ءۇشىن وبلىسقا رەسپۋبليكالىق بيۋجەتتەن 30 ميلليارد تەڭگە ءبولىندى.

وبلىس اكىمىنىڭ سوزىنشە، قوستاناي اۋدانىنىڭ «كوكتەم»، «توبىل-1»، «توبىل-2» شاعىن اۋداندارىنداعى تۇرعىن ءۇي قۇرىلىستارى اياقتالعان سوڭ، اۋدان قالا مارتەبەسىنە ۇسىنىلۋى مۇمكىن. اتالعان مولتەك اۋداندار ينجەنەرلىك-كوممۋنيكاتسيالىق جەلىلەر تارتىلعاننان كەيىن تۇرعىندار يگىلىگىنە بەرىلەدى. قازىرگى ۋاقىتتا جوبالىق-سمەتالىق قۇجاتتاردى دايىنداۋ ءۇشىن 114 ميلليون تەڭگە ءبولىندى.

«وزدەرىڭىزگە بەلگىلى، قوستاناي وبلىسىندا ءتورت قالا بار. ولار: قوستاناي، رۋدنىي، ليساكوۆ جانە ارقالىق. ال جىتىقارانىڭ اۋماعى كەڭ بولعانىمەن، ول رەسمي تۇردە قالا مارتەبەسىنە يە ەمەس. قوستاناي اۋدانىنىڭ ورتالىعى زاتوبول سەلوسىندا 25 مىڭ ادام تۇرادى. دەگەنمەن، بۇل 10 جىل بۇرىنعى ساناقتاعى مالىمەت. كەلەسى جىلى تاعى دا ساناق جۇرەدى. بۇعان قوسا زارەچنىي سەلوسىندا 10 مىڭ ادام بار. مىنە، ەندى وسى كورسەتكىشتەردى ەسكەرىپ، زاتوبول سەلوسىنا قالا مارتەبەسىن الىپ بەرۋىمىز قاجەت. مەن بۇل ماسەلەنى وسى ايدىڭ سوڭىنا قاراي تاعى دا كوتەرەمىن. ءتيىستى مينيسترلىكپەن جۇمىس ىستەپ جاتىرمىز»، - دەدى ارحيمەد مۇحامبەتوۆ.

وبلىس اكىمى ءمالىم ەتكەندەي، قازىر قوستاناي قالاسىنداعى «اۋەجاي» شاعىن اۋدانىنداعى قۇرىلىس جۇمىستارى اياقتالىپ قالدى. بيىل شاعىن اۋدانعا جاقىن ورنالاسقان وزەننىڭ ماڭايى اباتتاندىرىلىپ، جاڭا ساياباق جانە جاعالاۋ اشىلادى.

اۆتور: قاسقىرباي قويشىمانوۆ