قازاقستانداعى جاستاردىڭ باستى قۇندىلىقتارى قانداي - ساۋالناما
«ەلىمىزدىڭ ماڭىزدى ادامي رەسۋرسى - جاستار بولىپ تابىلادى. ەگەر جاستار «جولداۋدان نە كۇتەدى؟» دەگەن سۇراققا كەلەر بولساق، جاستار ەڭ الدىمەن مەملەكەتتىڭ قامقورلىعىن قالايدى. ءبىزدىڭ زەرتتەۋىمىز بويىنشا، قازاقستانداعى جاستاردىڭ 70 پايىزى «مەملەكەت جاستارعا قامقور بولۋى كەرەك» دەپ ەسەپتەيدى»، - دەيدى «جاستار» عىلىمي- زەرتتەۋ ورتالىعى ديرەكتورىنىڭ عىلىم جونىندەگى ورىنباسارى اسەم قايداروۆا استانادا پرەزيدەنتتىڭ 10 -قاڭتارداعى جولداۋى تالقىلانعان دوڭگەلەك ۇستەلدە.
ونىڭ ايتۋىنشا، ەلباسىنىڭ جولداۋىندا زاماناۋي يندۋستريالدى قوعامنىڭ ترەندتتەرى، ونەركاسىپتى سيفرلاندىرۋ، ادامي كاپيتالعا باسىمدىق بەرۋ، اعىلشىن ءتىلىن مەڭگەرۋ سەكىلدى وزەكتى ماسەلەلەر ەسەپكە الىنعان. اسەم قايداروۆا وسى مىندەتتەردىڭ بارلىعى ەڭ الدىمەن جاستارعا قاتىستى ەكەنىن اتاپ ءوتتى.
«قازاقستاندا قازىرگى ۋاقىتتا بار حالىقتىڭ 23 پايىزىن جاستار قۇرايدى. مەملەكەت باسشىسىنىڭ جولداۋىندا ەڭ ءبىرىنشى كەزەكتە ادام، ادام كاپيتالى مەن ونىڭ قۇندىلىقتارى الدىڭعى قاتارعا شىققان. جاستار ءۇشىن ەڭ باستى قۇندىلىق - وتباسى. ءبىزدىڭ زەرتتەۋىمىز بويىنشا قازاقستانداعى جاستاردىڭ 80 پايىزى ومىرىندەگى باستى قۇندىلىقتى - وتباسى دەپ بىلەدى. الايدا ساۋالناما بارىسىندا قۇندىلىقتاردىڭ قاتارىنا تەز بايۋ سەكىلدى فاكتورلاردى اتاعاندار دا بار»، - دەيدى ول.
سونىمەن بىرگە، ساراپشى وكىنىشكە قاراي ۇيلەنگەن جاستاردىڭ 35 پايىزى تولىق ەمەس وتباسىلى، ياعني اجىراسىپ كەتەتىندەردىڭ قاتارىندا ەكەنىن ايتادى.
«قازاقستاندى بولاشاقتا قانداي ەل رەتىندە كورەسىز؟» دەگەن ساۋالعا جاستاردىڭ باسىم كوپشىلىگى ءۇش ءتىلدى مەڭگەرگەن كوپەتنوستى مەملەكەت رەتىندە كورەتىندەرىن ايتىپ جاۋاپ بەرگەن. ناقتى وسى ءتىل مەڭگەرۋ ماسەلەسىنە ەلباسىنىڭ جولداۋىندا باسا ماڭىز بەرىلگەنىن ايتا كەتكىم كەلەدى»، - دەدى اسەم قايداروۆا.
ەسكە سالا كەتسەك، اقوردانىڭ سايتىندا 10 -قاڭتاردا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ قازاقستان حالقىنا جولداعان «ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋى جاريالانعان بولاتىن. مەملەكەت باسشىسى ءوز جولداۋىندا ەل الدىنداعى 10 نەگىزگى مىندەتتى اتاعان ەدى.