تالدىقورعاندىقتار جاقسىلىق جاساپ جارىسۋدا - فوتو

تالدىقورعان. قازاقپارات - الماتى وبلىسىنىڭ تۇرعىندارى وسى كۇندەردەگى سارشۇناق ايازداردا ءبىر-بىرىنە كومەك قولىن سوزىپ، يگى ىستەرمەن اينالىسۋدا.

ماسەلەن، قالاداعى مەديتسينالىق كوللەدجدىڭ ستۋدەنتتەرى ايالدامالاردا تۇرعان حالىققا ىستىق ءشاي ۇلەستىرسە، شاھارداعى ءتۇرلى اۆتوكلۋبتىڭ مۇشەلەرى ادامداردى ۇيلەرىنە تەگىن جەتكىزۋدە، دەپ حابارلايدى قازاقپارات ءتىلشىسى.

كۇن سۋىسا دا، كوڭىلدەرىڭىز سۋىماسىن!» دەگەن تىلەكپەن بولاشاق مەديتسينا قىزمەتكەرلەرى حالىق كوپ شوعىرلانعان جەرلەردە جانە ايازعا قاراماستان ساۋدا جاساپ تۇرعان جاندارعا ءشايلارىن ۇسىندى. مەديتسينالىق مەكەمەنىڭ بىلىمگەرلەرى وسىلايشا تالدىقورعاندىقتارعا جاقسى كوڭىل- كۇي سىيلاۋعا تىرىسۋدا. جانە بۇل باستامالارىن وزگە وقۋ ورىندارىنىڭ ستۋدەنتتەرى دە قولداسا دەپ تىلەيدى.

ال وبلىس ورتالىعىنا قاراستى ەركىن اۋىلدىق وكرۋگىنىڭ مەشىتىندە «جاسىلىق جاساپ جارىسايىق» اتتى توپ قۇرىلىپ، كومەككە مۇقتاج جاندارعا قول ۇشىن سوزۋدا. ولار وتباسىلىق جاعدايى تومەن ادامدارعا كومىر الىپ بەرىپ، ازىق-تۇلىكپەن قامتۋدا.

وسىلايشا تالدىقورعاندىقتار ۇيىمشىلدىقتىڭ ۇلگىسىن كورسەتىپ، حالىقتىڭ العىسىنا بولەنۋدە. قاتتى اياز قالا تۇرعىندارىن ءبىر-بىرىنە جاقىنداستىرا ءتۇستى. وبلىس ورتالىعىندا ۇسكىرىك اياز ءالى دە ساقتالۋدا. اۋا تەمپەراتۋراسى -30-35 گرادۋسقا دەيىن تومەندەۋدە.

ايتا كەتۋ كەرەك، اقسۋ اۋداندىق مەشىتىندە دە جاعدايى تومەن 35 وتباسىعا ۇن تاراتىلدى.

اۆتور:سامال قابىشەۆا