14:18, 18 - قاڭتار 2018 | GMT +6
لاتىن الىپبيىنە كوشۋدى ءتۇسىندىرۋ ءۇشىن بلوگەرلەرگە اقشا بولىنبەيدى - مينيسترلىك
استانا. قازاقپارات - ق ر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىستار كوميتەتى ءتوراعاسىنىڭ ورىنباسارى عالىمجان مەلدەشوۆ «قازاقپارات» ح ا ا ءتىلشىسىنىڭ سۇراقتارىنا جاۋاپ بەرە وتىرىپ، لاتىن ءالىپبيى بويىنشا ءتۇسىندىرۋ جۇمىستارىنا بلوگەرلەردى جۇمىلدىرۋعا قاتىستى كوپشىلىككە تارالعان اقپارات قىزمەتتىك قاتەلىكتىڭ سالدارىنان تۋىنداعانىن حابارلادى.
«ب ا ق- تا جاريالانعان اقپاراتتىڭ ارقاسىندا كەلەسى ماسەلە انىقتالدى، «ەلەكتروندىق ۇكىمەت» پورتالىندا قازاق ءتىلى ءالىپبيىن لاتىن گرافيكاسىنا كەزەڭ-كەزەڭىمەن كوشىرۋ بويىنشا 2025-جىلعا دەيىنگى مەرزىمگە ارنالعان ءىس-شارالار جوسپارىنىڭ ماقۇلدانباعان جوباسى جاريالانعان. جۇرتشىلىققا الەۋمەتتىك جەلىلەردە ءتۇسىندىرۋ جۇمىستارىن جۇرگىزۋ ءۇشىن قارجى بولىنبەگەنىن جەتكىزگىمىز كەلەدى»، - دەپ اتاپ ءوتتى مادەنيەت جانە سپورت مينيسترلىگىنىڭ قىزمەتكەرى.
سونداي-اق، مەلدەشوۆ قاتەلىك جىبەرگەن ۆەدومستۆو قىزمەتكەرلەرىنىڭ جاۋاپكەرشىلىككە تارتىلاتىنىن، ال بەكىتىلگەن جوسپاردىڭ جوباسى تاياۋ كۇندەرى «ەلەكتروندىق ۇكىمەت» ونلاين-پورتالىندا جاريالاناتىنىن ءمالىم ەتتى.