جاستاردىڭ رەپرودۋكتيۆتى دەنساۋلىعىن نىعايتۋ قاجەت - ۆيتسە- مينيستر
وتىرىستا مينيسترلىكتىڭ 2018-جىلى باسىمدىق بەرىلۋى ءتيىس باعىتتارى اتالدى، دەپ حابارلايدى «قازاقپارات» ح ا ا ءتىلشىسى.
ءىس-شاراعا ق ر دەنساۋلىق ساقتاۋ ءمينيسترى ەلجان ءبىرتانوۆ، قوعامدىق كەڭەستىڭ مۇشەلەرى، وڭىرلەردىڭ دەنساۋلىق ساقتاۋ باسقارمالارىنىڭ، اۋماقتىق دەپارتامەنتتەرىنىڭ باسشىلارى قاتىستى.
دەنساۋلىق ساقتاۋ ۆيتسە-ءمينيسترى ءلاززات اقتايەۆا وتىرىستا بايانداما جاساپ، حالىقارالىق تاجىريبەنىڭ نەگىزىندە رەسپۋبليكادا قوعامدىق دەنساۋلىق ساقتاۋ قىزمەتى قۇرىلعانىن اتاپ ءوتتى. ونىڭ ايتۋىنشا، قىزمەتتىڭ جۇمىسى ءومىردىڭ بارلىق كەزەڭىنە: سابيلەردى ۆاكتسيناتسيالاۋ مەن مەكتەپ مەديتسيناسى، سالاۋاتتى مىنەز-قۇلىق، ەكولوگيالىق قاۋىپسىزدىك جانە جاستار مەن ەرەسەكتەردىڭ اراسىنداعى ەڭبەك گيگيەناسىنان باستاپ، دۇرىس تاماقتانۋ مەن ەگدە جاستاعى ادامداردىڭ سوزىلمالى دەگەنەراتسيالىق اۋرۋلارىنىڭ الدىن الۋعا دەيىن باعىتتالعان.
مەملەكەت باسشىسى ءوز جولداۋىندا دۇرىس تاماقتانۋدى، سپورتپەن شۇعىلدانۋدى، دەنە بەلسەندىلىگىن قوسا العاندا قوعامدىق دەنساۋلىقتى باسقارۋدى كۇشەيتۋ كەرەكتىگىن اتاپ وتكەن بولاتىن.
«جاستاردىڭ رەپرودۋكتيۆتى دەنساۋلىعىن ساقتاۋ مەن نىعايتۋعا ەرەكشە نازار اۋدارعان ءجون. مۇنداي جاعدايدا ءاربىر نىسانالى توپ ءۇشىن جەكە ءتاسىلدى ايقىنداۋ، سونداي- اق دەنە شىنىقتىرۋمەن شۇعىلدانۋ ءۇشىن ينفراقۇرىلىم قۇرۋ، قاۋىپسىز ءومىر مەن ەڭبەك ءۇشىن جاعداي جاساۋ جانە جاستاردىڭ رەپرودۋكتيۆتى دەنساۋلىعىن نىعايتۋ قاجەت»، - دەدى ءلاززات اقتايەۆا.
پرەزيدەنت سونىمەن بىرگە جولداۋىندا ۇزدىك حالىقارالىق تاجىريبەنىڭ نەگىزىندە وبىردى ەرتە دياگنوستيكالاۋ مەن ەمدەۋ قامتاماسىز ەتىلۋى تيىستىگىن اتاپ كورسەتكەن بولاتىن.
«وسىعان بايلانىستى، ءبىز ەرتە دياگنوستيكالاۋ مەن ەمدەۋدى، اسىرەسە قاتەرلى ىسىكتەردىڭ پروفيلاكتيكاسىنان باستاپ ەمدەۋدى جەتىلدىرۋگە دەيىنگى ءىس- شارالاردى قامتۋدى كوزدەيتىن ونكولوگيالىق اۋرۋلارمەن كۇرەس جونىندەگى كەشەندى جوسپاردى ازىرلەۋ كەرەكپىز. ال وعان مۇمكىندىك بەرەتىن ونكولوگياعا جاڭا ءارى جوعارى ءتيىمدى تەحنولوگيالاردى اكەلۋگە ءتيىسپىز»، - دەدى ۆيتسە-مينيستر.
ءلاززات اقتايەۆا الداعى ۋاقىتتا ءمامس پاكەتى جەتىلدىرىلەتىنىن جەتكىزدى.
«قازىرگى تاڭدا الەمدە، ونىڭ ىشىندە دەنساۋلىق ساقتاۋدا يننوۆاتسيالىق تەحنولوگيالار تەز دامۋدا. زاماناۋي تەحنولوگيالار حالىققا مەديتسينالىق قىزمەت كورسەتۋ ۇلگىلەرىن وزگەرتەدى. بارلىق وزگەرىستەرگە ءبىز دەر كەزىندە نازار اۋدارۋعا ءتيىسپىز. مۇنىڭ بارلىعى ءبىرىنشى كەزەكتە زاڭنامالىق اكتىلەردە كورسەتىلۋى كەرەك. سوعان بايلانىستى، دەنساۋلىق ساقتاۋ جۇيەسىنىڭ تيىمدىلىگىن ارتتىرۋعا باعىتتالعان شارالاردى ىسكە اسىرۋ ءۇشىن مەملەكەت باسشىسى ءوزىنىڭ جولداۋىندا ۇكىمەتكە «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكستىڭ جاڭا رەداكتسياسىن ازىرلەۋدى تاپسىردى»، - دەدى ءلاززات اقتايەۆا.
اۆتور: ايان بەكەن ۇلى