قازاقستاندىقتار قىتاي اۋە كومپانياسىنىڭ سەرۆيسىنە شاعىمداندى
دەپ حابارلايدى «قازاقپارات» ح ا ا- نىڭ قىتايداعى مەنشىكتى ءتىلشىسى.
قازاقستان رەسپۋبليكاسىنىڭ ق ح ر- داعى ەلشىلىگىنىڭ مالىمەتتەرىنە قاراعاندا، قىتايلىق شەكاراشىلار قازاقستاندىقتاردى ترانزيتتىك ايماقتان شىعارۋدان باس تارتقان. قازاقستاندىق ديپلوماتتاردىڭ كەپىلدىك حات جازۋ ۇسىنىسى دا ناتيجەسىز بولدى.
سونىڭ سالدارىنان اراسىندا 3-12 جاستارداعى 7-8 بالا بار قازاقستان ازاماتتارى بەيجىڭ اۋەجايىنداعى ءۇشىنشى تەرمينالدىڭ ترانزيتتىك ايماعىندا 20 ساعاتتان استام ۋاقىت بويى قالىپ قويدى. ولار بەيجىڭنەن استاناعا ماسكەۋ ارقىلى 12 - قاڭتاردا عانا ۇشىپ كەتكەن.
Air China اۋە كومپانياسى قىزمەتكەرلەرى كورسەتكەن قىزمەتى قازاقستاندىقتاردىڭ قاتتى اشۋىن كەلتىردى. ولار جولاۋشىلاردى قاجەتتى ءومىر ءسۇرۋ جابدىقتارىمەن، تاماقپەن جەتكىلىكتى قامتاماسىز ەتپەگەن. سۋىق تاماق بەرىلگەن، سۋسىن جەتكىلىكسىز بولعان، ت. ب. بۇدان تىس، ولار قازاقستان ازاماتتارىنا مەنسىنبەي قاراعان، ال رەسەي، ا ق ش جانە ەۋروپا ەلدەرىنىڭ ازاماتتارى تەرمينالدان شىعارىلىپ، قوناقۇيگە ورنالاسقان.
ايتا كەتەيىك، قازاقستان رەسپۋبليكاسىنىڭ ق ح ر- داعى ەلشىلىگى قىتاي سىرتقى ىستەر مينيسترلىگىنە ءتيىستى نوتا دايىنداپ قويدى.