تۇركياداعى قازاقتار: اتاقتى زۇقا باتىردىڭ نەمەرەسى قانداي اقيقاتتى ايتتى؟ - فوتو

None
None
نۇر-سۇلتان. قازاقپارات - تۇركياداعى قازاقتار تۇراتىن التاي اۋىلى تۋرالى جازعانبىز وتكەن جولى. سايت ءتىلشىسى اۋىل تۇرعىندارىمەن تىلدەسىپ، تۇرمىس- تىرشىلىگىمەن تانىسقان.

الايدا ايتىلماعان دۇنيە ءالى دە كوپ. بۇل ماقالانى جازىلعان جايدىڭ جالعاسى دەپ بىلگەيسىز. سونىمەن...

التايدا بىرنەشە كۇن ايالدادىق. ءبىراز نارسەگە قانىقتىق. اسىرەسە، ءساليمان اجەنىڭ ايتقان اڭگىمەسى اسەرلى بولدى. كوڭىلىمىزدى بوساتىپ جىبەردى. جاقىندا اۋعانستاننان بوسىپ كەلگەن بىرنەشە اۋعان وتباسىنا قول ۇشىن سوزىپتى. «بۇلاردىڭ ءومىرى وتكەن عاسىردىڭ 50- جىلدارى تەنتىرەپ تۇركيادان ءبىر- اق شىققان ءبىزدىڭ بابالارىمىزدىڭ تاعدىرىنا ۇقساس. كورگەن قورلىعى، تارتپاعان ازابى جوق...» دەيدى ول.

ءساليمان اجەي اتاقتى زۇقا باتىردىڭ نەمەرەسى. بيىل 73-كە اياق باسىپتى. كوكىرەگى سايراپ تۇر ءبىراق، كەشەگى كۇنىن بۇگىنگىسىندەي بىلەدى. اتاجۇرتتان اعايىندار كەلگەنىن ەستىپ التاي اۋىلىنىڭ ىرگەسىندەگى بور قالاشىعىنان جەتىپتى.

- بالام، جاقىندا وتا جاساعان. ءالى ءالسىزبىن. ۇيگە ءجۇر. شەر تارقاتايىن» دەگەن اجەيدىڭ ءسوزىن ەكى ەتكەن جوقپىز.




ءساليمان اجەيدىڭ ۇيىنە دە كەلىپ جەتتىك. قوناعى بولدىق. داستارحانىنان ءدام تاتتىق. اڭگىمەسىن تىڭدادىق...

- 1944 -جىلى التايدا دۇنيە ەسىگىن اشتىم. اكەم شايمەردەن زاڭگى، زۇقا قاجىنىڭ ءۇشىنشى ۇلى. اكەمنەن تاراعان 11 بالامىز. اتام زۇقا باتىر زايساندا تۋعان، ونىڭ اكەسىنىڭ اتى نۇرمۇحامەد. اكەسىنەن ايىرىلعان ساتتە اتام 15 جاسار بوزبالا ەكەن. اتامنىڭ اناسى دا باتىردىڭ ۇرپاعىنان تارايدى. امەڭگەرلىك سالت بويىنشا ول كىسىنى جاقىن تۋىسقانىنا بەرمەك بولعان عوي. ءبىراق كونبەگەن. قاشقان. بالاسىن الىپ قىتاي اسقان. باركول جاققا... وسى جەردە تۇراقتايدى.

اتامنىڭ پەيىلى كەڭ ەدى. ادىلدىكتىڭ اق تۋىن كوتەرگەن ادام-تۇعىن. جۋان بايلاردان يمەنبەيتىن. جەرگىلىكتى جەردەگى شەنەۋنىكتەر حالىقتىڭ قالتاسىنا اۋىر سوعاتىن زاكۇن شىعارسا قارسى شىعاتىن. سودان شىعار باي-ماناپتاردىڭ قاناۋىنان شارشاعان حالىق اتامنىڭ جانىنا توپتاسا باستادى.

اۋىلىمىزدا جەتىم- جەسىر كوپ ەدى. اتام سولارعا قورعان بولدى. تاپقان- تايانعانىن جوق- جىتىكپەن بولىسەتىن. اسىپ بارا جاتقان بايلىق تا جوق ەدى باسىندا. ءبىراق، حالىق اش قالدىرعان جوق. پەيىلى كەڭ ادامنىڭ نەسىبەسى كەمىمەيدى عوي.



- ءبىر كۇنى اتامدى جاقيا دەگەن دۇنعان جىگىت ىزدەپ كەپتى. قىتايلاردان قاشىپ جۇرگەنىن ايتىپ پانا سۇراپتى. اتام جاقيانى اۋىلداعى ۇيلەردىڭ بىرىنە جاسىرعان عوي. سويتسە، الگى قاشقىنى قىتايدىڭ (گومينداڭنىڭ - رەد.) جانسىزى ەكەن.

جاقيانى تىڭشى قىلعان اسكەرلەر اۋىلدىڭ ماڭىنداعى قىراتتا وڭتايلى ءساتتى كۇتىپ جاتقان. ءبىر كۇنى بۇلار اپىل- عۇپىل جينالا باستايدى. ولاردى اۋىلداعى اعايىنىمىزدىڭ ءبىرى بايقاپ قالىپ، ايەلىنە تەز ارادا اتاما حابار جەتكىزۋدى تاپسىرادى. ءبىراق بارار جولدا الگى ايەلدى جاۋلار ۇستاپ الادى.

بۇل ۋاقىتتا اتامنىڭ الدىنا ءشاي اكەلەدى. كەسەدەگى شاي اتامنىڭ كوزىنە قانعا بوككەندەي ەلەستەگەن ەكەن. بىردەن تىسقا شىعىپ:

«بۇگىن مەنىڭ اقىرعى كۇنىم. سەندەرگە بۇدان بىلاي كومەكتەسە المايمىن. وتباسىلارىڭدى الىپ، اۋىلدان الىسىراق كەتىڭدەر» دەيدى اتام.


- سول كۇنى اتامنىڭ كىشى ايەلىنىڭ ۇيىندە قوناقتار بولىپتى. اتام: «قوناقتارىڭدى كۇت» دەگەن دە كەتىپ قالعان. ءبىراق، الگىلەر دە اس باتپايدى. ەرلەر جاعى: «جانىمىز زۇقانىڭ ومىرىنەن ارتىق ەمەس» دەيدى دە اتامنىڭ سوڭىنان ەرەدى. سول كۇنى 32 ادام قازا تاپتى...

جاۋ اۋىلىمىزعا تاڭ اتا تاپ بەردى. اجەم (بايبىشەسى) جوعارىعا ىلىنگەن مىلتىقتى الىپ، ونى اتاما بەرەم دەگەنشە وققا ۇشادى. قارۋىنان پىشاعى عانا قالعان اتام وزىنە العاش تاپ بەرگەن دۇشپاننىڭ كەۋدە تۇسىنان سۇقپاي ما...

ءبىراق، تۇس- تۇستان ەنتەلەگەن جاۋ قويسىن با؟ اتامنىڭ باسىن كەسىپ، اۋىلدىڭ كىرەبەرىسىندەگى قاقپاعا ءىلىپ كەتەدى. اكەم شايماردان ول كەزدە بوزبالا تۇعىن. اسكەرلەر كىرىپ كەلگەندە اكەم كيىز ءۇيدىڭ ءبۇيىرىن تەسىپ، قاشىپ كەتكەن. سوڭىنان قۋعىنشى قوسقان. ءبارىبىر ۇستاتپاپتى.


- اكەمنىڭ ءبىرىنشى ايەلى اۋىر دەرتتەن كوز جۇمعان. قىرقىن وتكىزگەسىن اكەم جار ىزدەۋگە كوشەدى. تۋعان-تۋىستى ارالايدى. كەرەيدىڭ ىشىنەن شىققان قىز ىزدەيدى. مەن اكەمنىڭ ەكىنشى ايەلى ءجاميحادان تۋعانمىن. انامنىڭ قولى التىن ەدى. اكەم جوقتا، اۋىر جۇمىستىڭ دەرلىگىن ءوزى اتقاراتىن.

«اكەلەرىڭنىڭ ماعان ىدىس- اياق جۋىپ جاتقان كەزىمدە كوزى تۇسكەن» دەۋشى ەدى مارقۇم. انامىزدان التاۋ تۋدىق. سولاردىڭ ىشىندە كوزى ءتىرىسى مەن جانە ءىنىم دالەلحان. وزگەلەرى سالەس، انەس، جانىمحان، دالەحان، ءساليمان جانە قاليمان قايتىس بولعان. اكەمدى ءۇيدىڭ كىشىسى قاليمان ومىرگە كەلگەننەن كەيىن 10 كۇن وتەر-وتپەستەن قىتايدىڭ جەندەتتەرى ءولتىرىپ كەتتى.

ال اكەم ولگەن كۇندى ءالى ۇمىتقام جوق. كوز الدىمدا بولدى، ويتكەنى. تاۋدان تومەن قاراي قۇلديلاپ ءتۇسىپ كەلە جاتقان بەتىمىز ەدى، ءاپ-ساتتە سولداتتارى قورشاپ الدى. كوپ. مۇزداي قارۋلانعان. الدىمىزدا كىشىگىرىم وزەن اعىپ جاتقان. اسىعىس- ۇسىگىس وتە باستادىق.

شەشەمنىڭ قولىندا بەسىگى، ءالى قىزىلشاقا قاليماندى ارقاسىنا تاڭىپ العان. اعامنىڭ بايبىشەسىنىڭ اتى جانىمىزدا جەلىپ كەلەدى. شەشەمنىڭ استىنداعى ات باتپاقتان شىعا الماي قالىپ، ۇستىندەگى بەسىك قۇلاپ ءتۇستى ءبىر كەزدە. شەشەم دە اتتان اۋىپ كەتۋدىڭ از الدىندا تۇرعان. ءالى ەسىمدە، مەنەن ءارى كەتسە ەكى جاس ۇلكەندىگى بار تاقان (بايبىشەنىڭ بالاسى) سۋعا كۇمپ بەردى دە، بەسىكتى الىپ شىقتى.

ىسقىرعان وقتىڭ داۋىسى ءالى كۇنگە دەيىن قۇلاعىمنىڭ تۇبىندە تۇر. ادامداردىڭ جانۇشىرعان ايعايى، تۇيەنىڭ بوزداعانى، جىلقىنىڭ كىسىنەگەنى ءبارى-ءبارى ارالاسىپ الاساپىران باستالىپ كەتكەن-دى.

اسىرەسە، وقتىڭ داۋىسى سۇمپايى ەدى.

جوق، وق ماعان تيەدى دەپ قورىققام جوق. ونداي قورقىنىشتان ادا ەدىم. بالا ەدىم. دۇشپاننىڭ وعى ات ۇستىندەگى اكەمە تيگەندە، ءىنىم ونىڭ الدىندا وتىرعان. ەكەۋى دە ۇرىككەن تۇيەلەر مەن جىلقىلاردىڭ جولىنا قۇلايدى.


- ءىنىمدى باۋىرلارىمنىڭ ءبىرى كوتەرىپ الىپ، قاشىپ بارا جاتقان اۋىلدىڭ شالىنا ۇستاتپاي ما... الگى شال بالانى الۋدان باس تارتادى. سەبەبى، ءوزىنىڭ دە شاماسى تاۋسىلعان ەدى. ەڭ اياعى مىلتىق كەزەنۋگە تۋرا كەلەدى. «يمانباي اتا، سەنىڭ ءومىرىڭ مىنا بالانىڭ ومىرىنەن ارتىق ەمەس» دەيدى باۋىرلارىم. اقىر اياعى بالانى ارتىنا مىنگەستىرۋگە كەلىسەدى. ءىنىم وسىلاي امان قالدى.

شەشەم بۇل ساتتە ات ۇستىندە قانسىراپ جاتقان اكەمنىڭ جانىندا شارق ۇرىپ جۇرگەن. ارتىندا بەسىك، ارقاسىندا مەن.

اكەمىزدى ارەڭ دەگەندە كوتەرىپ، جاۋدىڭ قورشاۋىنان سىتىلىپ شىقتىق. توعاي اراسىندا تۇنەدىك. اكەم، قايران اكەم ءولىم اۋزىندا جاتتى. وق باۋىرىن تەسىپ كەتىپتى. جىگىتتەردەن: «قان قالاي اعىپ جاتىر؟ « دەپ سۇراعانى ەسىمدە. «كوپىرشىكتەنىپ جاتىر...» دەدى الگىلەر. اكەم: «ەندەشە مەنەن قايران جوق. اجال الىپ تىنادى. باسىمدى قۇبىلاعا قاراتىڭدار دا، كەتىڭدەر بۇل ارادان» دەدى.

شەشەم كونگەن جوق. باسقالارى كەتسە دە، اقىرىنا دەيىن اكەمنىڭ جانىندا قالاتىنىن ايتتى. ءبىراق، اعام شورت كەستى.

«ءبىز باراتىن جەرگە سەندە باراسىڭ. ولەتىن جەرىڭ بۇل ەمەس» دەدى ول.

شەشەمنىڭ كونۋىنە تۋرا كەلەدى. اكەممەن وسىلاي قوشتاستىق...

كوش قايتا قوزعالدى. جولاي جەندەتتەردىڭ وعىنان جارالانعان تاعى 10 ادام كوز جۇمدى. ولاردىڭ بەيىتىن تاسپەن بەكىتىپ، جىرتقىشتاردان جاسىرىپ جەرلەدىك. ءسىڭلىم قاليمان دا ۇزاققا بارعان جوق. انامنىڭ اق ءسۇتى تاۋسىلعان-تىن... سابيلەردى كەبەجەگە سالىپ كوشىرگەن. بەسىكتەن بەلى شىقپاعان بالا ءۇشىن بۇل اۋىر ازاپ ەدى. اشتىقتى الداۋ ءۇشىن ۇلكەندەر جاعى بىزگە سۇيەك پەن ۇن ارالاسقان سۋ بەرەتىن».

ءساليمان اجە اڭگىمەسىن وسى ارادان ءۇزىپ وتباسىلىق سۋرەتىن كورسەتتى بىزگە. قىتايدان قاشىپ، پاكىستانعا جەتكەن ءساتى ەكەن.

- شولگە جەتكەسىن ۇلكەندەر جاعى وسى ارادا ءبىراز ايالداۋدى ءجون دەپ تاپتى. شەشەم قوي سويدى. قازانعا ەت قايناتتى. ازعانتايىن وزىنە، كوپ بولىگىن بىزگە قالدىردى. ارتىنشا: «ءارى قاراي مەنسىز جۇرەسىڭدەر. الدا جەتى كۇنشىلىك جەر بار. ال مەن اكەلەرىڭدى ىزدەيمىن. كەيىن كەتەمىن، ءتىرى بولسا، ارقالاپ كەلسەم دە الىپ كەلەم. ولسە... ونى دا كوزىممەن كورەمىن. مەن ءۇشىن قايعىرماڭدار. بىرگە بولىڭدار، باۋىرىڭا قارايلاس»، - دەدى.

ءبىزدى اعامنىڭ بايبىشەسىنە تاپسىردى. اكەمنىڭ ارتىندا ۇزاق جولعا شىداس بەرەتىن اتى قالعان. سونى ءمىندى. بالامىز عوي. جىلادىق. قيمادىق. اكەدەن كەيىن شەشەدەن ايىرىلعىمىز كەلمەدى...

شەشەم ءشول دالانى شارلاپ ءبىر اپتا جۇرەدى. ازىعى تاۋسىلادى. استىنداعى اتىن قاسقىرلار جەپ تىنادى. ەڭ قىزىعى تاعىلار اناما تيىسپەگەن. تۇنىمەن تاپ جانىندا ۇلىپ جاتادى ەكەن، ءبىراق ماڭايلاۋعا باتپاعان. قاتالاعان كەزدە كوك ءشوپتىڭ تامىرىن سورىپ ءشولىن باسىپتى.

وسىنداي كۇندەردىڭ بىرىندە انام ءتۇس كورمەي مە... ەسكى ۇيلەرىندە ەكەن. ءبارى بۇرىنعىشا. الدىندا توسەك تۇر دەيدى. ۇستىنە قىزىل كورپە توسەپ قويىپتى. ەندى ءبىر ساتتە اكەم پايدا بولىپ شەشەمدى كوتەرگەن كۇيى الگى توسەككە وتىرعىزعان. ارتىنشا سىرىڭكە جاعىپتى. وسى ساتتە الاكولەڭكە ءۇيدىڭ ءىشى جاپ-جارىق بولىپ كەتەدى. ويانسا اپتا بويى شارلاعان شولەيتتە جاتىر ەكەن.

ءتۇستى اللا ايان بەردىگە بالاعان شەشەم كەيىن قايتادى. جولدا انامدى قولدارىندا قارۋى بار ءبىر توپ ادام توقتاتقان. اتىپ تاستاۋى مۇمكىن ەدى. دەر كەزىندە كيمەشەگىن شەشىپ الگىلەرگە قاراتا بۇلعايدى. سويتسە، بۇل دا وزىمىزدەي قاشقان قازاقتار ەكەن.

انامنىڭ جولى بولىپتى. اداسىپ جۇرگەندە وسى ارانى ءتىنتىپ جۇرگەن سولداتتار تۇتقىنىنا ءتۇسۋى ابدەن مۇمكىن ەدى. ءبىراق، اقىر اياعىندا تۋرا جول تاپقان. باسقا رۋدىڭ قازاقتارىن كەزىكتىرگەن كەزدە شەشەمنىڭ سويلەۋگە دە شاماسى بولماپتى. اۋىلعا الىپ كەلىپ ەسىن جيعىزعان. اس- سۋ بەرىپ، اياعىنان تۇرعىزىپتى. تىلگە كەلىپ، ەسىن جيعان كەزدە كۇيەۋىنىڭ قابىرىن كورگەندەرىن جانە ول جاققا قايتا ورالۋدىڭ قاۋىپتى ەكەنىن ايتقان. شەشەم بۇل ارادا ءبىر اپتا ايالدايدى.


اناممەن قايتا قاۋىشقان ءساتتى ءالى ۇمىتقام جوق. كەلە سالا بىردەن سولتانشارىپ اتامنىڭ ۇيىنە تارتتى. سەبەبى، اكەمدى ىزدەۋگە كەتكەنىن وعان ايتپاي كەتكەن. كيىز ءۇيدىڭ بوساعاسىنان اتتاپ امانداسقان كەزدە اعام انامنىڭ سالەمىن الماي قويادى. «ءىنىڭىز ءولدى، قايعىسىنا ورتاقپىن» دەيدى انام. سول ساتتە اعام سولقىلداپ جىلاپ جىبەرىپتى. شەشەم دە كوز جاسىنا ەرىك بەردى. مەن شەشەمنىڭ جانىندا تۇرعام. اياپ كەتتىم. ارقاسىنان سيپادىم. سول كۇننەن باستاپ اكەمنىڭ ەندى قايتىپ ورالماسىن ءبىلدىم...

گيمالاي...

- گيمالايدى شارلاپ ءبىر جىل بويى تىنباي جۇردىك. اكەمنىڭ ارتىندا قالعان التى بالانىڭ ىشىندە ءىنىم ەكەۋىمىزدىڭ عانا سۋ ىشەرلىگىمىز بار ەكەن. ءتىرى قالدىق. بالا تۇرماق، بۇل ساپاردى ۇلكەندەردىڭ ءوزى كوتەرە المادى. گيمالايدا اۋا جەتپەي ولگەندەرى قانشاما. اپايىمنان وسىلاي ايىرىلدىم. «اپا». ولەرىندە ايتقان سوڭعى ءسوزى وسى ەدى...

ولگەندەردى قارمەن كومەتىنبىز. سەبەبى، تاس بولىپ قاتىپ قالعان قارا جەردى قازۋ مۇمكىن ەمەس تۇعىن. تاۋدا ءتىرى جان جوق. قايدان بولسىن. سول كەزدەرى قالاي ءۇسىپ قالماعام دەپ ويلايمىن. قازىر عوي جىلى جەر، جىلى ۇيدە وتىرىپ توڭىپ وتىرامىن. ال سول كەزدەرى شە؟ ءتىپتى، قىسقا ساي كيىمىم دە جوق ەدى.

اقىرى تيبەتكە دە جەتتىك. تيبەت پەن پاكىستاننىڭ شەكاراسىندا تيبەت شوپاندارى وقتىڭ استىنا الدى. بىزگە ءتۇن ورتاسىندا تاپ بەردى. ءتۇنى بويى كوز ىلمەي، تاڭ اتىپ قالعىپ كەتىپپىن. شەشەم وياتتى. «سولداتتار ءجۇر، ساق جاتىڭدار» دەدى ول. سويتسەم تۇندە ءبىز تاپ بەرگەن تيبەتتىڭ شوپاندارىن پاكىستاننىڭ سولداتتارى تىقسىرىپ تاستاپتى. ولارمەن سويلەسۋگە سىيلى، ساۋاتتى دەگەن ءۇش كىسىنى جونەلتتىك. ارتىنشا پاكىستاندىق سولداتتار قايتا ورالىپ، ءبىزدىڭ قارۋ- جاراعىمىزدى الىپ الدى. سۋرەتكە ءتۇسىردى. ازىن- اۋلاق ازىق قالدىردى.

ول تۇستارى پاكىستاندى شەيح سايب بيلەپ تۇرعان. مارقۇم ءادىل بيلەۋشى، ادال مۇسىلمان ەدى. ءسايبتىڭ امىرىمەن تيبەتتىكتەر بىزگە دەپ ات اكەپ بەردى. اۋىلدان اۋىلعا تۇنەپ اقىرى كاشميرگە دە جەتتىك. بۇل ارادان جۇك تيەيتىن كولىككە وتىرىپ ەكىقاباتتى ۇيلەرى بار ءبىر اراعا جەتتىك. ءبىر ۇيگە ەكى وتباسىدان قونىستاندىردى. جىلى ءۇيدى، جۇمساق توسەكتى جاتىرقاپ قالسام كەرەك، ءبىرازعا دەيىن كوز ىلە المادىم.

كەلەسى كۇنى ءار وتباسىنى جەكە- جەكە شاقىرىپ ءارقايسىمىزعا كيىم- كەشەك پەن كورپە- جاستىق بەردى. اپتاسىنا ءبىر رەت ەت، كۇرىش جانە ازىن- اۋلاق اقشا بەرىپ تۇردى. اقشانى جۇمساعان جوقپىز. ەكى جىلدان سوڭ جيناعان اقشانىڭ باسىن قۇراپ اعامىزدى وسى توزاقتان امان ساقتاپ قالعانى ءۇشىن اللاعا العىس ايتۋ ماقساتىندا قاجىلىققا اتتاندىردىق. ءيا، بۇل شىنىمەن دە توزاق ەدى. اۋىلدان شىققاندا 60-تان اسا ادام ەدىك، بۇل اراعا سولاردىڭ جارتىسى عانا جەتتى.


بۇل ارادا ءۇش جىل ايالدادىق. امەريكالىقتار كەلدى. ەلدەرىنە شاقىردى. اعام سولتانشارىپ كونبەدى. «مۇسىلمان مەملەكەتىنە، قانى ءبىر تۇرىك باۋىرلارىمىزعا بارامىز» دەدى. تۇرىك ەلشىلىگىنە حات جولدادى. ارتىنشا پويىزعا وتىرىپ ارابتىڭ باسر قالاسىنا جەتتىك. وسى ارادان پاروحودقا وتىرىپ تۇرىكتىڭ تۋزلا قالاسىنا دەيىن تۇپ- تۋرا ءبىر اي جۇردىك. بۇل اراعا جەتكەسىن شەشەمدى بىردەن اۋرۋحاناعا جاتقىزدى. قاتەرلى ىسىككە شالدىعىپتى. شوشىپ كەتتىم. ول كەزدە 10 جاسار بالا ەدىم. 1954 -جىلعا اياق باسقانبىز.


«اللاعا سەنىڭدەر»

- تۇركيا پانالاتتى. باۋىرىنا باستى. بىزگە ءۇش بولمەلى ءۇي مەن ۇساق مالعا ارنالعان قورانى قوسا بەردى. شەشەم كيىز بەتىن ادەمى ويۋلارمەن ورنەكتەيتىن، مۇنى مالعا، ازىق-تۇلىككە ايىرباس جاسايتىنبىز. بىزبەن ۇزاق اڭگىمەلەسىپ، سىر شەرتىسەتىن ەدى. «اللاعا سەنىڭدەر، قۇلىندارىم! قۇدايعا سەنگەن - قۇستاي ۇشادى، ادامعا سەنگەن - مۇرتتاي ۇشادى» دەۋشى ەدى مارقۇم. وسىنى ۇنەمى قۇلاعىمىزعا قۇيىپ وتىراتىن.

17 جاسىمدا كۇيەۋگە شىعىپ، ستامبۇلعا كەتتىم. ءىنىم قازىر ۆەنادا تۇرادى. ول دا بالالى- شاعالى. نەمەرە، شوبەرە ءسۇيىپ وتىر. ءبىزدى وسى كۇنگە جەتكىزگەن، وت پەن سۋدان امان ساقتاپ قالعان اللاعا ءار كۇنى رازىلىعىمىزدى ايتىپ وتىرامىز.

مەن كۇيەۋگە شىققاسىن ەكى جىلدان سوڭ شەشەم قايتىس بولدى. 40-تان جاڭا اسقان شاعى ەدى. بىزگە سونداي ۇلكەن كورىنەتىن. قۋعىن-سۇرگىن، گيمالايدىڭ ۇسكىرىك ايازى، اشتىق پەن ازاپ شەشەمدى ەرتە قارتايتىپ جىبەردى. قايران شەشەم، قانداي قىزىق كوردىڭ بۇل جالعاندا...».

ءساليمان اجەي اڭگىمەسىن وسى ارادا ءۇزدى.

اۋدارعان، دۋمان بىقاي

دەرەككوز: kaz.365info.kz

2018 -جىل
سوڭعى جاڭالىقتار