الەم ساياتشىلارى بۋرابايدا باق سىناۋدا: باس جۇلدە تەمىر تۇلپار
حالىقارالىق تۋرنيرگە قىتاي، قىرعىزستان، موڭعوليا، ۆەنگريا، رەسەي جانە قازاقستاننان كەلگەن ساياتشىلارمەن ولاردىڭ 41 بۇركىتى، 4 قارشىعاسى جانە 4 سۇڭقارى قاتىستىرىلۋدا.
اتاقتى قۇسبەگى ءماسىپ باتىرحان ۇلى قۇرمەتىنە ۇيىمداستىرىلىپ وتىرعان بۇل جولعى تۋرنيرگە قازاقستان رەسرۋبليكاسى جانە ازيا ەلدەرىنەن بۇركىت، يتەلگى، قارشىعا باپتاۋمەن اينالىساتىن مىقتى قۇسبەگىلەر كەلگەن. تۋرنير بارىسىندا جارىس ەرەجەسى بويىنشا اڭشى قۇستاردىڭ قولعا قوندىرۋ، شىرعا تارتۋ ارقىلى العىرلىقتارى سىنالاتىن بولادى. اقتىق سىنعا شىققاندار قويان، تۇلكى جانە قاسقىرعا الۋعا سالىنادى.
« شارانىڭ ماقساتى مەملەكەت باسشىسى ن. ءا. نازاربايەۆتىڭ « بولشاققا باعدار: رۋحاني جاڭعىرۋ» ماقالاسىندا ايتىلعان حالقىمىزدىڭ سالت- ءداستۇرىن جاڭعىرتىپ، ناسيحاتتاۋعا باعىتتالعان» ، - دەدى ءتۋرنيردىڭ اشىلۋىندا ءسوز سويلەگەن اقمولا وبلىستىق تۋريزم باسقارماسىنىڭ باسشىسى شىناربەك بۇركىتبايەۆ.
ەسكە سالا كەتەيىك، ءماسىپ باتىرحان ۇلى سوناۋ 30- جىلدارى قۇس سالىپ، اڭ اۋلاپ، اۋىلداستارىن اشتىقتان امان الىپ قالىپتى. ال ۇلى وتان سوعىسى جىلدارى ءوزىنىڭ ادال كومەكشىسىنىڭ كومەگىمەن اۋلانعان اڭداردىڭ باعالى تەرىلەرىن رەسەيگە وتكىزىپ، سودان تۇسكەن قارجىنى مايدانعا قاجەتتى وق- ءدارى ساتىپ الۋعا جۇمساعان ەكەن. اقمولا وبلىسىندا جىل سايىن ءماسىپ باتىرحان ۇلى قۇرمەتىنە ساياتشىلاردىڭ « قانسونار» رەسپۋبليكالىق ءتۋرنيرى ۇيىمداستىرىلىپ كەلەدى. بيىل بۇل تۋرنير حالىقارالىق دەڭگەيگە يە بولىپ ءارى بۋرابايدا وتكىزىلىپ وتىر. جارىس ەكى كۇنگە جالعاسادى. ءتۋرنيردىڭ باس جۇلدەسى رەتىندە اۆتوكولىك تىگىلىپ وتىر.
ا
ۆتور: اسلان وسپانوۆ