اقتوبەدە «وق وتپەيتىن» اينەگى بار ايالداما ورناتۋ جۇمىسى اياقتالماي جاتىر

  اقتوبە. قازاقپارات - اقتوبە قالاسىنداعى ايالدامالارعا بروندالعان اينەكتەر سالىنىپ جاتىر. قالا اكىمى ءىلياس يسپانوۆ بۇل ارنايى تاپسىرىسپەن جاسالعان ايالداما ەكەنىن ايتتى، دەپ حابارلايدى قازاقپارات ءتىلشىسى.

 اقتوبە قالاسىندا 500 گە جۋىق ايالداما بار. ونىڭ تەڭ جارتىسىنا ايالداما پاۆيلونى قويىلعان، وزگەسىندە ادامدار جول جيەگىندە تۇرادى. قازىرگى كەزدە اقتوبە قالاسىنىڭ باستى داڭعىلدارىندا ايالداما سالۋ جۇمىسى ءجۇرىپ جاتىر. ول ءۇشىن ايالداما پاۆيلونىنىڭ ءبىر بۇرىشىن ساۋدا ورنىنا اينالدىرعانداردى جويىپ، جاڭاسىن قوندىرۋ قاراستىرىلعان. وتكەن جىلى 34 ايالداما سالىنىپ، ونىڭ 12 سى بيۋدجەت قارجىسىنا تۇرعىزىلدى. ال وزگەسى بيزنەستىڭ الەۋمەتتىك جاۋاپكەرشىلىگى اياسىندا سالىنۋدا. كاسىپكەرلەر ايالداما پاۆيلونىن قوندىرۋ تۋرالى ۇسىنىستى وزدەرى ايتادى.

«قازىرگى ايالداما جەلدەن، كۇننەن، جاڭبىردان ساقتامايدى دەپ ايتادى. بۇل سىن دۇرىس. ءبىراق ايالدامادا ادامدار ۇزاق تۇرمايدى. سول باعىتتا جۇمىس ىستەپ، قوعامدىق كولىكتەردىڭ ارا قاشىقتىعىن قالپىنا كەلتىرىپ جاتىرمىز. مۇنداي ايالدامالار استانا قالاسىندا بار. استانانىڭ اۋا رايى بىزدەن سالقىن. بۇل ايالداما قالانىڭ ءبىر اتريبۋتى، ديزاينعا ساي كەلەدى. قالالىق كەڭەستە قارالدى، ماقۇلداندى. جىل باسىندا مەملەكەتتىك ساتىپ الۋ جۇرگىزىلدى. جەڭىمپاز كومپانيا قىركۇيەك ايىنا دەيىن ءوز مىندەتتەرىن ورىنداماعان سوڭ سوتقا شاعىمداندىق» ، - دەدى اقتوبە قالاسىنىڭ اكىمى ءىلياس يسپانوۆ.

 ايتا كەتەيىك، ەندى «تابىس اقتوبە» ج ش س ارقىلى 19 ايالداما ساتىپ الىنادى. ونىڭ ۇشەۋى ۇلكەن. بۇل ايالداما پاۆيلوندارى ادامدار كوپ شوعىرلاناتىن ورىندارعا قويىلادى. «دونەر، سامسا ساتقان ايالداما پاۆيلوندارى جويىلادى. ءبارى جول- كولىك ەرەجەسىنە سايى بولۋى كەرەك. مەملەكەتتىك ساتىپ الۋدى ۇتىپ العان كاسىپكەر ءۇش رەت ءبىز قويعان تالاپقا ساي كەلمەيتىن ايالداما پاۆيلونىن اكەلدى. تالاپ بويىنشا بروندالعان اينەك قوندىرىلعان. قوعامدىق ورىنداعى اينەك سىنعان كەزدە ادامداردى زاقىمدامايدى. ايالداما جارىقتاندىرىلادى، شامى تۇندە جانىپ تۇرادى. ءبىز ءار ايالدامانى سالۋعا 1,5 ميلليون تەڭگە بەكىتكەن بولاتىنبىز. ولار 1,1 ميلليون تەڭگە ۇسىندى. قويعان تالاپقا ساي كەلمەي جاز بويى ايالدامالار سالىنبادى» ، - دەدى ءىلياس يسپانوۆ.

ەسكە سالساق، بۇعان دەيىن جەرگىلىكتى اكىمدىك USB پورتى بار ايالدامانىڭ ءارقايسىسىن 1,6 ميلليون تەڭگەگە ساتىپ العان بولاتىن. بۇل ايالدامالار قازىر ىستەن شىعىپ، باسقا اۋداندارعا كوشىرىلىپ جاتىر. جالپى اقتوبەنىڭ ءابىلقايىر حان مەن ءاليا مولداعۇلوۆا داڭعىلىنا قالالىق كەڭەستە بەكىتىلگەن 54 ايالداما ورناتىلادى.

 

اۆتور: التىناي ساعىندىقوۆا