ەلدەگى استىقتىڭ - تورتتەن ءبىرى، التىننىڭ ۇشتەن ءبىرى اقمولا وبلىسىندا وندىرىلەدى

استانا. قازاقپارات - قازاقستاندا جينالاتىن استىقتىڭ - تورتتەن ءبىرىن، قازىلاتىن التىننىڭ ۇشتەن ءبىرىن اقمولا وبلىسى وندىرەدى.

بۇل تۋرالى ورتالىق كوممۋنيكاتسيالار قىزمەتىندە اقمولا وبلىسىنىڭ الەۋمەتتىك-ەكونوميكالىق دامۋى تۋراسىندا بايانداعان ءوڭىر اكىمى مالىك مىرزالين ايتىپ بەردى، دەپ حابارلايدى «قازاقپارات» ح ا ا ءتىلشىسى.

وبلىس باسشىسىنىڭ ايتۋىنشا، جالپى ىشكى ءونىم بويىنشا وڭىرلىك قۇرىلىمدا ونەركاسىپ سەكتورىنىڭ ۇلەسى - %25، اۋىل شارۋاشىلىعىنىڭ ۇلەسى %15 قۇراپ وتىر.

«جالپى رەسپۋبليكا بويىنشا ەسەپتەگەندە اقمولا وبلىسى رەسپۋبليكا كولەمىندە ساپالى ازىق-تۇلىك استىعىنىڭ تورتتەن ءبىرىن وندىرەدى. بۇل استىقتى ءوڭىرىمىز ەكسپورتقا دا شىعارىپ وتىر. يندۋستريالاندىرۋ باعدارلاماسىنىڭ ارقاسىندا وبلىس التىن ءوندىرىسىن ءتورت ەسە ۇلعايتىپ، رەسپۋبليكا كولەمىندەگى جالپى التىن ءوندىرىسىنىڭ ۇلەسى %34 جەتتى. جۇك كولىگى ءوندىرىسىنىڭ جارتىسىنان استامى (%55)، كىرپىشتىڭ - %30، ۇننىڭ %10 اقمولا وڭىرىنە تيەسىلى. قازاقستانداعى ۋران قورىنىڭ شامامەن %10 ءبىزدىڭ ايماقتا شوعىرلانعانىن اتاپ وتكىم كەلەدى»، - دەيدى مالىك مىرزالين.

ت م د- دا تەمىرجول كولىگى ءۇشىن مويىنتىرەكتى (ماشينانىڭ قوزعالمايتىن بولشەگىندەگى بىلىكتىڭ مويىنى) شىعاراتىن جالعىز كاسىپورىن اقمولا وبلىسىندا ورنالاسقان. مالىك مىرزاليننىڭ سوزىنە سەنسەك، ىشكى سۇرانىستان بولەك، وندىرىلگەن مويىنتىرەكتەردىڭ %80 رەسەي فەدەراتسياسىنا جەتكىزىلەدى.