جاقىپ اسانوۆ: قۇقىق قورعاۋ ورگاندارىنا جاڭا بيلىك پەن قۇزىرەت بەرىلمەيدى

استانا. قازاقپارات - بۇگىن ءماجىلىستىڭ جالپى وتىرىسىندا ق ر باس پروكۋرورى جاقىپ اسانوۆ قىلمىستى تەرگەۋ شارالارىنا قاتىستى مەملەكەت باسشىسى جۇكتەگەن تاپسىرمالار تۋرالى ايتىپ بەردى، دەپ حابارلايدى قازاقپارات.

«ءار مەملەكەت ءوزىنىڭ ىشكى جاعدايىنا قاراپ، تارازىلاپ، كەزەڭ-كەزەڭمەن زاڭناماعا وزگەرىستەر ەنگىزىپ تۇرادى. بۇگىنگى زاڭ جوباسى سونداي كەزەكتى قادام بولىپ وتىر. ونىڭ باستى ەرەكشەلىگى بار، ياعني ەلباسى ءبىزدىڭ الدىمىزعا ءۇش ماقساتتى قويدى.

بىرىنشىدەن، قىلمىستىق-پروتسەستىك كودەكسكە قاراپايىم ادامنىڭ كوزىمەن قاراڭدار دەدى.

ەكىنشىدەن، بىزدە قىلمىستىق پروتسەسس مەملەكەت ءۇشىن وتە قىمبات، ياعني تەرگەۋشىلەر، پروكۋرورلار، سوتتار، مىڭداعان ساراپتامالار قامتىلعان، سونداي-اق اتقارۋ مەرزىمى تىم ۇزاق ءارى كۇردەلى. پرەزيدەنت وسىعان ۇنەمدەۋ تۇرعىسىنان قاراۋدى جانە ادامنىڭ قۇقىعى بۇزىلمايتىنداي ءتيىستى قادامداردى ەسكەرۋدى جۇكتەدى.

ۇشىنشىدەن، بۇل زاڭ جوباسىمەن قۇقىق قورعاۋ ورگاندارىن كۇشەيتپەيمىز. ولارعا ەشبىر جاڭا بيلىك پەن قۇزىرەت بەرمەيمىز، كەرىسىنشە موينىمىزعا مىندەت الامىز ءارى جاۋاپكەرشىلىگىمىزدى ارتتىرامىز»، - دەپ ءتۇسىندىردى باس پروكۋرور قازاقستان رەسپۋبليكاسىنىڭ كەيبىر زاڭنامالىق اكتىلەرىنە قۇقىق قورعاۋ قىزمەتىنىڭ پروتسەستىك نەگىزدەرىن جاڭعىرتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بويىنشا بايانداماسىندا.

وسى ورايدا جاقىپ اسانوۆ تالقىلانىپ وتىرعان قۇجاتتىڭ مازمۇنى ەكىگە بولىنگەنىن، ءبىرىنشىسى ادامنىڭ قۇقىعىن كۇشەيتۋگە باعىتتالسا، ەكىنشى بولىگى ۇنەمدەۋ شارالارىن قامتىپ وتىرعاندىعىن اتاپ ءوتتى.

«مىسالى، قازىر تەرگەۋ ادامدى سوتتان سانكسيا الماي 72 ساعاتقا قاماۋعا قۇقىلى. ءبىز وسىنى زەرتتەپ كوردىك. بۇل رەتتە 48 ساعاتتا ۇلگەرۋگە مۇمكىندىك بار ەكەنىن انىقتادىق. ال ەگەر كۇدىكتى 18 جاسقا تولماسا، وندا 24 ساعات جەتكىلىكتى بولادى ەكەن. سوندىقتان ءبىز 72-دەن 48 ساعاتقا دەيىن ازايتۋدى ۇسىنىپ وتىرمىز. بۇل تەك ۋاقىتتى ازايتۋ عانا ەمەس، بۇنىڭ ارتىندا ۇلكەن ماعىنا جاتىر. سونىمەن قاتار تەرگەۋ بويىنشا قۇقىق قورعاۋ ورگاندارى جۇمىستارىن جىلدامداتادى.

بىرىنشىدەن، وسى 48 ساعاتتىڭ ىشىندە تەرگەۋشى بارلىق دالەلدى جيناپ، پروكۋرورعا بارىپ، ءتۇسىندىرۋى ءتيىس. پروكۋروردىڭ كوزى جەتسە، سوتقا جۇگىنىپ، سوتتىڭ شەشىمى شىعادى. وسىنىڭ بارلىعى 48 ساعاتتىڭ ىشىندە بولۋى كەرەك. ال ۇلگەرمەسە، ۋاقىتشا ۇستاۋ وقشاۋلاعىشتىڭ باسشىسى ادامدى بوساتۋى ءتيىس. ەگەر شىعارماسا، ءوزى سوتتالادى. وسىنداي نورمانى ۇسىنىپ وتىرمىز»، - دەدى باس پروكۋرور.

دەگەنمەن دە 72 ساعاتتىق مەرزىم كەيبىر قىلمىستار ءۇشىن ساقتالاتىن بولادى.

ەستەرىڭىزگە سالا كەتەيىك، بيىل قازان ايىندا مەملەكەت باسشىسى كونستيتۋتسيانىڭ 61-بابىنىڭ 1-تارماعىنا سايكەس پارلامەنت ءماجىلىسىنىڭ قاراۋىنا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قۇقىق قورعاۋ قىزمەتىنىڭ پروتسەستىك نەگىزدەرىن جاڭعىرتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەنگىزدى.

اۆتور: رۋسلان عابباسوۆ