قياردى برەندكە اينالدىرعان اۋىل

None
None
استانا. قازاقپارات - وبلىس ورتالىعىنا قارايتىن پاۆلودار اۋىلىنىڭ حالقى جىلىجايدا وسىرگەن كوكونىس، باۋ- باقشا ونىمدەرىمەن وزدەرىن دە، وزگە اۋىلداردى، قالانى دا قامتاماسىز ەتۋدە.

اۋىل ماڭىندا يگەرىلمەي جاتقان 60 گەكتار جەر كوكونىس ءوسۋىرۋشى تۇرعىندارعا بەرىلگەن. اۋىل اكىمى اجدار ءجۇسىپوۆتىڭ ايتۋىنشا، 1 وتباسىنا 1 گەكتار تيەسىلى، ول ازدىق ەتسە جالعا بەرىلەتىن جەر كولەمى ۇلعايتىلادى.

تۇرعىندار اۋلالارىنا جىلىجاي جاساپ العان. اۋىلداعى 370 جىلىجايدا قيار وسىرىلەدى. گۇل ەگۋدى، باسقا دا كوكونىس تۇرلەرىن ءوسىرۋدى قولعا العان تۇرعىندار دا بار.

-  كوكونىس ءوسىرۋدىڭ ەڭ ءتيىمدى جولى - جىلىجاي شارۋاشىلىعىن دامىتۋ، ويتكەنى سۇرانىس جوعارى. سوندىقتان شاعىن عانا جىلىجايدىڭ ونىمدەرىن ساتىپ تاپقان تابىس ءبىر وتباسىن اسىراۋعا جەتەدى، -  دەيدى جەرگىلىكتى كاسىپكەر وكسانا ۆورونينا.

اۋىلدا ۇلكەندى- كىشىلى 600 جىلىجاي، 47 جەكە كاسىپكەرلىك نىسانى جۇمىس جاسايدى.  ولاردىڭ قاتارىندا 24 دۇكەن، ءدارىحانا، ءتىس ەمحاناسى بار. بۇگىندە تىگىن تسەحى مەن جەكەمەنشىك بالاباقشا اشۋعا نيەتتەنىپ وتىرعاندار جەتكىلىكتى. رۇستەم قۇسانوۆتىڭ «قۇسانوۆ»  جەكە شارۋاشىلىعى باسقالارعا ۇلگى بولارلىقتاي. شارۋاشىلىق 7 جىلدان بەرى قيار، قىزاناق ءوسىرىپ، قولجەتىمدى باعامەن ساۋدالايدى. جىلىجاي سالىپ، ۇڭعىما قازىپ، سۋارۋ جۇيەسىن قۇرۋ ءۇشىن 7 ميلليون تەڭگەدەي قارجى جۇمسالعان.

اۋىلدىقتارعا دا جۇمىس بار، «قۇسانوۆ» جىلىجايىندا ەڭبەك ەتەدى. شارۋاشىلىقتىڭ 6 گەكتار جەرىنىڭ، 2 گەكتارىنا -  قىرىققابات، 1,5 گەكتارىنا -  قىزاناق، 1,5 گەكتارعا قيار ەگىلەدى. بيىل قاربىز وسىرە باستادى. كەلەر جىلى گوللاند جۇگەرىسىن وسىرمەكشى. شارۋاشىلىق تامشىلاتىپ سۋارۋ ءادىسىن قولدانادى. ال جىلىجاي شارۋاشىلىعىن دامىتۋ ءۇشىن كاسىپكەر رۋسلان تۇرسىنحانوۆ بولسا شەتەلدىك يننوۆاتسيالارعا نازار اۋدارىپتى.

ەندى كۇن ەنەرگياسى جانە جەل گەنەراتورلارىنىڭ قۋاتى ارقىلى جىلىجايىنىڭ جۇمىسىن جۇرگىزبەكشى. سولتۇستىكتىڭ قاقاعان سۋىعىنا قاراماي- اق، قيار، قىزاناق ءوسىرۋدىڭ يننوۆاتسيالىق يدەياسى بار كورىنەدى. اۋىل اكىمىنىڭ ايتۋىنشا، اۋىلدا «ەكسپو» دەپ اتالاتىن بازار اشىلدى. جەرگىلىكتى حالىق ەندى ونىمدەرىن وسى بازاردا ساتا الادى. كوكونىس وسىرۋشىلەردىڭ ونىمدەرىن وتكىزۋگە وسىلاي جاعداي جاسالىپ وتىر.

بۇرىنعىداي وبلىس ورتالىعىنداعى بازارلارعا وتكىزىپ اۋرەلەنبەيدى. كاسىپكەر وكسانا ۆورونينانىڭ جىلىجايىندا قياردىڭ «ماشا»، «گەرمان»، «لينارا» دەپ اتالاتىن تۇرلەرى بار. ال جالپى، جىلىجايلاردا قياردىڭ 15 ءتۇرلى سورتى وسىرىلەدى ەكەن. اۋىلداعى 600 جىلىجايدان ماۋسىم سايىن 278 توننا ءونىم جينالادى.

-  قيار ءبىزدىڭ اۋىلدىڭ برەندى. ەكولوگيالىق تازا ءونىم. ءبىزدىڭ قيار ءدامدى، -  دەيدى اۋىل حالقى.

فاريدا بىقاي، «ەگەمەن قازاقستان»

 

 

سوڭعى جاڭالىقتار