قازاقستان حالقىنىڭ تابيعي ءوسىمى كەمىپ بارادى
بۇل تۋرالى قازاقپارات ق ر ۇلتتىق ەكونوميكا مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.
«2017-جىلعى 1- قازاندا ەلىمىزدەگى حالىق سانى 18096,9 مىڭ ادامدى قۇرادى. ونىڭ ىشىندە قالالىقتار - 10383,3 مىڭ (%57,4)، اۋىلدىقتار - 7713,6 مىڭ ادام (%42,6). 2016-جىلعى 1- قازانمەن سالىستىرعاندا حالىق سانى 231,3 مىڭ ادامعا نەمەسە %1,3 ءوستى»، - دەلىنگەن ۆەدومستۆو اقپاراتىندا.
ا ح ا ت ورگاندارى ۇسىنعان ازاماتتىق حال اكتىلەرى جازبالارىنداعى مالىمەتتەردى وڭدەۋ ناتيجەسىندە 2017-جىلعى قاڭتار-قىركۇيەكتە دۇنيەگە كەلگەندەر سانى 293,3 مىڭ ادامدى قۇراعان. بۇل 2016-جىلعى قاڭتار-قىركۇيەككە قاراعاندا 6,2 پايىز از.
2017-جىلعى قاڭتار-قىركۇيەكتە رەسپۋبليكا حالقىنىڭ تابيعي ءوسىمى 2016-جىلعى قاڭتار-قىركۇيەكپەن سالىستىرعاندا 18 مىڭ ادامعا نەمەسە 8,5 پايىزعا كەمىپ، 194,9 مىڭ ادامدى قۇرادى.
قاراستىرىلىپ وتىرعان كەزەڭ ىشىندە 98,4 مىڭ ادام ومىردەن وزعان. بۇل 2016-جىلعى قاڭتار-قىركۇيەككە قاراعاندا 1,3 پايىزعا از. 2017-جىلعى قاڭتار-قىركۇيەكتە رەسپۋبليكادا 1 جاسقا دەيىنگى 2386 نارەستە ءولىمى تىركەلدى.
2016-جىلعى قاڭتار-قىركۇيەكپەن سالىستىرعاندا، 1 جاسقا دەيىنگى شەتىنەگەن نارەستە سانى 13 پايىزعا كەمىدى. نارەستە ءولىم-ءجىتىمىنىڭ نەگىزگى سەبەبى - پەريناتالدىق كەزەڭدە پايدا بولاتىن جاعدايلار.
ودان 2017- جىلعى قاڭتار-قىركۇيەكتە 1195 نارەستە قايتىس بولىپ، نارەستەلەر اراسىنداعى جالپى ءولىم سانىنىڭ 50,1 پايىزىن قۇرادى. تۋا بىتكەن اۋىتقۋلاردان 574، تىنىس ورگاندارى اۋرۋلارىنان - 151 جانە جازاتايىم جاعدايدان، ۋلانۋدان جانە جاراقاتتان - 129 نارەستە قايتىس بولدى.
اۆتور: مارلان جيەمباي