وڭتۇستىك قازاقستاندا «كوكجالدار» فيلمىنىڭ تۇساۋى كەسىلدى - فوتو
تانىمال رەجيسسەر ەركىن راقىشەۆتىڭ تۋىندىسى قاسقىردىڭ بالانى قولعا ءتۇسىرۋ كەزىندەگى ءتۇرلى شىتىرمان وقيعالاردان قۇرالعان، دەپ حابارلايدى قازاقپارات ءتىلشىسى.
وبلىستىق مادەنيەت باسقارماسى مەن وڭتۇستىك قازاقستان مەملەكەتتىك ۋنيۆەرسيتەتىنىڭ ۇيىمداستىرۋىمەن وتكەن شارادا تولىق مەتراجدى فيلم تۋرالى كەڭىنەن ايتىلدى. ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىندا كورسەتىلگەن تاريحتى ءبىلۋ جانە تەكتى تانۋ، ۇلتتىق كودتى تابۋ ماسەلەسى وسى تۋىندىنىڭ وزەكتى ارقاۋىنا اينالعان.
فيلمنىڭ باستى ماقساتى دا اڭىز- اڭگىمەلەرگە سۇيەنە وتىرىپ، كوكبورىگە تەلىنەتىن قازاق بولمىسىن سيپاتتاۋ بولىپ تابىلادى. سونىمەن قاتار قاسقىردىڭ تەكتى مىنەزىن نەگىزگە الا وتىرىپ، ۇلتتىڭ بويىندا جوعالىپ بارا جاتقان اسىل قاسيەتتەر مەن ادامي قۇندىلىقتاردى جاس ۇرپاقتىڭ ساناسىنا ءسىڭىرۋ، نامىسىن وياتۋ، رۋحىن كوتەرۋ ەكەنى ءسوز بولدى.
ايتا كەتەيىك، فيلم اڭشىنىڭ قاسقىردىڭ ارلانىن اتىپ الۋ ساتىنەن باستاۋ الادى. ءتىرى قالعان ەكىنشى ءبورىنىڭ كەك الۋ جولىندا اڭشىنىڭ ءۇش ايلىق بالاسىن ۇرلاپ كەتۋى جانە اسىراپ، وسىرۋىمەن جالعاسىن تابادى. اقسۋ- جاباعىلى قورىعىندا تۇسىرىلگەن فيلمدە قاسقىرلارمەن بىرگە جۇرگەن ادام تەكتەس ماقۇلىقتى ۇستاۋ ساتتەرى دە كورىنىس تاپقان. باستى رولدەردى جاندوس يسايەۆ، ەرجان جارىلقاسىنوۆ، اراي ءومىروۆا سومدايدى.
ال، سەناريىن رامازان قۇرمانبايەۆ پەن ەركىن راقىشەۆ جازعان. كينونى العاشقى رەت وڭتۇستىكتەگى كورەرمەندەر تاماشالاسا، الداعى كەزدە ونىڭ كورسەتىلىمى الماتى، استانا، پاۆلودار، سەمەي، وسكەمەن، اقتاۋ، اتىراۋ، تاراز قالالارىندا دا وتەدى دەپ جوسپارلانىپ وتىر.