اباي سۋرەتىنىڭ تاريحى
سولدان وڭعا قاراي: ءبىرىنشى قاتاردا بورىك كيىپ وتىرعان قىز بالا - پاكيزات. پاكيزاتتىڭ باسىنا كيىپ وتىرعان بوركى بۇل كۇندە جيدەبايداعى اباي مۋزەي- ۇيىندە ەكسپوزيتسيادا تۇر. ودان كەيىنگى وتىرعاندار - تۇراعۇل مەن اۋباكىر. پاكيزات پەن اۋباكىر ەكەۋى دە اقىلبايدىڭ بالالارى.
ابايدىڭ كەنجە ءىنىسى وسپان وزىندە بالا بولماعاندىقتان بۇل ەكەۋىن دە باۋىرىنا سالىپ العان. ەكىنشى قاتارداعىلار - اباي، ەركەجان جانە قاماليا. قاماليا - اۋباكىردىڭ ايەلى. بۇل كىسىنىڭ اباي تۋرالى ايتقان ەستەلىكتەرى مۇراجاي قورىندا ساقتاۋلى تۇر. ال ەركەجان - وسپاننىڭ بايبىشەسى. ونى وسپان قايتىس بولعاننان كەيىن، امەڭگەرلىك جولمەن 1894 -جىلى اباي ءوزى الىپ، ءومىرىنىڭ سوڭعى ون جىلىن جيدەبايدا وسى ەركەجانمەن بىرگە وتكىزگەن.
ءۇشىنشى قاتاردا تۇرعان - ماعاۋيا. فوتوسۋرەتتى ءتۇپنۇسقادان 1959 -جىلى قايتا كوشىرىپ، اباي مۋزەيىنە وتكىزگەن - جازۋشى مۇحتار اۋەزوۆ. ال ءتۇپنۇسقاسى الماتىداعى م. اۋەزوۆ مۋزەيىندە ساقتالعان. سۋرەتتىڭ كولەمى - 13x23 س م، قور كىتابىندا 461/542 ينۆەنتارعا تىركەۋلى تۇر. بۇل فوتوسۋرەت كوپتەگەن باسىلىمدارعا شىعىپ، تانىمال بولدى. قازىردىڭ وزىندە سۋرەتتىڭ كوشىرمەسى قازاقستان رەسپۋبليكاسى ۇلتتىق مۋزەيىنىڭ «قازاقستان تاريحى» زالىنىڭ «ⅩⅨعاسىرداعى ۇلىلار» ەكسپوزيتسياسىندا كورمەدە تۇر.
قايىرجان كۇزەمبايەۆ، ۇلتتىق مۋزەيدىڭ عىلىمي قىزمەتكەرى