+7 (701) 759 90 19
15 °С : نۇر-سۇلتان
21 °С : الماتى
USD 412.55 EUR 468.66
RUB 5.79 CNY 58.80
جاڭالىقتار

قوجا «مەنىڭ اتىم قوجا» فيلمىنە تۇسۋگە زورعا كونگەن

3 شىلدە 21:04
:ءبولىسۋ
قوجا «مەنىڭ اتىم قوجا» فيلمىنە تۇسۋگە زورعا كونگەن

نۇر-سۇلتان. قازاقپارات - كينورەجيسسەر تۇرار دۇيسەبايەۆتىڭ ايتۋىنشا، قوجا ءرولىن سومداعان نۇرلان سانجاردى «مەنىڭ اتىم قوجا» فيلمىنە تۇسۋگە ارەڭ كوندىرگەن.

بۇل تۋرالى kazakh-tv حابارلايدى.

«بۇل 1963 -جىل بولاتىن. مەن تاشكەنتتە جوعارى وقۋ ورنىن ءبىتىرىپ، «قازاق فيلم» كينوستۋدياسىندا رەجيسسەر- دوكۋمەنتاليست بولىپ جۇمىس ىستەپ جۇرگەنمىن. مۇحتار اۋەزوۆ تۋرالى تۇڭعىش دەرەكتى فيلم تۇسىرىلەتىن بولىپ، سونىڭ جۇمىسىمەن سەمەي وبلىسىنا جول ءجۇرىپ كەتكەن كەزىم ەدى. كينوستۋديادان «شۇعىل الماتىعا جەت» دەگەن حابار كەلدى. الىپ-ۇشىپ جەتسەم، رەجيسسەر ابدوللا قارساقبايەۆ جازۋشى بەردىبەك سوقپاقبايەۆتىڭ پوۆەسى نەگىزىندە جازىلعان سەناريدى ۇناتىپ، فيلم تۇسىرۋگە نيەتتەنىپ وتىر ەكەن»، - دەيدى تۇرار دۇيسەبايەۆ.

ماعان «ەكىنشى رەجيسسەر بول» دەدى. الدىمەن سەناريدى وقىپ شىقتىم. ۇناعانى سونداي، بىردەن كەلىستىم. شىعارمانىڭ تاقىرىبى مەن سيۋجەتى، بالالار الەمىن ءوز تىلدەرىندە شەبەر جەتكىزۋى مەن ونداعى شيەلەنىسكەن قىم-قۋىت وقيعالار جەلىسىنەن بۇل فيلمنىڭ ومىرشەڭ تۋىندىعا اينالاتىنى اڭعارىلىپ تۇر ەدى. تەك جاقسىلاپ ءتۇسىرۋ كەرەك.

ەندىگى شارۋا - اكتەر ىرىكتەۋگە قۇلشىنا كىرىسىپ كەتتىك. بالا قوجا مەن سۇلتاننان باسقا كەيىپكەرلەردى تابۋ قيىنعا تۇسكەن جوق. ال قوجا... ونىڭ مىنەزىن ءبىرقالىپتى دەۋ قيىنداۋ، ويناقى، سوتقار ءارى اقىلدى تەنتەك بولۋى ءتيىس ەدى. ونداي بالانى تابۋ وڭاي بولمادى. الماتى، جامبىل وبلىستارى، بىشكەك قالاسىنداعى مەكتەپتەردى ارالاپ، كاستينگ وتكىزدىك، ناتيجە جوق. رەجيسسەرلەر نەگىزىنەن، پسيحولوگ بولىپ كەلەدى عوي. بالانىڭ قابىلەتىن كوزىنەن كورە بىلەدى. بىردە قىزمەتتەسىم، فيلمنىڭ باس وپەراتورى ميحايل ارانىشەۆ ەكەۋمىز كينوستۋدياعا قارسى بەتتەگى ءدامحاناعا بارا جاتتىق. الدىمىزدان ەكى وقۋشى قىز جۇگىرىپ ءوتتى (جانىمىزدا №33 -ورىس مەكتەبى ورنالاسقان ەدى). ولاردىڭ سوڭىنان ءبىر ۇل بالا قۋىپ كەلەدى ەكەن. كوزىمە وتتاي باسىلدى. الگى بالا... كوزىندە ءبىر ۇشقىن بارداي كورىنگەنى. ىشىمنەن «جەر-كوكتەن ىزدەگەن قوجامىز - وسى» دەپ ءتۇيدىم.

ەكەۋلەپ ءجۇرىپ شاپ بەرىپ ۇستاپ الدىق. «جىبەر، جىبەر مەنى» دەپ قويار ەمەس. «مەن رەجيسسەرمىن، كينوعا تۇسەتىن بالا ىزدەپ ءجۇر ەدىم، سەنىڭ ءتۇر-كەلبەتىڭ سونىڭ رولىنە لايىق ەكەن، اتىڭ كىم ءوزىڭنىڭ؟» دەپ ءجونىمىزدى ايتتىق. «نە نادو، يا نە حوچۋ سنيماتسيا ۆ كينو»(كەرەك ەمەس، كينوعا تۇسكىم كەلمەيدى - رەد.) دەپ ازار دا بەزەر. اتى مەن مەكەنجايىن سۇراپ، قانشا الەكتەنسەك تە ايتپاي قويدى. قىرسىق ەكەن ءوزى. الگىندە قاشىپ بارا جاتقان قىزدار بىزگە تاڭدانا قاراپ تۇر ەكەن. اتى-ءجونى نۇرلان سەگىزبايەۆ ەكەنىن، اكەسىنىڭ قىزمەت ورنىن سول قىزدار ايتىپ بەردى. تەز ارادا حابارلاستىق. اكەسى مينيسترلەر كابينەتىندە جۇمىس ىستەيتىن قارتاڭ كىسى ەكەن.

«وي، بالام كونبەيدى، وتە بۇزىق، ودان كورشىلەر دە، مۇعالىمدەر دە ابدەن زارەزاپ بولىپ بىتكەن، بەكەر ۇياتقا قالدىرىپ جۇرەر مەنى، قويىڭدار» دەپ بولار ەمەس. مەكەنجايىن سۇراپ الىپ، كەشكىسىن ۇيىنە باردىق. بالا پەردەنىڭ ار جاعىنان جىلتىڭ-جىلتىڭ ەتىپ، ءبىز جاققا سىعالاپ قاراپ ءجۇر. كەنجە بالاسى بولعان سوڭ، تىم ەركەلەتىپ جىبەرگەن ەكەن. اتا-اناسى «ءوزىڭىز ءبىلىڭىز، ۇياتقا قالدىرسا، ءبىزدى كىنالاماڭىز» دەگەندەي ىڭعاي ءبىلدىردى. اقىرى وتباسىن كوندىرىپ، كينوپروباعا شاقىردىق.



:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات