قازاقستان مەن تۇرىكمەن پرەزيدەنتتەرى ەكىجاقتى كەزدەسۋ وتكىزدى

اشحابات. قازاقپارات - بۇگىن اشحابات اۋەجايىنا كەلىپ قونعان ق ر پرەزيدەنتى نۇرسۇلتان نازاربايەۆتىڭ ۇشاعىن تۇرىكمەنستان پرەزيدەنتى عۇربانع ۇلى بەردىمۇحامەدوۆ قارسى الدى.

قارسى الۋ راسىمىنەن كەيىن ەكى ەلدىڭ مەملەكەت باسشىلارى ەكىجاقتى كەزدەسۋ وتكىزدى، دەپ حابارلايدى قازاقپاراتتىڭ ارناۋلى ءتىلشىسى اشحاباتتان.

«وسىنداي كەزدە قولداۋ كورسەتۋ ءبىزدىڭ كورشىلىك، باۋىرلاستىق پارىزىمىز دەپ بىلەمىن. ءسىزدى جابىق عيماراتتاعى ازيا ويىندارىنىڭ اشىلۋىمەن قۇتتىقتايمىن. كوپتەگەن سپورتتىق نىساندار سالىندى. ولاردىڭ بارلىعى دا حالىققا، قالاعا قالادى. سونىمەن قاتار مۇنداي شارالار تۇركىمەنستاندى، ونىڭ استاناسىن جاقىن تاني تۇسۋگە، مەملەكەتتىڭ تاۋەلسىزدىك جىلدارى ىشىندەگى جەتىستىكتەرىن الەمگە كەڭىنەن پاش ەتۋگە مۇمكىندىك بەرەدى»، - دەدى قازاقستان پرەزيدەنتى.

سونىمەن قاتار مەملەكەت باسشىسى قازاق ەلى قىسقى ازيادا ويىندارى، بۇكىلالەمدىك سۋدەنتتەر ۋنيۆەرسياداسى سىندى الەمدىك دەڭگەيدەگى سپورتتىق شارالاردى لايىقتى دەڭگەيدە وتكىزگەنىن باسا ايتتى.

«تاياۋدا عانا ەكسپو اياقتالدى. ءبىزدىڭ وڭىرىمىزدە مۇنداي وقيعالاردىڭ ءوتۋى وتە ماڭىزدى. ال بۇگىن ازيا ويىندارىنىڭ اشىلۋىنا زور ريزاشىلىقپەن قاتىساتىن بولامىز. ءبىزدىڭ قارىم- قاتىناستارىمىزعا قاتىستى ايتار بولسام، ءسىزدىڭ ساپارىڭىزدان كەيىن كوپ دۇنيە جاسالدى. مەنىڭشە، ەكونوميكالىق ىقتىماقتاستىعىمىز قارقىن الادى»، - دەدى ق ر پرەزيدەنتى.

نۇرسۇلتان نازاربايەۆ وزبەكستانعا مەملەكەتتىك ساپارمەن بارىپ كەلە جاتقاندىعىن، جۇرگىزىلگەن كەلىسسوزدەر بارىسىندا كوپتەگەن ماسەلەلەردىڭ شەشىلگەندىگىن اتاپ ءوتتى.

«ءبىزدىڭ جابىق عيماراتتا وتەتىن جانە جاۋىنگەرلىك ونەر سىنعا تۇسەتىن ازيا ويىندارىنىڭ اشىلۋ سالتاناتىنا قاتىسۋعا جاساعان ۇسىنىسىمىزدى قابىل العانىڭىز ءۇشىن ريزاشىلىق بىلدىرەمىن. بۇل ءبىزدىڭ ورتاق مەرەكەمىز سانالادى. تۇرىكمەندەر مەن قازاقتار، تاجىكتەر سپورتتىق ءوڭىر سانالادى. مەنىڭشە، بارشامىزعا ورتاق وسىناۋ مەرەكەدە سالاۋاتتى ءومىر سالتىن قالاي قادىرلەپ، حالىقتى قالاي ۇيىستىرا ءبىلۋ كەرەكتىگىن بۇكىل الەمگە پاش ەتەتىن بولامىز»، - دەدى ءوز كەزەگىندە تۇرىكمەنستان پرەزيدەنتى عۇربانع ۇلى بەردىمۇحامەدوۆ.

ونىڭ ايتۋىنشا، جابىق كەشەندەگى ازيا ويىندارىنا قاتىسۋ ءۇشىن الەمنىڭ 64 مەملەكەتىنەن سپورتشىلار كەلگەن. بۇعان قوسا، بۇۇ وتىنىشىمەن بوسقىندار دا بۇل جارىسقا ارنايى كوماندا قۇرىپ، سىنعا تۇسپەك. وسى قادامى ارقىلى تۇرىكمەن حالقى وڭىردەگى تۇراقتىلىقتى، قاۋىپسىزدىكتى ساقتاۋعا مۇددەلى ەكەندىگىن كورسەتۋگە ۇمتىلۋدا.

«ءسىز ەكسپو-2017 كورمەسىن وتكىزدىڭىز. وسىناۋ ءوڭىر ءۇشىن بۇرىن- سوڭدى بولماعان اۋقىمدى شارانى ەڭ جوعارى دەڭگەيدە ۇيىمداستىرا الدىڭىزدار. بۇگىندە ءسىز بەن ءبىز وسىنداي بيىك شىڭداردى باعىندىرۋدامىز. كەشە ءسىزدىڭ ەلدىڭ سپورتشىلارى لايىقتى ناگراداعا يە بولدى. مەنىڭشە، بۇگىن ءسىز ولارعا باتاڭىزدى بەرەسىز دەپ ويلايمىن»، - دەدى عۇربانع ۇلى بەردىمۇحامەدوۆ.