شىعىس قازاقستاننان قىتايعا قانشا بال ەكسپورتتالماق - فوتو
«بيىل وسىمەن ەلوردادا ەكىنشى رەت جارمەڭكە وتكىزىپ جاتىرمىز. ءبىرىنشى جارمەڭكەدە 340 توننا ءونىم اكەلگەنبىز، ال وسى جولى 200 ميلليون تەڭگە سوماسىنداعى 350 تونناعا جۋىق ءتۇرلى اۋىل شارۋاشىلىعى ونىمدەرىن جەتكىزدىك. جالپى جارمەڭكەدە ساۋداعا شىعارىلعان ءونىم قۇنى استاناداعى بازار باعاسىنان 20-25 پايىزعا تومەن. بۇگىن تاۋارلاردىڭ ساتىلىمىنا كوڭىلىمىز تولىپ وتىر، سەنبىدەن باستاپ قالا تۇرعىندارى كوپتەپ كەلىپ جاتىر»، - دەدى ش ق و اۋىل شارۋاشىلىعى باسقارماسىنىڭ ازىق- تۇلىك قاۋىپسىزدىگى، تاماق جانە قايتا وندەۋ ونەركاسىبى ءبولىمىنىڭ باسشىسى تالعات قايمولدينوۆ.
ونىڭ سوزىنە قاراعاندا، ش ق و- دا بال ونىمدەرىنىڭ ۇلەسى باسىمىراق بولعاندىقتان، ومارتا شارۋاشىلىق وكىلدەرى ۇلكەن جارمەڭكەلەرگە بارۋعا ەرەكشە نيەت تانىتىپ وتىر.
بۇدان بولەك، ول بال ونىمدەرىن شەتەلدەگە ەكسپورتتاۋ جايىندا ايتىپ بەردى. وتكەن جىلى قىتايعا 94 توننا بال وتكىزىلگەن بولسا، بيىل كۇزدە 1 مىڭ توننا ءونىمدى شىعارۋعا كەلىسىم جاسالعان.
«نەگىزى ءبىزدىڭ ءوڭىردىڭ ەكسپورتتىق الەۋەتى 2-2,5 مىڭ تونناعا جەتەدى. وبلىستا 4 مىڭ توننا بال ونىمدەرى شىعارىلسا، ىشكى تۇتىنۋ كولەمى 1,5 توننا دەڭگەيىندە. سوندىقتان جاڭا جىلعا دەيىن اتالعان 1 مىڭ توننانى ەكسپورتتاپ جىبەرەمىز»، - دەدى ت. قايمولدينوۆ.
16-17 -قىركۇيەك ارالىعىندا ءوتىپ جاتقان جارمەڭكەگە شىعىس قازاقستان وبلىسىنان جىلقى ەتى، بال، قىمىز، كۇنباعىس مايى، ءسۇت جانە شۇجىق ونىمدەرى، بالىق پەن كوكونىس جەتكىزىلدى. جالپى ءوڭىر اۋداندارى 100 دەن استام ساۋدا ورىندارىن جاساقتادى. ش ق و ومارتا شارۋاشىلىقتارى بۇل جارمەڭكەگە 35 توننا بال الىپ كەلدى.