ارقالىقتا «باس كەسپەك بولسا دا...» - اتتى ايتىس ءوتتى

None
None
قوستاناي. قازاقپارات - ارقالىقتا «باس كەسپەك بولسا دا...» اتتى رەسپۋبليكالىق اقىندار ايتىسى ءوتتى، دەپ حابارلايدى قازاقپارات ءتىلشىسى.

كەيكى باتىرعا ارنالعان رەسپۋبليكالىق اقىندار ايتىسى ارقالىق جاسوسپىرىمدەر تەاترىندا ۇيىمداستىرىلدى. قوستاناي وبلىسى اكىمىنىڭ ورىنباسارى مارات جۇندىبايەۆ ءسوز سويلەپ، اقىندارعا ساتتىلىك تىلەدى. ايتىسقا اقىنداردىڭ التى جۇبى قاتىستى. قازاقستاننىڭ حالىق اقىندارى ءاسيا بەركەنوۆا، اسەلحان قالىبەكوۆا جانە قونىسباي ءابىل، جازۋشى عۇمار احمەتچين، اقىن ابىلاي ماۋدانوۆ بايگە جەڭىمپازدارىن انىقتادى.

ءبىرىنشى جۇپ - توبا وتەپبايەۆ پەن اسەم ەرەجە قىزىنا قازىلار القاسى ساراڭدىق تانىتپاي، ەكەۋىنە ەڭ جوعارى ۇپاي بەرىپ، تەڭ ءتۇسىردى. مۇنان سوڭ ارقالىقتىق باتىرلان ساعىنتايەۆ اقتوبەدەن كەلگەن مارات احمەتوۆتى جەڭدى. ال شاردارا تۇلەگى ەرجان ءامىروۆ سەمەيلىك ساياگۇل بىرلەسبەككە جول بەردى.

ديدار قاميەۆ پەن مارجان ەسجانوۆا اراسىنداعى ايتىس تا كورەرمەن كوڭىلىنەن شىقتى. «ۇيىقتايتىن گولوۆكيننىڭ مەكەنىنەن، ءمىرجاقىپ وياتاتىن ەلگە كەلدىم» دەپ، ارقالىق جۇرتىمەن امانداسىپ الىپ:

«قازاق ءۇشىن جانىم پيدا دەيتۇعىن،

مىنا دالا ورداسى عوي كەيكىنىڭ،

ويانامىن بابالاردىڭ الدىندا،

جاس ۇرپاقتىڭ كورگەن كەزدە كەي ءتۇرىن.

كەيكى سىندى ەرلەر شىقسىن دالامنان،

مالدىڭ ەمەس، ەلدىڭ قامىن جەيتۇعىن»، - دەگەن تىلەگىن جەتكىزدى ديدار قاميەۆ. قارسىلاسى مارجان ەسجانوۆا دا ەستى ءسوز ايتىپ، ناتيجەسىندە قازىلار ەكەۋىنە دە 50 ۇپايدان ۇستاتتى.

تالاي ايتىس الامانىندا بىرىنەن- ءبىرى وزىق شىعىپ جۇرگەن سىرالعى قارسىلاستار ايبەك قاليەۆ پەن مۇحتار نيازوۆ بۇل جولى تەڭ ءتۇستى. ۇتىمدى ۇيقاستار، قىزىقتى سۇراق- جاۋاپتارىمەن ەستە قالعان قوس جۇپتىڭ ايتىسىندا نەگىزگى تاقىرىپ كەڭىنەن اشىلدى.

ال قوستاناي قالاسىنىڭ اتىنان شىققان سالتانات وتەلبايەۆا الماتىدان كەلگەن قازىرەت بەردىحاننان باسىم بولدى.

قازىلار القاسىنىڭ شەشىمىمەن فينالعا ەكى جۇپ اقىن - ايبەك قاليەۆ پەن ديدار قاميەۆ، مۇحتار نيازوۆ پەن مارجان ەسجانوۆالار شىقتى.

«بارمىسىڭ، قاۋىمشى جۇرت، ساۋىنشى جۇرت، اقىننىڭ ەكى ءيدىرىپ، ءتىلىن ساۋعان»، - دەپ جىرلاعان ايبەك قاليەۆكە ءىنىسى ديدار قاميەۆ تە ءوز ورەسىندە جاۋاپ بەرە الدى.

تابان استىندا تاۋىپ ايتىپ، از سوزگە كوپ ماعىنا سيعىزا بىلەتىن مۇحتار نيازوۆ پەن مارجان ەسجانوۆالار اراسىنداعى ايتىستا ورالىمدى ويلار مەن اقجارما تىلەكتەر دە ايتىلدى. مۇحتار «ءتورت- بەس جىلدا وزگەرمەپسىڭ، سول قالپىڭ» دەپ، شىمشىما ازىلدەرىمەن ءتيىسىپ ەدى، مارجان:

«قىرسىقسا، ەش ادامنىڭ باعى اشپايدى،

بۇل مارجان ەشكىممەنەن تالاسپايدى،

ءوزىڭ ايتقان الپامساداي اپاڭىزعا،

قىسقا- قىسقا ءسوز سويلەۋ جاراسپايدى»، - دەپ جاۋاپ قايىردى.

سونىمەن، قازىلار القاسى شەشىم شىعاردى. كەيكى باتىردىڭ رۋحىنا ارنالعان رەسپۋبليكالىق اقىندار ايتىسىنىڭ باس جۇلدەسى شىمكەنتتەن كەلگەن مارجان ەسجانوۆاعا بۇيىردى. باس جۇلدەگە تەمىر تۇلپار تىگىلگەنىن ايتا كەتەيىك.

1-ورىندى ايبەك قاليەۆ يەلەنسە، مۇحتار نيازوۆ پەن ديدار قاميەۆ 2-ورىندى ءبولىستى. ۇشىنشىدە - توبا وتەپبايەۆ، اسەم ەرەجە قىزى، ساياگۇل بىرلەسبەك. ايتىسقا قاتىسقان جانە جۇلدە العان بارلىق اقىنعا سىي-سياپات جاسالدى.

باتىر جولاي ۇلى

سوڭعى جاڭالىقتار