اتاقتى «كانەلونىڭ» ەكىنشى جەڭىلىسى ءبىزدىڭ باتىردان بولادى - قانات يسلام

استانا. قازاقپارات- قازاقستاندىق تانىمال كاسىپقوي بوكسشى قانات يسلام وتانداسى گەننادي گولوۆكيننىڭ الداعى جەكپە- جەگىنە ساتتىلىك تىلەپ، جەڭىسىنە سەنىم ءبىلدىردى، دەپ حابارلايدى قازاقپارات ءتىلشىسى.

«گەنامەنىڭ اعام! گەنا ەلىمنىڭ ماقتانىشى! گەنا الەمدىك بوكس جۇلدىزى! جەكپە- جەگىندە باۋىرىما ساتتىلىك تىلەيمىن. بۇل جولعى قارسىلاس وڭاي ەمەس. تاجىريبەلى دە تالانتتى بوكسشىلاردى ۇتقان اتاقتى «كانەلو». ءبىراق مەن GGG ءوز ماقساتىنا جەتپەي قويمايتىن نامىستى بوكسشى ەكەنىن بىلەمىن. ونى تالاي دالەلدەدى. جاتتىقتىرۋشىسى وسى جولى دا دۇرىس تاكتيكا قويىپ، العاشقى راۋندتا- اق تىزگىندى گەنا ءوز قولىنا الاتىنىنا كۇمانىم جوق. مەيۆەزەردەن ۇتىلعان كانەلونىڭ ەكىنشى جەڭىلىسى ءبىزدىڭ باتىردان بولادى دەپ سەنەمىن! ەل سەنەدى. ءۇمىت ارتادى. كوك تۋدى جەلبىرەت، باتىر!»، - دەپ جازدى قانات يسلام ينستاگرامداعى جەكە پاراقشاسىندا.

ايتا كەتەيىك، گولوۆكين- الۆارەس جەكپە- جەگى 16- قىركۇيەك كۇنى ا ق ش- تىڭ لاس-   ۆەگاس قالاسىنداعى «T-Mobile» ارەنادا وتەدى. ونى «Qazaqstan» جانە «Qazsport» تەلەارنالارى تىكەلەي ەفيردەن 17- قىركۇيەك كۇنى (ۋاقىت ايىرماشىلىعىنا بايلانىستى) كورسەتەدى. بەلگىلى بولعانداي، گولوۆكين مەن الۆارەستىڭ ايقاسى ساعات 8.50-دە باستالادى.

 اۆتور: مۇحتار قاليموللا ۇلى