ءبىرىنشى كۋرس ستۋدەنتى قالاي كيىنگەنى ءجون؟
«كيىمىڭە قاراپ كۇتىپ الىپ، بىلىمىڭە قاراپ شىعارىپ سالاتىن» جەر - ناعىز وسى جوعارى وقۋ ورنى. سوندىقتان جاڭا ءومىرىڭىزدىڭ ەڭ العاشقى باسپالداعىن قانداي كيىممەن اتتاۋىڭىز دا زور ماڭىزعا يە. مەكتەپ وقۋشىسى سەكىلدى «ءۇستى - اق، استى - قارا» كيىم كيمەگەنىڭىز ءجون. ستۋدەنت بولعانىڭىزدى سەزىنىپ، اشىق، جارقىن ءتۇستى كيىمدەر تاڭداساڭىز، ۇتىلمايسىز. اشىق، كوتەرىڭكى كوڭىل سىيلايتىن كيىم كيەمىن دەپ قىسقا بەلدەمشە، شورتي، دجينسى، دەنەگە جابىسىپ تۇراتىن كويلەك، تار شالبار، جاعاسى كەڭ ويىلعان جەيدە سەكىلدى كيىمدەرگە ۇرىنىپ قالماڭىز. بۇل كيىمدەرمەن قوسا تىم بيىك وكشەلى تۋفلي، باتتاستىرا جاعىلعان بوياۋ ەڭ العاش كورەر كوزگە ءسىزدى جەڭىلتەك ەتىپ كورسەتۋى ىقتيمال.
كىسىنى اياق كيىمىنە قاراپ تانيتىن ادامدار دا بار. جازعى اشىق اياق كيىمدەردەن باس تارتىپ، كۇزدىك تۋفلي تاڭداعانىڭىز ءجون. ءتۇسى قارا، قويۋ ءتۇستى بولىپ، جىلتىراپ تۇرعانى ابزال. كيىمىڭىزبەن تۇستەس اشىق ءتۇستى تۋفلي كيەمىن دەسەڭىز دە ەركىڭىزدە. وكشەسى 8 سانتيمەتردەن بيىك بولماعانى دۇرىس، بىرنەشە ۋاقىت تىكەڭىزدەن تىك تۇرىپ مەرەكەلىك كونتسەرت كورۋگە تۋرا كەلسە دە، وقۋ ورنىنان شىققان سوڭ توپپەن ءبىر جەرگە باراتىن بولساڭىز دا، انا قاباتتان مىنا قاباتقا كوتەرىلۋگە دە وسى بيىكتىك ىڭعايلى بولار. ال 1 قىركۇيەككە ەسى دۇرىس ادام سۇيرەتپە كيمەيتىنى ونسىز دا تۇسىنىكتى. سۇيرەتپە اياق كيىم مەن ءشورتيدى وقۋ ورنىنا كيۋگە مۇلدەم تىيىم سالىنعان.
تاعاتىن اشەكەي بۇيىمدارىڭىز دا تىم كوز تارتارلىق بولماي، ەلەۋسىزدەۋ تاڭدالعانى ابزال. توپتاستارىڭىزدىڭ ەسىندە «دوڭگەلەك سىرعالى قىز» ، «باقا سەكىلدى كوزىلدىرىك كيگەن» ، «ۇلكەن ساقينالى ستۋدەنت» دەگەن سەكىلدى اتپەن قالىپ قويعىڭىز كەلمەيتىن شىعار. فوتوعا تۇسكەندە قانىق شىعۋى ءۇشىن ازداعان ماكياج جاساساڭىز جارايدى، جوعارىدا ەسكەرتكەنىمىزدەي، اسا اشىق تۇسپەن، تىم كوپ بوياپ، بەتىڭىزگە «ۇرىسقاق قىزدىڭ سۋرەتىن» سالماڭىز. مەرەكەلىك كەشكە دايىندالعانداي، جاڭا جىلعا بەزەندىرىلگەن شىرشاداي جاسانۋدىڭ قاجەتى جوق. كەشكى وتىرىسقا ارنالعان، تىم جىلتىر كويلەكتەر مەن جەيدەلەرگە جوق دەڭىز. بەيتاراپ ءتۇستى بەلدەمشە مەن اشىق ءتۇستى جەيدەنى ۇيلەستىرىپ كيۋدى ۇسىنامىز، سىرتىنا پيدجاك كيسەڭىز دە جاراسادى. كلاسسيكالىق شالبار مەن كوستيۋم كيسەڭىز دە وبرازىڭىز اشىلا تۇسەر. وفيستىك ستيلدە تىگىلگەن كويلەك پەن پيدجاك قاتە تاڭداۋعا جاتپايدى. جاڭا تانىستارىڭىزعا بىردەن اسەر ەتىپ، ەسىندە قالام دەسەڭىز، كيىمدەرىڭىز القىزىل، اسپان كوك، اشىق جاسىل سەكىلدى كوڭىل- كۇي سىيلايتىن تۇستەردەن قۇرالسىن. باستىسى، نە كيسەڭىز دە دەنەڭىزگە قونىمدى، پىشىنىڭىزگە جاراسىمدى، تۇلعالىق بەدەلىڭىزگە نۇقسان كەلتىرمەيتىن، ءجۇرىپ- تۇرۋىڭىزعا ىڭعايلى كيىم بولسىن.
ماقالا ۇنادى ما؟ ۇناسا، دوستارىڭمەن ءبولىس!
Massaget.kz