سەمەيدەگى مۇحتار اۋەزوۆ مۋزەيى كيەلى ورىندار تىزىمىنە ەندى

استانا. قازاقپارات - سەمەيدەگى مۇحتار اۋەزوۆ مۋزەيى «قازاقستاننىڭ جالپى ۇلتىق كيەلى ورىندارى» جوباسى اياسىندا 100 نىساننىڭ تىزىمىنە ەندى، دەپ جازادى altaynews.kz.

«ساكرالدى قازاقستان» عىلىمي-زەرتتەۋ ورتالىعىنىڭ ديرەكتورى بەرىك ءابدىعاليدىڭ ايتۋىنشا، اتالمىش جوبا اياسىندا ەلىمىزدىڭ ەڭ كورىكتى تابيعي لاندشافت نىساندارى، ارحەولوگيالىق جانە ساۋلەت ەسكەرتكىشتەرى، سونداي-اق، ءدىني ورىندارى مەن تاريحي تۇلعالار تۇرعان عيماراتتارى 100 نىساننىڭ تىزىمىنە ەنگەن.

«ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىندا كورسەتىلگەن مىندەتتەردى جۇزەگە اسىرۋ ماقساتىندا وسى جوبانى قولعا الدىق. جالپى، ءبىزدىڭ ورتالىقتىڭ ماماندارى ەلىمىزدىڭ كيەلى ورىندارىن زەرتتەي وتىرىپ، كەيىنگى جاستاردىڭ بويىنا پاتريوتيزم سەزىمىن ۇيالاتىپ، ولاردىڭ ەرىك- جىگەرى مىقتى ازامات بولىپ وسۋىنە ىقپال ەتكىسى كەلەدى»، - دەيدى بەرىك ءابىدعالي.