بودەنەنىڭ قۇيرىعى نەگە قىسقا؟ - ەرتەگى

انا. قازاقپارات - حالقىمىزدىڭ باي مۇرالارىنىڭ ءبىرى - ەرتەگى. بۇگىن ءبىز سىزدەرگە «بودەنەنىڭ قۇيرىعى نەگە قىسقا؟ « اتتى حالىق ەرتەگىسىنىڭ ەكى نۇسقاسىن ۇسىنامىز.

1 - نۇسقا

بۇل بىلاي بولعان ەكەن. ەرتەدە مىناۋ، تومەن جاقتا ءبىر بيىك تاۋ بولىپتى. ول تاۋدان ارى قاراي ەشبىر قۇس اسىپ وتە الماپتى. نەلەر ۇشقىر، قىران قۇستار تالاپتانىپ كورىپتى. ءبىراق شامالارى كەلمەپتى. بۇركىتتىڭ ۇشقىش قىرانى كەلىپتى، اسا الماپتى. قىرعيدىڭ اتاقتىسى كەلىپتى، ول دا اسا الماپتى. ەڭ سوڭىندا «ەندى كىم قالدى؟ « دەگەندە بودەنەدەن باسقا قۇستاردىڭ ءبارى ءوز باقتارىن سىناپ كورىپتى. بودەنەنىڭ اتاقتىسى شاقىرىلىپتى. «تاۋەكەل» دەپ، بودەنە ۇشا جونەلەدى. شىرقاپ كوتەرىلىپ بارىپ، تاۋدان ولدا اسا الماپتى. سودان سوڭ ىزىلانعان بودەنە زىمىراپ قۇيىلعاننان قۇيىلىپ كەلىپ، تاۋدى كوكىرەگىمەن سوققان ەكەن دەيدى. سوندا ول تاۋدىڭ ار جاعىنا ءبىراق ءوتىپتى. مىنە، سودان بەرى قاراي قونعاندا، اياعىمەن قونبايدى، كوكىرەگىن جەرگە سوعا قونادى. ال قۇيرىعى نەعىپ دەسەك، الگى تاۋ تەسىگىنىڭ اراسىندا جۇلىنىپ، قالىپ قويىپتى.. . ايتپەسە، بۇرىن بودەنەنىڭ قۇيرىعى قىرعاۋىلدىڭ قۇيرىعىنداي ۇزىن بولسا كەرەك. ءسويتىپ، بيىك تاۋدان اسا الماعان قۇستار ارى قاراي بودەنە تەسكەن تەسىكتەن ءوتىپ بارىپتى.

Ⅱنۇسقا

بار ەكەن، جوق ەكەن، باياعىدا بودەنە مەن تۇلكى دوس بولعان ەكەن. ءبىر كۇنى تۇلكى بودەنەگە ايتادى: - دوسىم، سەن مەنى ءبىر ولەردەي، كۇلدىرشى، - دەيدى. بودەنە: - جارايدى، سوڭىما ەر، - دەيدى. سويتەدى دە، بودەنە بىتبىلدىق، بىتبىلدىق دەپ، ۇشىپ كەتە بەرەدى، تۇلكى ونىڭ سوڭىنان ەرىپ وتىرادى. الدەنە ۋاقىتتا بودەنە ءبىر اۋىلدىڭ سىرتىنا كەلىپ قونىپ، تۇلكىگە: - دوسىم سەن وسى جەردە قاراپ وتىر، مەن سەنى قازىر كۇلدىرەم، - دەيدى. وسىلاي دەپ، بودەنە ۇشىپ بارىپ، سيىر ساۋىپ وتىرعان ءبىر ايەلدىڭ باسىنا قونادى. مۇنى ءۇيدىڭ جانىندا اعاش جونىپ وتىرعان ونىڭ كۇيەۋى كورىپ: - قاتىن، باسىڭا بودەنە قوندى، قوزعالما، ونى مەن ۇرىپ الايىن، - دەيدى. دەيدى دە، قولاعاشتى الىپ، بودەنەگە جىبەرىپ قالادى. بودەنە ۇشىپ كەتەدى. ايەل سۋلاپ قالادى. تۇلكى شەك- سىلەسى قاتىپ كۇلەدى.

تۇلكى الدەنە ۋاقىتتا كۇلكىسىن ارەڭ تىيىپ: - دوسىم، ريزامىن، ولەردەي كۇلدىردىڭ. ەندى سەن مەنى ولەردەي ءبىر قورقىتشى، - دەيدى. بودەنە: - جارايدى. مەن بىتبىلدىق، بىتبىلدىق دەپ ۇشىپ وتىرام، سەن كوزىڭدى تارس جۇمىپ، مەنىڭ سوڭىمنان ەرىپ وتىر. ءقوزىڭدى مەن اش دەگەندە عانا اش، - دەيدى. وسىلاي بودەنە بىتبىلدىقتاپ ۇشىپ وتىرادى، تۇلكى كوزىن جۇمىپ، ونىڭ سوڭىنان جورتىپ وتىرادى. ءبىر كەزدە بودەنە تۇلكىگە: - كوزىڭدى اش، - دەيدى. تۇلكى كوزىن اشىپ جىبەرسە، توڭىرەگى تولا يت جۇگىرتىپ، قۇس سالعان اڭشى ەكەن. تۇلكىنىڭ جۇرەگى تاس توبەسىنە شىعادى. - ءولدى دەگەن وسى ەكەن، - دەپ، ول بار پارمەنىمەن قاشا جونەلەدى. يت، قۇس سوڭىنا ءتۇسىپ قۋادى. تۇلكى ءبىر ۋاقىتتا قاشىپ قۇتىلىپ، ءبىر بۇتانىڭ تۇبىنە كەلىپ، دەمالىپ وتىرادى. الدەنەۋاقىتتا بودەنە كەلەدى. وعان تۇلكى اشۋلانىپ: - قورقىت دەگەندە وسىلاي قورقىت دەپ پە، ەم. سەن مەنى قورقىتپاقشى ەمەس، ولتىرمەكشى بولعان ەكەنسىڭ. سەن ماعان دوس ەمەس، قاس ەكەنسىڭ. مەن سەنى جەيمىن دەپ، بودەنەگە دۇرسە ۇمتىلادى. بودەنە پىر ەتىپ، ۇشىپ كەتەدى. تۇلكى ونىڭ قۇيرىعىڭ جۋلىپ الىپ قالادى. بودەنەنىڭ قۇيرىعى وسىدان شولاق بولعان ەكەن.

Massaget.kz