التىنشى سەزىم - تۇيسىك دەگەن نە؟

نۇر-سۇلتان. قازاقپارات - بۇل ءبىزدىڭ ىشىمىزدەن شىعاتىن تىلسىم ءۇن. ول ۇنەمى بىزبەن بايلانىستى بولادى، ءبىراق نەگە ەكەنى بەيمالىم، ءبىز وعان قۇلاق تۇرە بەرمەيمىز.

تۇيسىك ادامعا نە ءۇشىن كەرەك؟ كورۋ، ەستۋ، يىسكەۋ، ءدام سەزۋ، سيپاپ (تەرى) سەزۋدەن كەيىنگى التىنشى سەزىم (ينتۋيتسيا) قاۋىپتى جاعدايدالاردىڭ الدىن الۋ ءۇشىن قاجەت.

قازاقتا «اياعىم تارتپاي تۇر»، «كوڭىلىم قوش كورمەي تۇر» دەگەن سوزدەر بار، مىنە، بۇل - تۇيسىكتىڭ داۋىسى. ياعني ءسىز وسى داۋىستى ماقۇلداپ، اياعىڭىز تارتپاعان جەرگە بارماي قالساڭىز، سول جەردە اپات بولعانىن كەيىن ەستيسىز دە، بارماعانىم جاقسى بولعان دەپ ويلايسىز. ول تەك تىرشىلىك قاۋىپسىزدىگىن ساقتاپ قانا قويمايدى، جۇمىستا، كاسىپتە شەشىم قابىلداۋدا دا ءسىزدىڭ سەرىگىڭىز بولادى.

تۇيسىك بارلىق ادامدا بولادى، بىرەۋدە - جاقسى دامىعان، بىرەۋدە - تومەن دەڭگەيدە. ەرلەرگە قاراعاندا ايەل ادامداردىڭ تۇيسىگى جاقسىراق دامىعان، بۇل ميدىڭ وڭ جاق جارتى شارىنا بايلانىستى. ول ىم- يشاراعا، قيالداۋ مەن ارمانداۋ قابىلەتىنە جاۋاپ بەرەدى. ميدىڭ وڭ جاق جارتى شارىن جەتىلدىرۋ ءۇشىن حات جازىپ داعدىلانۋ، سول قولمەن سۋرەت سالۋعا يكەمدەلۋ دەگەن سەكىلدى جاتتىعۋلار جاساۋعا بولادى. سىندارلى لوگيكادان ارىلىڭىز. التىنشى سەزىم كوبىنە لوگيكاعا قايشى كەلىپ جاتادى. بەيسانالى تۇرعىدا تۋعان ويلارىڭىزعا ءمان بەرىڭىز، ول لوگيكاعا سايكەس كەلمەۋى مۇمكىن، دەگەنمەن تالدامالى شەشىمدەر قابىلداۋدا كومەگى كوپ. قاعازعا ءارتۇرلى بەس ءسوز جازىپ، ولارعا العاش ويىڭىزعا كەلگەن سوزدەرمەن اسسوتسياتسيا جاساڭىز. العاشىندا كىتاپ - ءبىلىم، سۋ - تازالىق، كيىم - جىلۋ، قۇجات - مەملەكەت، تارەلكە - تاماق دەگەن سەكىلدى ءىش پىستىرارلىق ءتىزىم تۋۋى مۇمكىن. بۇل جاتتىعۋدى تاعى قايتالاڭىز. بىرنەشە رەت قايتالاعاندا جاقسىلاپ باقىلاۋدى قاجەت ەتەتىن كۇتپەگەن بايلانىستار تابۋىڭىز ىقتيمال.

ءوزىڭىزدىڭ «مەنىڭىزبەن» سويلەسىڭىز. تەز ارادا شەشىم قابىلداۋ قاجەت بولىپ، تىعىرىققا تىرەلگەندەي ساتتەرمەن كۇن سايىن بەتپە- بەت كەلەسىز. ىشكى «مەنىڭىزبەن» تىدەسۋدەن قورىقپاڭىز. ساناڭىزبەن سويلەسىڭىز. وزىڭىزگە سۇراق قويعان كەزدە عانا تۇيسىگىڭىز قىزمەتىنە كىرىسەدى. ول مىنا سىزبا بويىنشا ىسكە اسادى:

ماسەلە - سەبەبىن انىقتاۋ - شەشۋ جولدارى - ماسەلە شەشىمىنىڭ ەڭ ءتيىمدىسىن تاڭداۋ - ناتيجە. تۇيسىك بولماسا، سىزبا: ماسەلە - شەشۋ جولدارى - ءبىر شەشىمگە كەلۋ - ناتيجە كۇيىندە عانا كورىنەدى. لوگيكا مەن تۇيسىك پاراللەل باعىتتا ءجۇرىپ وتىرادى، ءبىراق ماتەماتيكا زاڭدارىنان ايىرماشىلىعى، ولار ومىردە ءتۇيىسىپ كەتەتىن كەزدەرى بولادى.

ۇيلەسىم ىزدەڭىز. ءوزىن قورشاعان ورتامەن ۇيلەسىمدىلىكتە كورە بىلەتىن جاننىڭ تۇيسىگى تەز داميدى. ءسىز قانداي تۇلعاسىز، قالاۋىڭىز نە، باسقالار سىزبەن قالاي ارالاسادى - وسىنى ويلانىڭىز. ءوزىڭىز تۋرالى جانە وزگەلەرمەن قارىم- قاتىناسىڭىز جونىندە تولىق تۇسىنىگىڭىز قالىپتاسقان بولۋى ءتيىس. ءوزىڭىزدى، اسەرىڭىزدى، ارەكەتتەرىڭىزدى سانادا ساراپتاپ، بارلىعىن جاقسىلاپ ويلانۋعا ءبىر كۇن ارناڭىز. بارلىعىنا ىشتەي باعا بەرىڭىز، جازىپ وتىرساڭىز تىپتەن جاقسى. ىشكى داۋىسىڭىزدى تىڭداپ، تۇسىنۋگە تىرىسىڭىز. سوندا ءوزىڭىزدى ءتۇسىنۋ، جاعدايلاردى شەشۋ جەڭىل بولادى.

سابىرلى بولىڭىز. ەگەر ادام تولاسسىز ويلار اعىنىن دەرەۋ توقتاتىپ، ىشكى تىنىشتىعىنا ورىن بەرگەن جاعدايدا عانا، تۇيسىك وعان قيىن جاعدايدان الىپ شىعاتىن كومەكشى قۇرال بولا الادى. ويدى ءبىر ارناعا شوعىرلاندىرۋ، ياعني مەديتاتسيانىڭ ماقساتى وسى. سوندا ادام بوساڭسىپ، بەيسانانىڭ تۇڭعيىعىنا باتادى. ول سانانى تىنىشتاندىرىپ، ارتىق ويلاردان ارىلۋعا كومەكتەسەدى. كەمىندە جارتى ساعات بولمەدە نە تابيعات اياسىندا جالعىز قالىپ، الاڭداتاتىن بارلىق نارسەدەن الشاقتاپ، ويىڭىزدى جيناقتاۋعا ۋاقىت ءبولىڭىز.

Massaget.kz