ەر مەن ايەل ۇيلەنبەي تۇرىپ ءبىر- بىرىنە قويۋى ءتيىس سۇراقتار

 استانا. قازاقپارات - كەز كەلگەن جىگىت پەن قىزدىڭ ارمانى - باقىتتى وتباسىن قۇرۋ، ارتىنان ىزگى ۇرپاق قالدىرۋ.

بۇل تۇرعىدا اۋەل باستان ويلانىپ، دۇرىس تاڭداۋ جاساعان ءجون. ول ءۇشىن ەر ادام مەن ايەل ءبىر- بىرىمەن تۇسىنىسە بىلۋلەرى كەرەك.

ومىرگە دەگەن كوزقاراستارى مەن ماقساتتارى، نيەتتەرى ءبىر بولۋى ءتيىس. ەرتەڭگى كۇنى تاڭداۋلارىنا وكىنىپ قالماس ءۇشىن ەكەۋى ءبىر- بىرىنە كەلەسى سۇراقتاردى قويعانى دۇرىس، دەپ جازادى islam.kz.

• جىگىتتىڭ قىزعا قويار سۇراقتارى:

1. دىنىمىزدە ايەل ادامعا باسقا ەر ادامداردىڭ كوزىنشە اشىق- شاشىق كيىنىپ جۇرۋگە تىيىم سالعان. وعان قالاي قارايسىز؟

2. ەگەر وتباسىندا قانداي دا ءبىر قيىنشىلىق كەزدەسسە (اقشا جەتپەسە، قالاعان كيىمىڭىز بەن تاماعىڭىزدى جەي الماساڭىز) سوعان شىداي الاسىز با؟

3. ايەل مەن ەر ادام سۇلۋلىق نەمەسە بايلىقتارى ءۇشىن ەمەس، جان سۇلۋلىعىنا قاراپ ۇيلەنۋ كەرەك دەگەنگە قالاي قارايسىز؟

4. ايەل كۇيەۋىنىڭ ايتقاندارىن ورىنداپ، وعان باعىنۋى كەرەك دەگەنگە كوزقاراسىڭىز قانداي؟

5. ەرلى- زايىپتىلاردىڭ اراسىندا رەنىش، تۇسىنىسپەۋشىلىك بولىپ قالسا ونى شەشۋدىڭ جولدارى قانداي دەپ ويلايسىز؟

6. ەگەر ادام ءوز قاتەلىگىن ءتۇسىنىپ، كەشىرىم سۇراپ تۇرسا وڭاي كەشىرەسىز بە؟

• قىزدىڭ جىگىتكە قوياتىن سۇراقتارى:

1. ەر ادام - وتباسىنىڭ اسىراۋشىسى، ايەلى مەن بالا- شاعاسىن ماتەريالدىق تۇرعىدان قامتاماسىز ەتۋگە مىندەتتى مە؟

2. كۇيەۋى ايەلىنە قول كوتەرە الا ما؟

3. ايەلدىڭ جۇمىس ىستەۋىنە قالاي قارايسىز؟

4. وتباسىنداعى شارۋالار مەن بالا تاربيەسى تەك ايەلدىڭ موينىندا ما؟