جيىرما جاسىندا ايفون كومپانياسىنا شاقىرتۋ العان قازاق جىگىتىنىڭ قايعىلى تاعدىرى
ىبىراي التىنسارين 20 جاسىندا ءوزى سۇرانىپ، تورعاي مەكتەبىنە ءمۇعالىم بولىپ بارعان. وعان دەيىن ەل ىشىنە مەكتەپتىڭ پايداسىن ءتۇسىندىرىپ، ءبىراز بالانى 4 جىل ءوز ۇيىندە وقىتادى. شوقان ۋاليحانوۆ 19 جاسىندا «توقتامىس حاننىڭ جارلىعى» اتتى العاشقى عىلىمي ەڭبەگىن جارىققا شىعارىپ، ءبىر جىل وتكەن سوڭ ىستىقكول ەكسپەديتسياسىنا قاتىسىپ، قىرعىز ەلىن زەرتتەيدى. ءمىرجاقىپ دۋلات ۇلى 20 جاسىندا قارقارالىداعى ساياسي- بۇقارالىق جۇمىستارعا ارالاسىپ، پاتشا ۇكىمەتىنە قازاق حالقىنىڭ اتىنان پەتيتسيا جازۋعا قاتىسادى. وسى اقپاراتتاردى بۇرىن- سوڭدى وقىعان بولارسىز.
يا، راسىندا وقىماۋىڭىز مۇمكىن ەمەس. « ءسىز جيىرما جاسىڭىزدا نە ىستەدىڭىز؟ » دەگەن سۇراققا بۇگىنگى جاستاردىڭ ناقتى جاۋاپ ايتا الماي، قاشقاقتاپ جاتاتىندارى جەتەرلىك. ال بۇگىنگى كەيىپكەرىمىز سول جيىرماعا جەتكەندە الەمگە ايگىلى Apple كومپانياسىنىڭ باس ديرەكتورى تيم كۋكپەن كەزدەسىپ، دۇنيەجۇزىلىك iOS قۇراستىرۋشىلاردىڭ كونفەرەنتسياسىنا قاتىسقان تۇڭعىش قازاق جىگىتى.
تالدىقورعانداعى يننوۆاتسيالىق جوبالار بايقاۋىنا قاتىسىپ، 1,5 ميلليون تەڭگە گرانت ۇتىپ العان. جاس عالىم رەتىندە قازاق عىلىمىنا قوسقان ۇلەسىن ەسەپتەسەك، جوعارىدا ايتىلعان الاش زيالىلارىنا كورسەتىلەتىن قۇرمەتكە لايىق. ەگەر ءومىرى وزگەشە ورىلگەندە قازاقتان شىققان ايگىلى IOS قۇراستىرۋشى دەپ وزىمەن سۇحباتتاسار ەدىك، ءبىراق امال نەشىك، تاعدىردىڭ جازۋىمەن جاس عالىم زاڭعار 2016 -جىلدىڭ كۇزىندە قازا تاپتى. IT سالاسىنا وزىندىك ۇلەسىن قوسقان جاس عالىم تۋرالى بارلىق قازاق بالاسى ءبىلۋى ءتيىس. بالكىم، ءبىرى بولماسا ءبىرى اعالارىنىڭ ءىزىن جالعار دەگەن ويمەن وسى ورايدا زاڭعاردىڭ اناسى سارا ەرجانوۆامەن سۇحباتتاسقان ەدىك...
زاڭعار ورىنبەتوۆ - 2016 -جىلى الماتى قالاسىنداعى سۇلەيمان دەميرەل ۋنيۆەرسيتەتىن ۇزدىك ديپلومعا بىتىرگەن IOS قۇراستىرۋشى. سول جىلى ماۋسىم ايىندا Apple كومپانياسىنىڭ كونفەرەنسياسىنا امەريكاعا شاقىرتۋ الدى. زاڭعار الماتى قالاسىندا قاراپايىم وتباسىندا دۇنيەگە كەلگەن. 7- سىنىپقا دەيىن №40 مەكتەپتە وقىپ، 11- سىنىپتى №24 ليتسەيدە تامامدادى. بالا كەزىندە زاڭعار ءوزىن- ءوزى الىپ جۇرە الاتىن سىپايى، اشىق مىنەزدى بولاتىن. بارلىق بالالاردىڭ ارمانداعانىنداي، ونىڭ دا پرەزيدەنت بولعىسى كەلەتىن. مەكتەپ جاسىندا كومپيۋتەر ويىندارىنا قاتتى قىزىقتى. ءبىرىنشى جوباسىن بالالارعا ارناپ ەدى. دوسى ولجاس الدابەرگەنوۆپەن بىرگە قازاق ءالىپبيىن انيماتسيالىق سۋرەتتەردە سويلەتتى. وسى جوبا ۋنيۆەرسيتەتتە بولعان بايقاۋدا ءبىرىنشى ورىن الدى. سوسىن دارحان قۋانىشباي دەگەن دوسىمەن بىرىگىپ، in Touch دەگەن ءموبيلدى قوسىمشا قۇراستىردى. in Touch قوسىمشاسى ارقىلى حات الماسۋعا، دوستارىنىڭ مەكەن- جايىن بىلۋگە بولاتىن. بۇل جوبانى ۋنيۆەرسيتەتىندە ەكىنشى ورىنعا لايىق دەپ باعالادى. اينالامىزعا قاراساق، ءبىر ادامنىڭ بويىنان جاقسى قاسيەتتىڭ ءبارىن بىردەي تابۋ مۇمكىن ەمەستەي كورىنەدى. الايدا، زاڭعاردىڭ تۇلا بويى تۇنعان جاقسى قاسيەتتەر ەدى. ول وتە سابىرلى بولدى، بار قيىندىققا اسقان شىدامدىلىقپەن توزە بىلەتىن. بالا كەزىنەن بۇكىل تاپسىرماسىن تاپ- تۇيناقتاي ەتىپ، ۇقىپتى ورىندايتىن.
اينالاسىنا ادىلەتتى قاراپ، پاراساتتى شەشىم قابىلدايتىن. ەڭ باستىسى، جان بالاسىن رەنجىتپەيتىن، بىرەۋمەن رەنجىسكەنىن كورمەيتىنسىڭ. مەيلىنشە مەيىرىمدىلىگىنە سالىپ، كەرىسۋدەن قاشاتىن. ۇلكەندەرگە، جاقىندارى مەن تۋىستارىنا دا قۇرمەتپەن قارايتىن. الدەبىرەۋگە اشۋلانىپ، داۋىس كوتەرگەنىن ەشقاشان كورگەن ەمەسپىز. ءاردايىم كۇلىمدەپ جۇرەتىن جانە بارىمەن لەزدە ارالاسىپ كەتۋشى ەدى. قانداي قيىندىققا كەز بولسا دا جاقىندارىنا جۇك سالماي، ءوز بەتىنشە شەشەتىن. زاڭعاردىڭ ەرەكشە مىنەزى - پەرفەكتسيونيست ەدى. جوبالارىن جۇزەگە اسىرۋ بارىسىندا ەڭ كىشكەنتاي بولشەگىنە دەيىن مان بەرەتىن. ماگيستراتۋرادا وقۋمەن قاتار ستۋدەنتتەرگە ساباق بەرىپ ءجۇردى. ستۋدەنت- شاكىرتتەرى، ارىپتەستەرى ونىڭ ادىلەتتى، اقىلدى بولعانىنا قاراي ەرەكشە قۇرمەتتەگەن ەكەن.
دەنساۋلىعىنا دا قالاي بولسا سولاي قاراماي، سپورتپەن اينالىساتىن. بالا كەزىندە جۇزۋگە باراتىن، وسكەن سوڭ سنوۋبورد پەن كونكي تەبۋدى ءوزى ۇيرەندى. دوستارىمەن جانە وتباسىمەن بىرگە تاۋعا، تازا اۋاعا شىققاندى قاتتى ۇناتاتىن. سونىمەن قاتار ۇزاق قاشىقتىققا ۆەلوسيپەد تەپكەندى دە جاقسى كورۋشى ەدى. مەن زاڭعاردىڭ رەنجىپ، اشۋلانعانىن ەشقاشان كورمەدىم. ەشقاشان. ۇنەمى كۇلىمدەپ جۇرەتىن. سوسىن وتە قاراپايىم ەدى. امەريكاعا بارىپ كۋكپەن كەزدەسكەن سوڭ: «اڭگىمە ايت، مەن دە ماقتانايىن» ، - دەپ سۇراعانىمدا، « ءبارى ادەتتەگىدەي» ، - دەپ جىميىپ ەدى.
زاكو ەسەيسە دە مۋلتفيلمدەردى جاقسى كورەتىن. ونىڭ اتاسى بار. كىشكەنتاي كەزىنەن جوعارى سىنىپتارعا دەيىن اتاسى كەلگەندە قاسىنا جاتىپ، ەرتەگى ايتقىزاتىن. جالعىز قارىنداسىن قاتتى ەركەلەتەتىن ەدى. ەكەۋى تەتە بولسا دا ۇرىسپايتىن. سەبەبى، زاڭعار كىشكەنتاي كەزىنەن قارىنداسىنا قامقور، كىشىپەيىل بولاتىن. ادامدارعا سەنگىش ەدى. ساباقتى جاقسى بىتىرگەن كەزىندە ۆەلوسيپەد ساتىپ اپەردىك. جاپجاڭا، كۇشتى ۆەليك. كوشەدە تەۋىپ جۇرگەن. بەيتانىس بالا: « ءبىر اينالىپ كەلەيىنشى» ، - دەپ سۇراعانىندا بەرە سالعان ەكەن. سول اينالعاننان الگى بالا ۇزاققا كەتكەن. زاڭعار بولسا سول جەردە كەش باتقانشا تۇرىپتى. ال الگى بالا سول بويى كەلمەدى. سول كەزدە بالا زاڭعار قاتتى مۇڭايسا دا، ادامدارعا دەگەن سەنىمىن ەشقاشان جوعالتپادى. مۇمكىن سول ءۇشىن دە ونى ستۋدەنتتەرى ەرەكشە جاقسى كورگەن بولار. «QZ قازاق ءتىلىنىڭ بىلگىر پەرنەتاقتاسى» جوباسىن ءبىر جىل ۋاقىت بويى قۇراستىردى. بارلىق دەتالىن تياناقتاپ، تەكسەرگەن سوڭ 2016 -جىلدىڭ قىركۇيەگىندە جۇزەگە اسىرماقشى بولعان. ءبىراق، ۇلگەرمەدى. ءبىرىنشى كۋرستان بىرگە جۇرگەن دوسى دارحان قۋانىشباي وسى جوبانىڭ اياقسىز قالماۋىن قاداعالاپ، دوسىنىڭ ءىسىن اياقتادى.
App Store-عا «QZ قازاق ءتىلىنىڭ بىلگىر پەرنەتاقتاسىن» جۇكتەدى. ونىڭ بولاشاقتا قانداي قوسىمشالاردى قۇراستىرعىسى كەلگەنىن، ويىندا قانداي دۇنيەنىڭ بولعانىن ەشكىم بىلمەيدى. تەك ءبىر انىعى، ول Apple كومپانياسىندا جۇمىس ىستەپ، IOS قۇراستىرۋشى مىقتى مامان بولىپ، ءوز ۇلتىنىڭ IT سالاسىندا جوعارى ناتيجەگە جەتكەنىن قاتتى قالاعان ەدى. بۇل ونىڭ ىزگى ارمانى ەدى... - دەپ اناسى سارا ەرجانوۆا جاس عىلىمنىڭ ومىرىنەن سىر شەرتتى. ءسوز سوڭىندا حاكىم ابايشا ايتقاندا: عالىم بولماي نەمەنە، بالالىقتى قيساڭىز؟ بولماساڭ دا ۇقساپ باق، ءبىر عالىمدى كورسەڭىز، - دەگىمىز كەلەدى. بولاشاققا باعدار جاسايتىن جاس ورەن، زاڭعار ورىنبەتوۆتەي جاس عالىمنىڭ جولىن قۋىپ، ارمانىن ورىندايتىنداي ماقساتتارىڭ بيىك بولسىن!
اقمارال اعزام قىزى، ۇلان گازەتى