حالقىمىزعا قورعان بولعان ۇلتتىق اسكەرىمىزدىڭ ايبىنى ارتا بەرسىن - باتالوۆ - فوتو
مەرەكەلىك كەش قالانىڭ ورتالىق ساياباعىنداعى داڭق ەسكەرتكىشىنە گۇل شوقتارىن قويۋدان باستالدى، - دەپ حابارلايدى قازاقپارات ءتىلشىسى.
جيىندا وبلىس اكىمى اماندىق باتالوۆ جەتىسۋلىقتار مەن اسكەريلەر قاۋىمىن مەرەكەمەن قۇتتىقتادى.
«قۇرمەتتى وتان قورعاۋشىلار، وبلىس تۇرعىندارى! سىزدەردى 7- مامىر - وتان قورعاۋشىلار كۇنىمەن، قازاقستاننىڭ قارۋلى كۇشتەرىنىڭ 25 جىلدىق مەرەكەسىمەن شىن جۇرەكتەن قۇتتىقتايمىن! تاۋەلسىزدىگىمىز بەن تۇتاستىعىمىزدى ساقتاۋعا تىرەك بولعان، حالقىمىزعا قورعان بولعان ۇلتتىق اسكەرىمىزدىڭ ايبىنى ارتا بەرسىن! مەملەكەت باسشىسى، جوعارعى باس قولباسشى نۇرسۇلتان ءابىش ۇلى: «قاستەرلى وتانىمىزعا قىزمەت ەتۋ جانە ونى قورعاۋ - ءاربىر ازاماتتىڭ قاسيەتتى بورىشى. وسىناۋ پەرزەنتتىك پارىزدى اسكەري ادامدار ادال اتقارۋعا ءتيىس! سوندا عانا ءبىز ارمانىمىزعا جەتىپ، ماڭگىلىك ەل بولا الامىز»، - دەپ اتاپ كورسەتكەن بولاتىن. بار عۇمىرىن وتانىن قورعاۋعا ارناپ، قىزمەتىن ءمىنسىز اتقارىپ جۇرگەن اسكەري قىزمەتكەرلەرگە العىس بىلدىرەمىز. ەلىمىزدىڭ تىنىشتىعىن ساقتاۋ جولىنداعى جاۋاپتى قىزمەتتەرىڭىز تابىستى بولسىن!» - دەپ وبلىس اكىمى تىلەگىن ءبىلدىردى.
مۇنان سوڭ ءوڭىر باسشىسى تالدىقورعان اسكەري گارنيزونىنىڭ اسكەري قىزمەتكەرلەرى استانا قالاسىندا وتكەن اسكەري شەرۋگە قاتىسقانىن تىلگە تيەك ەتىپ، وتان قورعاۋشى اعا بۋىنعا قاراتا ىزگى نيەتىن جەتكىزدى.
«ۇلى جەڭىس كۇنىنىڭ قارساڭىندا سوعىس ارداگەرلەرىن، تىل ەڭبەككەرلەرىن جانە وسى بەيبىت كۇنگە جەتۋ جولىندا ولشەۋسىز ۇلەس قوسقان ازاماتتاردىڭ بارلىعىن قۇتتىقتايمىن! سىزدەردىڭ ەرەن ەرلىكتەرىڭىز بەن باتىرلىقتارىڭىز ءاردايىم پاتريوتيزمنىڭ، وتاندى ءسۇيۋدىڭ، ەلگە ءمىنسىز قىزمەت ەتۋدىڭ ۇلگىسى بولىپ قالا بەرمەك. بارشاڭىزعا مىقتى دەنساۋلىق، بەيبىت ءومىر تىلەيمىن! باقىتتى ۇرپاق اشىق اسپان استىندا بەرەكە-بىرلىكتە ءومىر سۇرە بەرسىن!» - دەدى ا. باتالوۆ.
سالتاناتتى شارادا وبلىس باسشىسى اسكەري قىزمەتكەرلەرگە قۇرمەت گراموتالارى مەن العىس حاتتار تاپسىردى. ارىپتەستەرىن قۇتتىقتاعان تالدىقورعان اسكەري گارنيزونىنىڭ شتاب باستىعى، پودپولكوۆنيك جانات ەرمۇحانوۆ تا اسكەري گارنيزوننىڭ اسكەريلەرىن ماراپاتتادى.
سالتاناتتى كەش كونسەرتتىك باعدارلاماعا جالعاستى.
اۆتور: سامال قابىشەۆا