وليمپيادا جۇلدەگەرلەرى اسكەريلەرگە شەبەرلىك ساعاتىن وتكىزدى
«سپورتتىق دەسانت» اكسياسى شەڭبەرىندە قازاقستان رەسپۋبليكاسى قورعانىس مينيسترلىگى ارميا ورتالىق سپورت كلۋبىنىڭ اتاقتى سپورتشىلارى «جاس ۇلان» مەكتەپتەرىنە، قازاقستان رەسپۋبليكاسى قارۋلى كۇشتەرىنىڭ اسكەري بولىمدەرى مەن مەكەمەلەرىنە باردى، دەپ حابارلايدى ق ر قورعانىس مينيسترلىگىنىڭ باسپا ءسوز قىزمەتى.
«سپورتتىق دەسانت» سپورتشىلار اراسىندا اۋىر اتلەتيكا بويىنشا حالىقارالىق دارەجەدەگى سپورت شەبەرى، 2016-جىلى ريو-دە-جانەيرودا وتكەن وليمپيادا ويىندارىنىڭ قولا جۇلدەگەرى، 2016-جىلعى ازيا چەمپيونى دەنيس ۇلانوۆ، سونداي-اق 2016-جىلعى ازيا چەمپيونى رۋستەم سىباي، وليمپيادا ويىندارىنىڭ جەڭىل اتلەتيكا بويىنشا ەكى مارتە چەمپيونى ولگا رىپاكوۆا، اسكەري قىزمەتشىلەر اراسىندا دزيۋدودان الەم چەمپيونى گۋسمان قىرعىزبايەۆ جانە باسقالار بار.
سپورتشىلار مەرزىمدى قىزمەتتەگى جاۋىنگەرلەرمەن، اسكەري قىزمەتشىلەردىڭ بالالارىمەن جانە «جاس ۇلان» رەسپۋبليكالىق مەكتەبىنىڭ تاربيەلەنۋشىلەرىمەن كەزدەسىپ، شەبەرلىك ساباقتارىن وتكىزىپ، كەزدەسۋگە قاتىسۋشىلارىمەن تىلدەستى.
سپورتشىلار 35748 اسكەري ءبولىمىنىڭ بازاسىندا «سپورتتىق اللەياعا» اعاش وتىرعىزۋ ءداستۇرىن قالىپتاستىرعاندارىن اتاپ وتكەن ءجون. اۋىر اتلەتيكا بويىنشا ا و س ك شتاتتىق كومانداسىنىڭ سپورتشىسى رۋستەم سىباي: «ماعان بۇگىنگى كەزدەسۋ قاتتى ۇنادى. بالالارعا دا، ساربازدارعا دا سپورت شىن مانىندە قىزىقتى ەكەندىگى كورىنىپ تۇر. وسىنداي ەنەرگەتيكانى سەزىنگەندە، ءوزىڭ دە ءجۇز پايىز بەرىلەسىڭ. ومىرىڭدە بولىپ وتكەن قىزىقتى وقيعالاردى ەسكە الىپ، سەزىمدەرىڭمەن بولىسكىڭ كەلەدى. ءبىزدىڭ وسىندا كەلگەن ماقساتىمىز - جاس ۇرپاق بىزدەن ۇلگى الىپ، سپورتتى جانە سالاماتتى ءومىر سالتىن تاڭداسا ەكەن دەگەن وي»، - دەدى.
«سپورتتىق دەسانت» اكسياسى سالاماتتى ءومىر سالتىن ناسيحاتتاۋدىڭ ەرەكشە ءتۇرى بولىپ تابىلادى جانە جاس ۇرپاقتى اسكەري-پاتريوتتىق رۋحتا تاربيەلەۋدى نىعايتۋعا ەلەۋلى ۇلەس قوسادى. الداعى ۋاقىتتاردا اكسياعا قاتىسۋشىلار ءوز جۇمىستارىن ق ر قارۋلى كۇشتەرىنىڭ باسقا دا اسكەري بولىمدەرى مەن مەكەمەلەرىندە جالعاستىرىپ، وسىنداي كەزدەسۋلەر وتكىزەدى.