قازاقستاندا جوعارى وقۋ ورنى ديپلومىنىڭ قۇنى قانشا؟
وسىعان وراي قازاقپارات قازاقستاننىڭ جوعارى وقۋ ورىندارى قاۋىمداستىعىنىڭ مالىمەتتەرىنە سۇيەنە وتىرىپ، مەملەكەتتىك گرانتقا ىلىگە الماعان تالاپكەر اقىلى وقۋعا تۇسەر بولسا، اتا-اناسىنىڭ قالتاسىنا قانشالىقتى سالماق تۇسىرەتىندىگىن ساراپتاپ كورۋگە تىرىسقان بولاتىن.
بىردەن ايتا كەتەرلىگى، ەلىمىزدەگى وقۋ اقىسى ەڭ جوعارى ءبىلىم وردالارى قاتارىندا ءالى كۇنگە دەيىن «قازاقستان مەنەدجمەنت، ەكونوميكا جانە بولجاۋ ينستيتۋتى»، «قازاق-بريتان تەحنيكالىق ۋنيۆەرسيتەتى» جانە ۇلتتىق ۋنيۆەرسيتەتتەر تۇر.
سونىمەن قازاقستان مەنەدجمەنت، ەكونوميكا جانە بولجاۋ ينستيتۋتىندا 2016-2017 وقۋ جىلىندا ءبىلىم الۋ اقىسى بارلىق ماماندىقتاردا بىردەي 2 ميلليون 70 مىڭ تەڭگەنى قۇرايدى. قازاق- بريتان تەحنيكالىق ۋنيۆەرسيتەتىندەگى وقۋ اقىسى ق م ە ب ي- گە قاراعاندا ءبىرشاما تومەن. ماسەلەن، اقپاراتتىق تەحنولوگيا فاكۋلتەتىندە وقىعىڭىز كەلسە، 1 ميلليون 520 مىڭ تەڭگە شىعىنداۋىڭىزعا تۋرا كەلەدى.
ماتەماتيكا جانە كيبەرنەتيكا مەن قارجى ماماندىقتارىن يگەرۋ قۇنى دا سول شامالاس. ال ەكونوميست بولامىن دەسەڭىز، 1 جىلدا 1 ميلليون 800 مىڭ تەڭگە تولەيسىز. ءال-فارابي اتىنداعى قازاق ۇلتتىق ۋنيۆەرسيتەتىندەگى ورتا وقۋ قۇنى 900 مىڭ تەڭگەنى قۇرايدى. بۇل رەتتە زاڭگەرلىك ماماندىعىن الامىن دەسەڭىز، جىلىنا 990 مىڭ، ەكونوميكاعا 890-990, ماتەماتيكاعا 820-850, حالىقارالىق قاتىناستارعا 990 مىڭ تەڭگە تولەيسىز.
ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىندەگى وقۋ قۇنى 710-780 مىڭ تەڭگە ارالىعىندا. بۇل ۋنيۆەرسيەتتەگى ەڭ قىمبات ماماندىقتار قاتارىندا حالىقارالىق قۇقىق، حالىقارالىق قاتىناستار، ەكونوميكا، قارجى، ەسەپ جانە اۋديت بار. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىندە «ستوموتولوگيا»، «جالپى مەديتسينا» ماماندىعىن الىپ شىعۋ ءۇشىن جىلىنا 847 مىڭ، ال «فارماكولوگيا» ماماندىعى ءۇشىن 770 مىڭ تەڭگە تولەيسىز. جۇرگەنوۆ اتىنداعى قازاق ۇلتتىق ونەر اكادەمياسىنىڭ اعىمداعى وقۋ جىلىنداعى جىلدىق وقۋ قۇنى 600 مىڭ تەڭگەگە تەڭ بولسا، قازاق قىزدار پەداگوگيكالىق ۋنيۆەرسيتەتىندە اقىلى ءبىلىم العىسى كەلگەندەر جىلىنا 360 مىڭنان 443 مىڭ تەڭگەگە دەيىن شىعىنداۋىنا تۋرا كەلەدى. قاراعاندى مەملەكەتتىك تەحنيكالىق ۋنيۆەرسيتەتىندەگى ورتاشا وقۋ قۇنى - 340 مىڭ تەڭگە.
بۇل ۋنيۆەرسيتەتتەگى ەڭ قىمبات ماماندىقتاردىڭ ءبىرى ساۋلەت ونەرى سانالادى. ءدال وسى ۋنيۆەرسيتەتتە اتالعان ماماندىقتى الىپ شىعامىن دەسەڭىز جىل سايىن قالتاڭىزدا 372 مىڭ تەڭگە بولۋى كەرەك. س. سەيفۋللين اتىنداعى قازاق اگرارلىق-تەحنيكالىق ۋنيۆەرسيتەتىندە ەكونوميكا ماماندىعىندا ءبىلىم الۋ 374 مىڭ، ساۋلەت جانە ديزاين 373 مىڭ، اقپاراتتىق تەحنولوگيا 360 مىڭ تەڭگەنى قۇرايدى.
ايتا كەتەرلىگى، ەلىمىزدەگى جەكەمەنشىك جوعارى وقۋ ورىندارىنىڭ جىلدىق وقۋ اقشاسى ۇلتتىق ۋنيۆەرسيتەتتەرگە قاراعاندا الدەقايدا تومەن. ماسەلەن، م. ساپاربايەۆ اتىنداعى وڭتۇستىك قازاقستان گۋمانيتارلىق ينستيتۋتىندا زاڭگەر، قارجىگەر ماماندىقتارىندا وقۋ اقىسى جىلىنا نەبارى 150 مىڭ تەڭگە عانا.
ادەتتە، ەلىمىزدىڭ جوعارى وقۋ ورىندارىنداعى وقۋ اقىسى جىلىنا شامامەن 10-15 پايىزعا ارتىپ وتىراتىندىعى بەلگىلى. دەگەنمەن كوپتەگەن كەيبىر جەكەمەنشىك ج و و- لار ستۋدەنتتەردى كوپتەپ تارتۋ ءۇشىن وقۋ اقىسىن وزگەرتپەيدى. جالپى، جوعارى وقۋ ورىندارىندا اقىلى تۇردە ءبىلىم بەرۋ قۇنى ەلىمىزدىڭ «ءبىلىم تۋرالى» زاڭىنا سايكەس بەلگىلەنەدى. ول مەملەكەتتىك گرانت كولەمىنەن ارزانعا تۇسپەۋى ءتيىس. ال مەملەكەتتىك گرانت كولەمى جىل سايىن قازاقستان ۇكىمەتىنىڭ قاۋلىسىمەن بەكىتىلەدى. ازىرشە كەلەسى وقۋ جىلىنا ونىڭ كولەمى بەكىتىلگەن جوق.