مەملەكەتتىك قىزمەتتە جالاقى از، ال تالاپ كوپ - مامىرايەۆ

استانا. قازاقپارات - «قازاقستاننىڭ مەملەكەتتىك- جەكەشەلىك ورتالىعى» ا ق ءتوراعاسىنىڭ ورىنباسارى، «بولاشاق» باعدارلاماسىنىڭ تۇلەگى عالىمبەك مامىرايەۆتىڭ ويىنشا، الداعى ۋاقىتتا مەملەكەتتىك قىزمەت جۇيەسى وزگەرەتىن بولادى.

وعان قازىرگى رەفورمالار دا اسەر ەتەدى، دەپ حابارلايدى قازاقپارات ءتىلشىسى.

«اشىعىن ايتۋ كەرەك، مەملەكەتتىك قىزمەتتە جۇرگەن ادامدار وتە از اقشا الادى. ءبىز ولاردىڭ جالاقىسىن از تولەيمىز دە، كوپ نارسەنى تالاپ ەتىپ وتىرامىز. بۇگىندە ادامداردىڭ الىپ جاتقان اقشاسىنان ارتىق نارسەنى تالاپ ەتە المايتىنىمىزدى تۇسىنەتىن كەز كەلدى. ونداي جۇيە لوگيكاعا قايشى جانە ەكونوميكا زاڭدارىنا كەرەعار. ادامدارعا ستيمۋل كەرەك. ءيا، كەيبىرەۋلەر اقشا ماڭىزدى ەمەس، مەن يدەيا ءۇشىن جۇمىس ىستەپ جاتىرمىن دەيدى. دەگەنمەن، 50 مىڭ الىپ، جاڭا يدەيا تابۋ مۇمكىن ەمەس. تولىققاندى ءومىر سۇرمەسەڭ، تولىققاندى جۇمىس تا ىستەي المايتىنىڭ بەسەنەدەن بەلگىلى»، - دەدى عالىمبەك مامىرايەۆ بۇگىن پرەزيدەنتتىڭ جولداۋىنا ارنالعان جيىندا.

وسى ورايدا «بولاشاقتىڭ» تۇلەگى سينگاپۋردىڭ تاجىريبەسىن مىسال رەتىندە كەلتىردى. ول جاقتا حالىق ءوز جالاقىسىنىڭ ءبىراز بولىگىن زەينەتاقىعا، دەنساۋلىق ساقتاۋ جۇيەسىنە سالىپ قويىپ وتىرادى. ارتىنان ول اقشانى كۇندەلىكتى قاجەتتىلىكتەرگە، ءتىپتى باسپانانى ساتىپ الۋعا جۇمسايدى. «ارينە، ول ءۇشىن حالىقتىڭ تابىسى جوعارى بولۋى ءتيىس. ول جايىندا ءاربىر جولداۋدا ايتىلىپ وتىرادى. وسى تۇرعىدا ءبىراز شارالار دا اتقارىلىپ كەلەدى. شىن مانىندە، حالىقتىڭ تابىسى نومينالدى تۇردە وتە جاقسى ءوستى. دەگەنمەن، شىن جاعدايدا ولاي ەمەس»، - دەپ اتاپ كورسەتتى مامىرايەۆ.

وسىدان كەيىن ول «بولاشاق» باعدارلاماسىمەن وقۋعا تۇسكەلى جاتقان جانە وقىپ جۇرگەن جاستارعا قازاقستانعا ورالعاننان كەيىن كوپ جالاقى الامىن دەپ ۇمىتتەنبەۋگە كەڭەس بەردى.

اۆتور: ارمان اسقاروۆ