بۇگىن «قازاق ەلى» سەريالىنىڭ العاشقى ءبولىمى - «الماس قىلىش» پروكاتقا شىقتى

استانا. قازاقپارات - بۇگىن قازاقستاندىق كينوتەاترلاردا جازۋشى ءىلياس ەسەنبەرليننىڭ «كوشپەندىلەر» تريلوگياسى بويىنشا تۇسىرىلگەن «قازاق ەلى» جوباسىنىڭ العاشقى ءبولىمى - «الماس قىلىش» فيلمى كورسەتىلە باستادى، دەپ حابارلايدى قازاقپارات ءتىلشىسى.

فيلم سەناريىن جازعان - سماعۇل ەلۋباي. وندا ءىلياس ەسەنبەرليننىڭ «الماس قىلىش» رومانى نەگىزگە الىندى. رەجيسسەر رۇستەم ابدىراشەۆتىڭ ايتۋىنشا، «الماس قىلىشتى» تۇسىرۋگە ەكى جىل ۋاقىت كەتكەن.

فيلمدى ءتۇسىرۋ جۇمىستارىنا مىڭداعان ادام تارتىلعان. فيلمنىڭ ءتۇپنۇسقاسى تولىعىمەن قازاق تىلىندە، اراسىندا جوڭعار تىلىندە جانە سولتۇستىك موڭعول ديالەكتىسى بار. پروكاتقا ورىس ءتىلدى نۇسقاسى دا ازىرلەندى.

«بىزدە ماتەريالدىڭ ۇلكەن قورى جيناقتالدى. سوندىقتان فيلمنىڭ جالعاسى مىندەتتى تۇردە بولادى»، - دەيدى ر. ابدىراشەۆ.

تاريحي جوبانىڭ اۆتورى - ق ر پرەزيدەنتى ن. نازاربايەۆ. فيلم ق ر مادەنيەت جانە سپورت مينيسترلىگىنىڭ تاپسىرىسى بويىنشا ش. ايمانوۆ اتىنداعى «قازاقفيلم» ا ق «Centaurus Rustem Abdrashev production»  ج ش س- نىڭ قاتىسۋىمەن تۇسىرىلگەن.

ايتا كەتەيىك، بۇعان دەيىن «الماس قىلىش» فيلمىنىڭ تۇساۋكەسەر كورسەتىلىمى استانا مەن الماتى قالالارىندا وتكەن. وعان قاتىسقانداردىڭ بارلىعى جاڭا كينوتۋىندىعا جوعارى باعا بەرگەن. پرەزيدەنت نۇرسۇلتان نازاربايەۆ تا اتالعان فيلمدى «قازاق حالقىنىڭ ۇلتتىق سانا-سەزىمىن كوتەرەتىن تۋىندى» دەپ باعالادى.

اۆتور: ارمان اسقاروۆ