بولاشاقتا «قازاق ەلى» انيماتسيالىق فيلمى تۇركيا تەلەارنالارىندا كورسەتىلەدى

None
None
شىمكەنت. قازاقپارات - بولاشاقتا «قازاق ەلى» انيماتسيالىق فيلمى شەتەلدىك كورەرمەنگە جول تارتۋى مۇمكىن.

ازىرگە، وتاندىق ءونىمدى 80 ميلليون اۋديتورياسى بار تۇرىك تىلىنە اۋدارۋ كوزدەلىپ وتىر. يگى باستامانى شىمكەنتتەگى «ساق» كينوستۋدياسى مەن «وڭتۇستىك- فيلم» مەملەكەتتىك مەكەمەسى جۇزەگە اسىرادى. بۇل تۋرالى بۇگىن وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ وتاندىق فيلمدەر جاساۋمەن اينالىساتىن ستۋديامەن تانىسۋ بارىسىندا ءمالىم بولدى، دەپ حابارلايدى قازاقپارات ءتىلشىسى.

قازاق ەلىنىڭ تاريحي تاعدىرىن بەينەلەيتىن مۋلتفيلم ەلىمىزدە العاش رەت ق ر مادەنيەت جانە سپورت مينيسترلىگىنىڭ تاپسىرىسى نەگىزىندە دايىندالعان. «بۇگىنگى باستامالارىڭىز تەرەڭ تالقىلاۋدى قاجەت ەتەدى. جوبالارىڭىزدى ءالى دە پىسىقتاي تۇسىڭىزدەر. ناقتى ستسەنارييلەرىڭىزدى الداعى ۋاقىتتا بىرگە قاراپ، ءوز تاراپىمىزدان قولداۋ بىلدىرەتىن بولامىز. ال «قازاق ەلى» انيماتسيالىق تولىقمەتراجدى تۋىندىلارىڭىزدى تۇركيا مەملەكەتىندەگى ءتيىستى ورىندارمەن كەلىسىم جۇرگىزۋ ارقىلى وڭتايلى شەشەمىز»، - دەدى وبلىس اكىمى ج. تۇيمەبايەۆ. «ساق» كينوستۋدياسىنىڭ باس ديرەكتورى نۇريددين پاتتەيەۆ وبلىس اكىمىنە «كونە جەتىگەننىڭ سىرى»، «وتىراردى قورعاۋ»، «قاجىمۇحان»، سىندى تاريحي ورىندار مەن تۇلعالار تۋرالى تۇسىرىلەتىن انيماتسيالىق فيلمدەردىڭ جەلىسىن جان- جاقتى بايانداپ بەردى. سونداي- اق ول احمەت ياساۋي بابامىز بەن كۇش اتاسى قاجىمۇحاننىڭ تۇلعاسىن تانىتاتىن مۋلتفيلمىن ءتۇسىرۋ جوباسىمەن تانىستىرىپ، قولداۋ كورسەتۋىن سۇرادى. 15 جىلدىق تاريحى بار «ساق» كينوستۋدياسى بۇعان دەيىن «قازاق ەلى»، «ساپا وليمپياداسى»، «قوشقار مەن تەكە»، «مومىن مەن قاراقشى» سىندى 50 دەن استام انيماتسيالىق تۋىندىلار دايىنداعان. ال، 25 سەريالى «تومپاق» فيلمى كورەرمەننىڭ ايرىقشا ىقىلاسىنا بولەنگەن. ايماق باسشىسى جانسەيىت تۇيمەبايەۆ مۋلتيپليكاتسيالىق تاريحي فيلمدەر ارقىلى وڭىرىمىزگە كەلەتىن شەتەلدىك تۋريستەردىڭ قاتارىن ارتىرۋعا بولاتىنىن ايتتى.

الماس سۇلتان

سوڭعى جاڭالىقتار