قازاق مەنتاليتەتىنە جات سوزدەر
7 جەلتوقسان 18:14

قازاق مەنتاليتەتىنە جات سوزدەر

نۇر- سۇلتان. قازاقپارات - «فرانسۋزداردا مىناداي ءسوز بار»، «جاپون حالقى بىلاي دەگەن ەكەن» دەپ جاتامىز، الايدا ول ءسوز نەدەن شىققانىن، ءتۇپ- توركىنىن تانىماي جاتىپ، ءومىرىمىزدىڭ وزەگىنە اينالدىرىپ العانىمىز ابەستىك بولار.

سوندىقتان قازاق مەنتاليتەتىنە جات سوزدەردى نازارلارىڭىزعا ۇسىنامىز.

«بىلگەنىڭدى ىستە». وزگە ەلدەردىڭ كوپشىلىگى ەركىن ءومىر سۇرەدى. قىسقا عۇمىردا قالاۋىڭدى ىستە، ءومىرىڭ وزىڭدىكى، ەشكىمگە بيلەتپە دەيدى كەي جۇرت. ءومىر وزىمىزدىكى بولعانىمەن، ءبىز قوعامنىڭ بولشەگىمىز. ءىس- ارەكەتىمىز ەشكىمگە كەسىرى تيمەۋى ءتيىس...

«ايتا بەرسىن». جوعارىدا جازىلعان جولداردىڭ جالعاسى «كىم نە دەسە دە، ەشكىمنىڭ سوزىنە قۇلاق اسپا» دەپ كەلەدى. بۇل ءسوز كەي جاعدايلارعا عانا جارايدى، جارامسىز تۇستارى دا جەتەرلىك. باستاعان ءىسىڭىز ونبەيتىنىن، قولىڭىزدان تۇك كەلمەيتىنىن ايتىپ، تاۋىڭىزدى شاققىسى كەلەتىندەردىڭ نەمەسە ورىندى-ورىنسىز سىناپ-مىنەيتىندەردىڭ سوزىنە ءمان بەرمەۋ كەرەك. ال كىم نە دەسە دە ماعان ءبارىبىر دەپ، ويعا كەلگەننىڭ ءبارىن ىستەپ شەكتەن شىعۋ قازاق ۇعىمىنا جات. سەبەبى ءار قازاق بالاسىن «ۇيات بولادى» دەپ وسىرەدى.

«تاۋىسا جەمە». كەيبىر ادامدار تاماق جەگەندە مىندەتتى تۇردە تارەلكە تۇبىندە اس قالۋى كەرەك، ول تويعان بەلگىسى دەپ ۇعىنادى. بۇل ءسوز دە شەتەلدەن كەلگەن. تالاي اشارشىلىقتىڭ قۇربانى بولعان قازاقتىڭ ۇرپاعى ءار ازىقتىڭ قادىرىنە جەتكەن. «جاماننان جارتى اياق اس قالادى» دەپ، تاماقتى تارەلكەسىنە شاقتاپ سالىپ الادى دا، تاۋىسىپ جەيدى.

«قولىڭنان كەلەتىن ءىستى تەگىن جاساما». امەريكا جۇرتى دجوكەردىڭ اۋزىنا سالىپ بەرگەن بۇل ءسوز دە قازاققا جات. مەيلى ون ساۋساعىنان ونەر تامعان ۇستا بولساڭىز دا، بۇل ءسوزدى ۇستانىم ەتۋگە بولمايدى. ءبىر اتىم ناسىبايدان كوڭىلى قالاتىن حالقىمىزعا تانىسىنان مۇنداي ءسوز ەستىسە، سىيلاستىققا سىزات تۇسەدى. «شەبەردىڭ قولى ورتاق»، شەبەرلىگىڭىزگە سۇيسىنگەن ەل سۇراتپاي، نەسىبەڭىزدى ءوزى-اق بەرەدى.

«قۇقىعىڭدى قورعا». بۇل ارەكەت ءجون-اق، ارينە. كەز كەلگەن جەردە وزىمىزگە تيەسىلىنى تالاپ ەتىپ، قاجەتىمىزدى الۋعا بولادى. ءبىراق «مەنىڭ حاقىم بار» دەپ ادەپتەن وزىپ، ادامدىقتان اتتاپ كەتۋگە دە بولمايدى. قويداي قوڭىر، قوزىداي مومىن حالىق ايۋداي اقىرعان مىنەزگە دە ۇركە قارايدى. قازاق قۇقىعىنا قاراعاندا، يناباتتىلىق، ىزەتتىلىك، ۇلكەندى قۇرمەتتەۋ قاسيەتتەرىن جوعارى باعالايدى.

massaget.kz

جاڭالىقتار