ءازىلحان نۇرشايىقوۆتىڭ قازاق قىزدارىنا ايتقان ەكى وسيەتى
ءبىرىنشى وسيەت:
قىزدار! جاندارىڭدا جۇرگەن جىگىتتەردى اقىلمەن، ادەپتىلىكپەن، سىپايى مىنەزبەن، سۇيكىمدى نازبەن تىزگىندەي بىلىڭدەر. جىگىتتەردىڭ جۇلقىنعان اساۋ جۇرەگىن ادامگەرشىلىك اسىل قاسيەتتەرمەن بۇيدالاپ الىپ، ولارعا ايتقاندارىڭدى ىستەتىڭدەر: اراق ىشكىزبەڭدەر، ايقايعا جۋىتپاڭدار.
ولاردى تۇنگى ون ەكىدە ماس بوپ رەستوراننان قايتىپ، تىنىمداپ جاتقان جۇرتتىڭ شىرقىن بۇزىپ، تەرەزەسىنىڭ تۇبىنەن تەكەدەي باقىلداپ ولەڭ ايتىپ وتپەيتىن ەتىڭدەر.
ويتكەنى قىز جەتەكتەسە ىلەسپەيتىن، قىز قيىلسا كونبەيتىن جىگىت جوق بۇل دۇنيەدە. ويتكەنى اقىل انادان تارايدى، ادامگەرشىلىك ايەلدەن باستالادى، قىزدان - قىلىق، تاربيە، ءتالىم تۋىندايدى. وزدەرىڭە تابيعات سىيلاعان وسى ءبىر وزگەشە ونەرلەرىڭدى قاستارىڭدا قاۋمالاپ جۇرگەن جىگىتتەرگە يگى اسەر ەتۋگە جۇمساڭدار.
جىگىت - جانىڭدا جۇرسە جولداسىڭ، جاۋعا جۇمساساڭ - جولبارىسىڭ. جىگىت - ورتادا جۇرسە ورمانىڭ، شەتكە شىقسا - قورعانىڭ. قورعانىڭ، قورمالىڭ سەنىڭ! جىگىتتەردەن جىلى كۇلكى، جۇمساق ازىلدەرىڭدى اياماڭدار. ءبىراق ولاردى جۇرت كوزىنشە ءسۇيىسىپ، سۇيكەنىسىپ تۇرۋعا ۇيرەتپەڭدەر! ولاردى جارباڭداتىپ، جابىسا قۇشاقتاتپاڭدار.
ادامنىڭ اسىل ماحاببات سەزىمىن ارداقتاپ، بۇركەپ، قىمتاپ ۇستاۋعا باۋلىڭدار. ولاردى ءناپسىسىن تىيىپ، نامىسىن بيىك ۇستاۋعا تاربيەلەڭدەر. ءسويتىپ، ولارمەن تاتۋ، دوس، قيماس قۇربى بولىپ وسىڭدەر، شىراقتارىم! ءومىردىڭ قىزىق ءلاززاتى - ادال دوستىق، اينىماس قامقورلىق، اسىل ماحابباتتا ەكەنىن ءارقاشان دا ەستەرىڭدە ساقتاڭدار.
ەكىنشى وسيەت:
قىزدار! ەگەر سۇيگەن جىگىتتەرىڭە سۇيىكتى جار بولامىن دەسەڭدەر، ەڭبەكشىل بولىڭدار! ەگەر اتا-ەنەگە قىمباتتى كەلىن بولامىن دەسەڭدەر، ەڭبەكشىل بولىڭدار! ەگەر ەرتەڭ شاكىرتتەرىڭە ۇلگىلى ۇستاز بولامىن دەسەڭدەر، ەڭبەكشىل بولىڭدار!
وزدەرىڭدى الاقانعا سالىپ، الپەشتەپ وتىرعان قوعامعا ادال پەرزەنت، اسىل ازامات بولامىن دەسەڭدەر، ەڭبەكشىل بولىڭدار! ەگەر ەرتەڭ، ەگدە تارتقاندا، كەلىستى انا، كەمەڭگەر اجە بولامىن دەسەڭدەر، ەڭبەكشىل بولىڭدار! ادەمى بولىڭدار، اسەم بولىڭدار! سونىمەن بىرگە اقىلدى بولىڭدار! سۇلۋ بولىڭدار، سىمباتتى بولىڭدار! سانالى بولىڭدار! ەڭ الدىمەن ەڭبەكشىل بولىڭدار! ەڭبەكشىل ادام - ەڭ ارداقتى ادام. دۇنيەدە ەڭ سۇلۋ ايەل - ەڭبەكشىل ايەل.
ەڭبەكشىل ايەل - ەرگە سۇيىكتى، ەلگە سۇيكىمدى، وتباسىعا سىيلى. ... ءوڭدى قىز ءوتىمدى قىز بولعانىمەن، ءتۇپتىڭ تۇبىندە ەستى، ەڭبەكشىل قىز عانا جاقسى جىگىتتى وكىندىرمەي ەڭ اسىل جار، جان سەرىك بولا الادى.
قىزدار! ۇيقىشىل بولماڭدار، ۇمىتشاق بولماڭدار، ۇرىسقاق بولماڭدار! يناباتتى بولىڭدار، ءىلتيپاتتى بولىڭدار، ۇيىمشىل بولىپ وسىڭدەر! ... اپيىن ىشكەندەي ەلتىپ، سانگە ەلىكتەي بەرمەڭدەر. «جىلتىراعاننىڭ ءبارى التىن ەمەس» دەگەندەي، جارقىراعاننىڭ ءبارى بىردەي ءسان ەمەس. ولاردىڭ ىشىنەن تەك ءوز بويىڭا قونىمدىسى، ءوز دەنەڭە جاراسىمدىسى، سىرت كوزگە دە وعاش كورىنبەيتىن ۇنامدىسى عانا ءسان.
ەندەشە، وزدەرىڭە نە جاراسىپ، نە جاراسپايتىنىن بىلىڭدەر. كورسە قىزار بولماڭدار! قول جەتپەسكە تىراشتانباڭدار! قۇر ءسانقويلىقتان ساقتانىڭدار. سانانى سانگە ەمەس، ءساندى ساناعا باعىندىرىڭدار.
قىزدار! جەلكىلدەگەن جەڭىلتەك بولماڭدار! جەلپىلدەك قىزدى جەبىر جىگىتتەر جەنتەكتەپ اۋىزدارىنا ءبىر-اق قىلعىتا سالۋعا قۇمار كەلەتىنىن ۇعىڭدار، ۇمىتپاڭدار... سابىرلى بولىڭدار، ساليقالى بولىڭدار، سالاۋاتتى بولىڭدار، قاراقتارىم!
قىزدار!
سۇق كوزدەن ساقتانىڭدار. سۇلۋ سوزدەن ساقتانىڭدار. شىنايى ماحاببات ماقتاۋدى قاجەت قىلمايدى. ورىنسىز ماقتاۋدان ساقتانىڭدار، ابىرويدان اتتاۋدان ساقتانىڭدار! پاك بولىڭدار! پاك بولۋ ءۇشىن ساق بولىڭدار، باۋىرلارىم! الايدا، قازىر سەندەردىڭ جىگىتتەردەن كوز المايتىن، جىگىت جاققا قارايلاپ كوپ قارايتىن شاقتارىڭ عوي بۇل كەز.
قاراعاندا ولاردىڭ سىر-سيقىنا، كيگەن كيىمىنە، رەستوراندا قالتالارىنان شىتىرلاتىپ شىعارعان اقشالارىنا قاراماڭدار، قاراقتارىم. ءوڭدى قىزدىڭ ءبارى ءجوندى قىز بولا بەرمەيتىنى سياقتى، جىلتىراعاننىڭ، جىمىڭداعاننىڭ، جىلپىلداعاننىڭ ءبارى بىردەي جاقسى جىگىت بولا بەرمەيدى.
جامان جىگىت بولعانىمەن، جاقسى جار بولا بەرمەيدى. سوندىقتاڭ جىگىتتەرگە قاراعاندا ولاردىڭ ىشكى دۇنيەسىنە ۇڭىلىڭدەر، ادامگەرشىلىك، ازاماتتىق ساپاسىنا كوز جۇگىرتىڭدەر...
... جىگىت تاڭداعاندا كوڭىلىڭنىڭ قوس قاناتى اقىل مەن سەزىمدى تەڭ ۇستا. تەك سۇيگەن جانعا عانا قوسىلۋ قاجەت، قوسىلعان جىگىتىڭدى ءومىر بويى ءسۇيىپ وتەتىنىڭە كامىل سەنىمىڭ بولسىن. ءوزىمشىل، وركوكىرەك جىگىتتەردىڭ وكىنىشكە ۇرىندىراتىنىن ۇمىتپاڭدار. جامان جولداستان جالعىزدىق جاقسى...
massaget.kz