استانا اسپانىندا عاجايىپ قۇبىلىس بايقالدى - فوتو
گالو قۇبىلىسى قاتتى اياز بولعان كەزدە كۇننىڭ نە ايدىڭ اينالاسىندا پايدا بولادى. شىندىعىندا، بۇل كەمپىرقوساق، ونىڭ نەگىزى كۇن ساۋلەسىنىڭ سۋدا ەمەس اۋاداعى مۇز كريستالدارىنا سىنۋى. بۇل ەرەكشە قۇبىلىستى اشىق ايازدى كۇندەرى باقىلاۋعا مۇمكىندىك بار. جالپى تابيعاتتىڭ مۇنداي ەرەكشە قۇبىلىسىن قازاق حالقى قورالانۋ دەپ اتاعان. قورالانۋ - كۇن جانە اي سەكىلدى جۇلدىزدىق نىسانداردىڭ اينالاسىندا پايدا بولاتىن، ءپىشىنى القاعا (نە ديسككە) ۇقسايتىن ايقىن كورىنەتىن جارىق جولاعى بولىپ، ول جارىقتىڭ بۇلتتاعى مۇز كريستالدارىنان سىنۋى جانە شاعىلۋى ناتيجەسىندە پايدا بولاتىن اتموسفەرالىق- وپتيكالىق قۇبىلىس. ول كوبىنەسە ساقينا ءپىشىندى، دوعا، جارىق دىڭگەگى، نۇرلى داق سەكىلدى پىشىندەردە بولىپ، كۇندى، نە ايدى قورشاپ تۇرادى. ول قىزىل، قىزعىلت سارى، جاسىل، كوك، كوگىلدىر، كۇلگىن سەكىلدى 7 ءتۇرلى ءتۇستىڭ قاباتتاسۋى بولىپ كورىنۋى مۇمكىن.
اتا- بابالارىمىز قورالانۋدىڭ كۇننىڭ توڭىرەگىندە كورىنگەنىن «كۇن قورالانۋى» ، ايدىڭ توڭىرەگىندە كورىنگەنىن «ايدىڭ قورالانۋى» دەپ اتاعان. بۇدان باسقا كۇننىڭ قاسىنان قاتارلاسقان كۇن پايدا بولسا ونى ساعىم كۇن دەپ اتاعان. اتموسفەراداعى مۇز كريستالدارىن تۇيدەك بۇلتتار اكەلەدى، ولارعا كۇن (اي) ساۋلەسى شاعىلىسقاندا ادام كوزىنە ءىشى قىزىل، سىرتى كۇلگىن ساقينا ءپىشىندى جارىقتار كورىنەدى. ال، ەگەر سۋ تامشىلارى كۇنگە شاعىلىسسا، ودان كوبىنەسە كەمپىرقوساق سەكىلدى قۇبىلىستار تۋىلاتىنى بەلگىلى. مۇنداي قۇبىلىس وسى جىلدىڭ قاڭتار ايىندا قاراعاندى وبلىسىندا، ال قاراشادا ەلوردا كوگىندە بايقالعان ەدى.
«كۇن قورالانسا كۇرەگىڭدى سايلا، اي قورالانسا اياعىڭدى سايلا» ، دەپ ايتاتىن مامام ىلعي. ءبىراق ىلعي ايدىڭ قورالانىپ تۇرعانىندا ايتاتىن، كۇننىڭ مىنانداي بەينەسى بۇرىن كورمەپپىن.. . قالىڭ قار جاۋاتىن سياقتى شاماسى» ، - دەپ جازادى الەۋمەتتىك جەلى قولدانۋشىلاردىڭ ءبىرى.
اۆتور: مارلان جيەمباي