قازاقستان كەڭەس وداعى كەزىندە ەگەمەندى بولماسا دا، مەملەكەت بولعانىن مويىنداۋىمىز كەرەك - الەكساندر اگەيەۆ

نۇر- سۇلتان. قازاقپارات - قازاقستان كەڭەس وداعى كەزىندە ەگەمەندى بولماسا دا، مەملەكەت بولعانىن مويىنداۋىمىز كەرەك، - دەدى رەسەي فەدەراتسياسى ەكونوميكالىق ستراتەگيالار ينستيتۋتىنىڭ ديرەكتورى، پروفەسسور الەكساندر اگەيەۆ.

«مۇنى ۇمىتپاۋ كەرەك. مەملەكەت جۇزدەگەن، مىڭداعان جىل بۇرىن پايدا بولعان. قازاقستاننىڭ كۇش- قۋاتى ءار ۋاقىتتا تۇرلىشە بولعان. مىسالى، قاسىم حان مەن ەسىم حاننىڭ تۇسىندا قازاقستان ۇلى وڭىرلىك دەرجاۆا مارتەبەسىنە دەيىن كوتەرىلگەن. رەسەي يمپەرياسىنىڭ قۇرامىندا بولعان شاقتا ءارتۇرلى كەزەڭدەردى وتكەرگەن. قازاقستان كەڭەس وداعى كەزىندە ەگەمەندى بولماسا دا، مەملەكەت بولعانىن مويىنداۋىمىز كەرەك»، - دەدى اگەيەۆ.

ونىڭ ايتۋىنشا، ينستيتۋتتاعى زەرتتەۋ ناتيجەلەرى 1981 -جىلى قازاقستاننىڭ ك س ر و قۇرامىندا بولعاندا وڭىردەگى بەدەلدى ەل بولعاندىعىن، 1991 -جىلى باسقا مەملەكەتتەر سەكىلدى السىرەگەنىن كورسەتكەن. پروفەسسور قازاقستاننىڭ شالعايداعى مەملەكەت بولعان دەگەن پىكىرمەن كەلىسپەيتىنىن باسىپ ايتتى. سەبەبى، رەسپۋبليكا بايقوڭىر عارىش ايلاعىنىڭ، ۋران مەن سيرەك مەتالداردىڭ كەن ورنى ماسكەۋدىڭ باقىلاۋىندا ۇستاعانىنا قاراماستان، كەڭەس وداعىنداعى دامىعان ەلدەردىڭ ءبىرى بولعان. 1991 -جىلعا دەيىن قازاقستان جەتەكشى ونەركاسىپتىك- اگرارلىق مەملەكەت رەتىندە قالىپتاسقان. قازىرگى تاڭدا ەلدىڭ بارلىق سالالارى جاقسى دامىعان.