جاپونيادا ءتىلالعىش جانە اقىلدى بالالاردى قالاي تاربيەلەيدى؟
الدىمەن - قوعام مۇددەسى، سودان كەيىن عانا - وزىندىك مۇددە.
جاپونيالىق بالالاردىڭ ورتاق تۋعان كۇنى بار. ونى بۇكىل مەملەكەت بولىپ اتاپ ءوتۋ داستۇرگە اينالعان. قاراشانىڭ 15 - جۇلدىزىندا اعىمداعى جىلى 3, 5 نەمەسە 7 جاسقا تولعان بالالار ءۇشىن سيتي- گو- سان مەرەكەسى اتاپ وتىلەدى. ونىڭ اۋدارماسى «جەتى- بەس- ءۇش» ماعىناسىنا سايادى. جاپونيادا تاق ساندار تىلىسم بولىپ سانالادى. ال ولارعا سايكەس جاس ەسەيۋدىڭ ماڭىزدى، وزگەرىستى كەزەڭدەرىن بىلدىرەدى.
زاماناۋي جاپون مادەنيەتىندەگى بالالاردىڭ ۇلتتىق مەيرامدارىنىڭ ءتۇپ باستاۋى جەكە تۇلعا مۇددەسى ەسكەرىلمەيتىن ءداستۇرلى اۋىل قاۋىمىندا جاتىر. بۇگىندە ۇلكەن قالالاردا ءومىر ءسۇرىپ جاتسا دا، بالالارىن ءداستۇرلى ءادىس بويىنشا تاربيەلەۋدى قۇپ كورەدى. بۇل ءداستۇر بويىنشا ولار وزگەلەرمەن بىرگە ءومىر سۇرۋگە، ءوز مۇددەسىنەن قوعام مۇدەسسىن جوعارى قويۋعا داعدىلانۋى ءتيىس. جاپونيا حالقى مۇنداي ءادىستى قوعام مەن مەملەكەتتىڭ ءبىرتۇتاستىعى، ۇيلەسىمدىلىگى ءۇشىن اسا ماڭىزدى دەپ بىلەدى. ياعني جاپوندار ءوز بالالارىن قوعامنىڭ ءبىر بولىگى بولۋعا ۇيرەتەدى.
بالالار اتا- اناسىنىڭ مىنەز- قۇلقىن قايتالايدى
جاپونيالىق يكۋدزي تاربيە جۇيەسى تۇتاستاي وسى پىكىرگە قۇرىلعان. بۇل رەتتە اتا- انالاردىڭ بالاسىمەن جىلى، ەركەلەتىپ سويلەۋى، ايقايلاپ ۇرىسپاۋى ماڭىزدى. وسىلايشا ولار بالاسىن وزگەلەردى سىيلاپ، كوڭىل- كۇيىن قاداعالاي بىلۋگە ۇيرەتەدى.
جاپونيادا بالا كۇتۋشىسى، اتا- اجە كومەگىنە جۇگىنبەيدى
جاپونيا قوعامىنىڭ تۇسىنىگى بويىنشا، ەگەر جانۇيادا نارەستە دۇنيەگە كەلسە، وعان ۋاقىتىنىڭ% 100 ىن ءبولىپ، بالا كۇتۋشىسى، اتا- اجە كومەگىنە جۇگىنبەۋى كەرەك.
بالا 2 جاسىنان باستاپ بىرنەشە ءبىلىم ۇيىرمەسىنە قاتىسادى
ەگەر بالانىڭ ءار كۇنىنىڭ ءاربىر مينۋتى الدىن- الا جوسپارلانىپ قويسا، ول - قالىپتى جاعداي ەسەبىندە. كىشكەنتاي بالالار ءبىر كۇن ىشىندە اعىلشىن ءتىلى، ەسەپ، بي، سۋرەت جانە ءان ساباقتارىنا ۇلگەرە الادى. وسىنداي جۇيەنىڭ ارقاسىندا 4 جاسار بالالاردىڭ بارلىعى ەڭ بولماسا ءبىر مۋزىكالىق اسپاپتا ويناي الادى، گرامماتيكا مەن ماتەماتيكا نەگىزدەرىن بىلەدى.
ال 5 جاسقا تولعاندا قامسىز بالالىقپەن قوشتاسادى. بالاباقشاداعى تاربيەشىلەر بارلىق ەرەجەلەرگە باعىنۋىن تالاپ ەتىپ، مەكتەپكە دايىندايدى. بۇل جەردە ەش اياۋشىلىق تانىتپايدى. ولار ءار بالاعا ارناپ جەكە داپتەر باستاپ، ساباققا كەلگەنىن، اتقارعان كەزەكشىلىگى مەن تازالىق جۇمىستارىن بەلگىلەپ وتىرادى.
تومەنگى سىنىپ وقۋشىلارىن مەكتەپ شىعارىپ سالۋعا بولمايدى
بالا 6 جاسقا تولعاندا ساباق وتەتىن جەرگە ءوزى بارۋى ءتيىس. اناسى تەك ەسىك سىرتىنا دەيىن عانا شىعارىپ سالا الادى. مۇنان ءارى بارۋعا بولمايدى. ونى كورشىلەرى مەن سىنىپتاستارى تۇسىنبەيدى. ادەتتە، بالالار مەكتەپكە اۋىزشا ساناۋ مەن جاپونيالىق بۋىن الىپپەسىن ءبىلىپ بارادى. جوعارى تەحنولوگيالار مەملەكەتىندە بالالار ەرتە جاسىنان باستاپ ويشا جىلدام ەسەپتەۋگە جاتتىعادى.
جاپوندار ەسەپ نەگىزدەرىن ەرتە باستان ۇيرەتۋ ميدىڭ ماڭداي بولىگى مەن شىعارماشىلىعىن دامىتادى. ال ءوز بەتىمەن ءومىر سۇرۋگە ۇمتىلىس تارتىپكە ۇيرەتەدى.
جاپونيالىق اتا- انالار جۇرت كوزىنشە بالالارىن ماقتامايدى
تانىستارىمەن سويلەسۋ بارىسىندا كەز- كەلگەن جاپونيالىق انا بالاسى جونىندە «مەنىڭ اقىماق بالام» دەيدى. بۇل ەپيتەتتىڭ استارىندا اتا- انانىڭ بارلىق بالانى بىردەي اقىلدى، دارىندى دەپ ساناۋى جاتىر. الايدا، مۇنىڭ بارلىعىنا قاراماستان، وتباسىدا بالانىڭ جەتىستىگىنە ايرىقشا نازار اۋدارىلادى.
Stan.kz