USD 424.84 EUR 453.6
RUB 7.3 CNY 63.91
جاڭالىقتار

بايىت قابان ۇلى. اپامنىڭ داۋىسى

29 قاراشا 17:27
:ءبولىسۋ
بايىت قابان ۇلى. اپامنىڭ داۋىسى

نۇر- سۇلتان. قازاقپارات - بەس، التى جاستارداعى كەزىم بە ەكەن. اپام قورانىڭ انا شەتىندەگى ۇيلەرگە جۇمسايدى.

«سول ۇيگە بارىپ كەل، الىپ كەل، بەرىپ كەل...» - دەگەن سىقىلدى ۇساق- تۇيەك بىردەمەلەردى سىلتاۋ ەتىپ ۇنەمى ءبىر ءىس تاپسىرادى. مەن ىركىلمەيمىن. ۇيدەن شىعىپ ءبىر ازعانا جەرگە بارىپ توقتاي قالام دا قايتا ايلانىپ:

- اپا- ا- اۋ - دەيمىن.

- ءا- ءا- ءاۋ - دەيدى اپام. اپامنىڭ داۋىسى جاقىننان ەستىلەدى. مەن قورقاتىن ەشتەمە جوق ەكەنىن ءتۇسىنىپ ارى قاراي جۇگىرىپ تاعى ءبىراز جەرگە بارام دا قايتا ايلانىپ:

- اپا- ا- اۋ - دەيمىن.

- ءا- ءا- ءاۋ - دەيدى اپام. اپامنىڭ داۋىسى انتەك الىستان اقىرىنداۋ ەستىلەدى. مەن ءسال- ءپال قورقا باستايمىن، سوندا دا ارى قاراي جۇگىرەم. بۇل كەز انا باراتىن ءۇيدىڭ ەسىگىنە تاياپ قالعانىمدى بايقايمىن. سوندا دا قايتا ايلانىپ:

- اپا- ا- اۋ - دەيمىن.

- ءا- ءا- ءاۋ - دەيدى اپام. بۇل جولى اپامنىڭ داۋىسى ەستىلەر ەستىلمەس تىم الىستان، تىم وشكىن ەستىلەدى. اپامنىڭ داۋىسى قانشالىقتى اقىرىن وشكىن ەستىلسە قورقىنىشىم سونشالىقتى ايقىندالا بەرەدى. مەن انا ۇيگە اسىپ- ساسىپ بىرەۋ ۇستاپ الارداي سۇرىنە- قابىنا كىرىپ ايتۋعا ءتيىستى «سالەمىمدى» ايتىپ، الۋعا ءتيىستى نەمەسە بەرۋگە ءتيىستى نارسەمدى بەرە سالامىن دا سول ءۇيدىڭ بەرگەن قۇرت، باۋىرساعىن قالتاما سالدىرىپ الىپ قايتادان دالاعا شىعىپ جۇگىرە جونەلەم. سول جۇگىرگەن قالپىمدى وزگەرپەي:

- اپا- ا- اۋ - دەيمىن.

- ءا- ءا- ءاۋ - دەيدى اپام. اپامنىڭ داۋىسى ۇزاقتان ءالسىز ەستىلەدى. قورقىنىشىم سول باياعى قالپىندا ارى قاراي ءتىپتى تەز جۇگىرىپ تاعى ءبىراز جەرگە كەلەم دە:

- اپا- ا- اۋ - دەيمىن.

- ءا- ءا- ءاۋ - دەيدى اپام. اپامنىڭ داۋىسى الگىندەگىدەن ايقىنداۋ ەستىلەدى. قورقاتىن ەشتەمە جوق ەكەنىن ءتۇسىنىپ تاعى ءبىراز جەرگە، ءۇيدىڭ الدىنا كەلەم دە:

- اپا- ا- اۋ - دەيمىن.

- ءا- ءا- ءاۋ - دەيدى اپام. الدىمنان ەسىك اشىلادى. اپام قۇشاقتاي الىپ بەتىمنەن ءسۇيىپ، ماڭدايىمنان يسكەيدى.

- مەنىڭ ۇلىم باتىر جىگىت بولىپ كەتىپتى عوي، قورانىڭ مۇقە- ە- ەم انا شەتىندەگى ۇيگە جالعىز ءوزى بارىپ كەلدى. و و، جاساعان شۇكىرلىك مۇنىڭا - دەيدى.

وسى قىلىق- قيمىل كۇنىنە بىرنەشە رەت قايتالانادى.

ءيا مەن وندا شىنىندا باتىر ەدىم. «ەگەر اپامنىڭ داۋىسى ەستىلىپ تۇرسا بارشا الەمدى ايلانىپ كەلۋگە دە بولادى» - دەپ ويلايتىنمىن.

سولاي، اپامنىڭ داۋىسى ەستىلىپ تۇرسا.

بايىت قابان ۇلى

zheruiyq.kz



:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات