استانادا «قازاقستاننىڭ ۇزدىك تاۋارى» كورمە-بايقاۋى وتۋدە
كورمە- بايقاۋى ءۇش اتالىم بويىنشا وتكىزىلەدى: «وندىرىستىك ماقساتتاعى ۇزدىك تاۋارلار»، «حالىق تۇتىناتىن ۇزدىك تاۋارلار» جانە «ۇزدىك ازىق-تۇلىك تاۋارلارى». «قازاقستاننىڭ ۇزدىك تاۋارى» كورمە-بايقاۋى مەن «ۇلى دالا ەلى» وتاندىق تاۋار وندىرۋشىلەر فورۋمىنىڭ ءبىر الاڭدا وتكىزىلۋى ەلدەگى ءىرى تاپسىرىس بەرۋشىلەر (مەملەكەتتىك ورگاندار، ۇلتتىق حولدينگتەر، ۇلتتىق كومپانيالار) مەن وتاندىق تاۋار ءوندىرۋشى كاسىپورىنداردىڭ باسىن قوسۋعا مۇمكىندىك بەرىپ، ونىڭ اياسىندا وتكەن B2B سيپاتىنداعى كەزدەسۋلەردە اتالعان سالاداعى كوپتەگەن ماسەلەلەر تالقىلاندى.
سونداي-اق، تاپسىرىس بەرۋشىلەر قازاقستاندا قانداي تاۋارلار وندىرىلەتىنىن ءوز كوزىمەن كورۋ مۇمكىندىگىنە يە بولدى. ايتا كەتەر بولساق، ق ر ۇكىمەتى وتاندىق ءوندىرۋشىنى قولداۋ، ونىڭ ىشىندە نورماتيۆتىك-قۇقىقتىق بازانى جەتىلدىرۋ، ولاردى ۇزاق مەرزىمدى تاپسىرىس كەلىسىم- شارتتارىمەن قامتاماسىز ەتۋ جانە ءبىر-بىرىمەن بايلانىستى وندىرىستەر قۇرۋ بويىنشا تۇراقتى جۇمىس جۇرگىزەدى.
ەسكە سالساق، «قازاقستاننىڭ ۇزدىك تاۋارى» رەسپۋبليكالىق كورمە- بايقاۋى 2001-جىلدان باستاپ وتكىزىلەدى. بايقاۋ جۇلدەگەرلەرى ءار اتالىم بويىنشا I، Ⅱ جانە Ⅲ دارەجەلى «قازاقستاننىڭ ۇزدىك تاۋارى» رەسپۋبليكالىق كورمە-بايقاۋىنىڭ ديپلومدارىمەن جانە تانىم بەلگىسىمەن ماراپاتتالادى. سونداي-اق، ولار ءتورت جىل بويى بايقاۋ بەلگىسىن جارنامالىق ماقساتتاردا قولدانۋ قۇقىعىنا يە بولادى.