اقشانى ۋىستاپ شاشاتىن قازاقستاندىق باي جىگىتتەر قالاي كوڭىل كوتەرەدى؟ - فوتو

استانا. قازاقپارات - «اقشاڭ بولسا قالتاڭدا، تالتاڭداساڭ تالتاڭدا» دەگەن ماتەلدى ءىس جۇزىنە اسىرا، كەڭ دۇنيەنى الشاڭداپ باسىپ جۇرگەن جاستاردىڭ قاتارىندا قازاق جىگىتتەرى دە از ەمەس.

NUR. KZ پورتالى وسىدان ءبىراز بۇرىن Instagram-داعى باي بالالاردىڭ تىزىمىنە ەنگەن الماتىلىق ديماش ادىلەت تۋرالى جازعان بولاتىن.

بۇل جولى سول قالتالى قازاق جىگىتتەرى اقشانى قايدا جۇمسايدى، قالاي كوڭىل كوتەرەتىنى تۋراسىندا ءسوز قوزعالماق.

جەنيەۆا كوشەلەرىندە قازاقستاندىق ءنومىرلى كولىكتەرىمەن سايران سالىپ جۇرگەن ديماش ادىلەت كاسىپكەرلىككە قاجەت ماكرو-، ميكرو ەكونوميكانى، پسيحولوگيانى وقۋمەن قاتار، جارناماعا ءتۇسىپ تۇرادى.

ديماش ادىلەت بوس ۋاقىتى مەن ارتىق اقشاسىن الەم ەلدەرىن شارلاۋعا جۇمسايدى.

ديماش ادىلەتتىڭ اۆتوكولىككە دەگەن قىزىعۋشىلىعى ونىڭ قالتاسىنا قانشالىقتى اۋىر تيەتىنى بەلگىسىز. الايدا ول وزىنە ۇناعان قىمبات كولىكتى باعاسىنا قاراماي ساتىپ الۋعا دايىن.

سونداي-اق ول كوپ اقشاسىن تۇنگى كوڭىل كوتەرۋ مەكەمەلەرىندەگى وتىرىستارعا شاشادى.

بار بولعانى 200 مىڭعا جەتەر-جەتپەس حالقى بار جەنيەۆا قالاسى وعان تارشىلىق ەتەتىن كورىنەدى.

«جەنيەۆادان تەز جالىعىپ كەتەسىڭ. سوندىقتان كوڭىل كوتەرۋدىڭ باسقا جولدارىن ىزدەۋگە ءماجبۇرمىن. وسى دەمالىس كۇنى مەن كۋرشيەۆەلدى (فرانسيا) تاڭدادىم. تاۋى دا تاماشا، تۇنگى ءومىرى دە كەرەمەت ەكەن. جەنيەۆادان ەكى جارىم ساعاتتىق جەر بولسا دا، مۇندا ۋاقىتتى قىزىقتى وتكىزۋگە بولادى»، - دەيدى ول جەكە پاراقشاسىندا.

ارا-تۇرا ديماش ءوزىنىڭ پاراقشاسىنا قىزدارمەن قۇشاقتاسىپ تۇرعان سۋرەتتەرىن جاريالاپ تۇرادى. مىنا ءبىر سۋرەتتە ول ءتۇنىن جاقسى وتكىزگەنىن جازىپتى. «بۇل ءتۇن جامان وتكەن جوق»، - دەيدى ديماش.

ديماش ادىلەت تۇنگى ءومىرىن تەك ۇيقىمەن وتكىزگەندى دۇرىس كورمەيدى ەكەن. «ادامدار ءوز وتكەن ءومىرىن ەسىنە العاندا «مەن ۇيقىم قانعان تۇندە ەشقاشان ۇمىتپايمىن» دەپ ايتپايدى عوي. ال مەندە ەسىمە تۇسىرەر تۇندەر كوپ شىعار»، - دەيدى ول.

ءيا، راسىندا دا ديماش پەن ونىڭ جانىنداعى دوستارىنىڭ ۇمىتىلماس كۇندەرى مەن تۇندەرىنىڭ كوپ ەكەنىنە ءشۇبا جوق.

ونىڭ دوسى استانالىق اسقار ايۋپوۆ تا ديماش ادىلەتپەن بىرگە ەۆروپاداعى كوڭىلدى كەشتەرگە بارىپ تۇرادى.

ءبىر قىزىعى، اسقار ءوزىن استانانىڭ ەليتالىق جاستارىنىڭ ءبىرىمىن دەپ ەسەپتەمەيدى.

«استانادا جاستار قىدىراتىن جاقسى جەر دە جوق. سوسىن مەن كوشەگە سيرەك شىعامىن»، - دەپتى اسقار ايۋپوۆ ask.fm-دەگى اككاۋنتىندا.

اسقار ايۋپوۆتىڭ الەۋمەتتىك جەلى پاراقشاسىنان بايقانىمىزداي، ول ساياحاتتاعاندى ۇناتادى. استانالىق جىگىت ءوزى وقىعان شۆەيتساريادان باسقا، فرانسيا، يسپانيا، يتاليا، بىرىككەن اراب امىرلىكتەرى جانە موناكودا بولعان.

بۇل وسىدان ءبىراز جىل بۇرىن جەلىدە پايدا بولعان قازاقستاندىق باي-باعلانداردىڭ بالالارىنىڭ كوڭىل كوتەرۋ ساتىنەن كورىنىستەر.