ءسوز سۇيەكتەن وتەدى

نۇر- سۇلتان. قازاقپارات - «ءسوز سۇيەكتەن وتەدى» دەپ دانا حالقىمىز تەگىننەن تەگىن ايتپاعان. ءار ايتىلعان ءسوزدىڭ سالماعى بار. ءار ءسوزدىڭ جۇمسالۋ رەتى بار.

اۋزىم بار دەپ سويلەي بەرۋ ادەپتى، ارلى ادامنىڭ ءىسى ەمەس. ءبىز بۇكىل ويىمىزدى سوزبەن جەتكىزەمىز. ساناڭىزعا كەلگەن وي ءسوز بوپ تىلىڭىزگە تۇسپەس بۇرىن جۇرەك پەن اقىلدىڭ سۇزگىسىنەن ءوتۋى كەرەك. ءومىر بولعاننان سوڭ ءبىر- بىرىمىزبەن سوزگە كەلىپ، رەنجىسىپ جاتاتىن كەزدەرىمىز بولادى. ءتىپتى، اشۋعا بوي الدىرىپ، جاقىن دەگەن ادامىمىزعا اۋىر ءسوز ايتىپ، كوڭىلىنە قاياۋ، جۇرەگىنە ۇلكەن جۇك تۇسىرەمىز. ادامنىڭ اشۋ ۇستىندە كوزى كورمەي قالاتىنى راس. ءبىز سىزدەرگە اشۋ ۇستىندە ايتىلار ءسوزدىڭ اۋىرلىعى جونىندە ايتپاقپىز. بۇنداي شاقتا نە ىستەۋ كەرەك؟

سوزگە كەلىپ قالعان كەزدە ءوزىڭىزدى ۇستاي ءبىلىڭىز. سونداي ۋاقىتتاعى ءاربىر ءسوز جۇرەككە اۋىر تيەدى. مۇنداي جاعدايدا ەكى جاقتىڭ بىرەۋى ۇندەمەگەنى دۇرىس. ەگەر ەكەۋى بىردەي ءبىر- ءبىرىنىڭ جاراسىنىڭ بەتىن تىرناۋعا تالپىنسا ەكەۋى دە ۇتىلادى.

ارينە، بىرەۋ سىزگە بىلاي ىستە دەپ بىلگەنىن ايتقانمەن، اشۋلانعان كەزدە سىزگە ونىڭ ءسوزى مۇلدە اسەر ەتپەۋى مۇمكىن. ءسىز ونىڭ بار ەكەنىن دە ەلەمەيتىن جاعدايدا بولاسىز. سول ساتتە ءبارىن ايتىپ تاستادىڭىز. ءسىز جەڭىلدەگەنىڭىزبەن ونىڭ جۇرەگىنە جۇك ارتىلدى. نەگە؟ ويتكەنى ءسىزدىڭ ءسوزىڭىز وعان اۋىر ءتيدى. قاتتى ءسوز ايتۋ ارقىلى ءسىز تۋرالى جاقسى پىكىردەگى ادامنىڭ ويى وزگەرەدى. جاقىنىڭىزدى جوعالتاسىز.

جەبە سالعان جارا جازىلار، بالتامەن وتالعان ورمان قايتا وسەر، ءبىراق اشى ءتىلدىڭ جاراسى جازىلماس. قاتتى ايتۋ، اۋىر ءسوز سويلەۋ قادىرىڭىزدى كەتىرەدى، سىيلاستىق كەميدى.

اشۋ ۇستىندە ءتىلىن تىيا بىلگەن ادام - ۇلى. بۇل دارەجەگە جەتكەن ادام از. ويتكەنى، مۇندايدىڭ سىرىن كورگەن، باسىنان وتكىزگەن ادام عانا بىلەدى. ول ءسوزدىڭ سالماعىن ساراپتاي الاتىن، ءوزىنىڭ ەموتسيالىق سەزىمدەرىن يگەرە الاتىن جان.

«اۋىر ءىستىڭ سالماعى بىلەككە تۇسەر. اشى ءسوزدىڭ سالماعى جۇرەككە تۇسەر». ءسوزدىڭ سالماعى قورعاسىننان دا اۋىر. جۇرەككە تۇسكەن جۇكتىڭ جەڭىلدەۋى وڭاي دۇنيە ەمەس.

«اڭداماي سويلەگەن اۋىرماي ولەدى» . كەيدە ءبىز اڭداماي سويلەپ، جازا باسىپ، ىسىمىزگە وكىنىپ جاتامىز. ءار سوزىڭىزگە جاۋاپ بەرە الاتىن دارەجەدە بولىڭىز.

ۇنەمى مەنىكى عانا دۇرىس دەۋدەن اۋلاق بولىڭىز. سەبەبى، ماسەلەنىڭ ەكى جاعى بار. اركىم ءوزىنىڭ كوزى مەن اقىلىنىڭ جەتكەن جەرىن عانا كورەدى. ءىستىڭ ءمان- جايىن تولىق بىلمەي تۇرىپ ءسوز باستاماڭىز.

كەشىرە ءبىلىڭىز. كەشىرۋ - يبالى ادامنىڭ ءىسى. جاقىنىنىڭ كەشىرگەنىن سەزىنگەن ادام ءۇشىن ودان اسقان قۋانىش جوق. ونىڭ سىزگە دەگەن قۇرمەتى ارتادى.

ءومىر وتە قىسقا. ۋاقىت تىم از. جۇرەتىن جول كوپ. سوندىقتان، وكپەلەسپەي، رەنجىسپەي، ارازداسپاي ءبىر- ءبىرىمىزدى سىيلاپ عۇمىر كەشۋ - ءاربىرىمىزدىڭ مىندەتىمىز بولسا كەرەك. باقىتتى ءومىر سۇرۋگە نە كەدەرگى ەندەشە؟!

massaget.kz