اسانقايعى جەرۇيىق ىزدەگەندە

None
None
نۇر-سۇلتان. قازاقپارات - اسانقايعى جەلمايا ءمىنىپ جەلدىرتىپ، جەرۇيىق ىزدەپ جۇرگەندە بىلاي دەپتى.. .

ۇزىن اققان ەرتىستى كورگەندە: «مىنا شىركىننىڭ بالاسى تويدىم دەپ قاراپ وتىرماس، قارىنىم اشتى دەپ جىلاپ وتىرماس. سيىردىڭ ءمۇيىزى، دوڭىزدىڭ قۇلاعى شىعىپ تۇرعان جەر»، - ەكەن دەپتى.

تۇندىكتى وزەنىن كورگەندە: «ون ەكى قازىلىق وي تۇندىك، ماڭىراپ جاتقان قوي تۇندىك. قويدىڭ قۇلاعى تۇتام شىعىپ تۇرعان جەر ەكەن»، - دەپ تاستاپ كەتۋگە قيماي، ارتىنا ءۇش قاراعان ەكەن. سونان «ءۇش قارا» اتانعان ەكەن تاۋدىڭ اتى.

قىزىلتاۋ دەگەن جەرگە كەلگەندە: «تاۋ- تاسى كەش بولعاندا قوي بولىپ، ىڭىرانىپ جاتادى ەكەن. توقتى قىسىر قالمايتىن جەر ەكەن»، - دەپتى.

باياناۋىل تاۋىن كورگەندە: «ات ەرىن المايتىن جەر ەكەن. باۋىرىندا تۇزى بار ەكەن، تۇزى اۋىر ەكەن، ءبىر ءتۇن تۇنەپ كەتەمىن دەگەن ادام، ءبىر جۇما توقتاپ قالادى ەكەن. تۇزى جىبەرمەيدى ەكەن»، - دەپتى.

اشى بويىنا كەلگەندە، ارتىنا قاراپ: «ا، باياناۋىل! سەنىڭ قونىس بولىپ تۇرعانىڭ مىناۋ، اشىنىڭ ارقاسى ەكەن. مال جازعىتۇرىم ءبىر جۇما اشىلايدى ەكەن، كۇزگە تامان ءبىر جۇما اشىلايدى ەكەن. سونىسى ءبىر جىلعا تاتيدى ەكەن»، - دەپتى.

شىدەرتى دەگەن وزەندى كورگەندە: «مىنا شىركىننىڭ توپىراعى اسىل ەكەن. التى اي ءمىنىپ ارىقتاعان ات، ءبىر ايدا مايعا بىتەتىن جەر ەكەن. بوس جىلقى شىلدەرلەپ قويعانداي توقتايتىن، جىلقىنىڭ قونىسى ەكەن» ، - دەپتى.

ولەڭتى وزەنىن كورگەندە، توقتاپ ەشنارسە ايتپاي، ولەڭدەتە بەرگەن ەكەن. «نەگە ۇندەمەيسىز؟» - دەگەندە، از تۇرىپ: «ولەڭتىنىڭ سۋى - ماي، شىدەرتىنىڭ ءشوبى - ماي»، - دەپ جۇرە بەرىپتى.

سىلەنتىدەن ءوتىپ جالاڭاشتىڭ تۇزىنا بارعاندا: «اتتىڭ توبەلىندەي جالاڭاش، سەنى الدىما وڭگەرەيىن بە، ارتىما بوكتەرەيىن بە، قاي جاراما تارتايىن؟ اينالاڭ از، ونان باسقا ءمىنىڭ جوق، تابىلمايتىن جەر ەكەنسىڭ»، - دەپتى.

ەسىل وزەنىن كورگەندە: «جارى مەن سۋى تەڭ، جارلىسى مەن بايى تەڭ بولاتىن جەر ەكەن»، - دەپتى.

نۇرانىڭ بويىن كورگەندە: «التى كۇندە ات سەمىرتىپ مىنەتىن جەر ەكەن»، - دەپتى.

تورعاي وزەنىن كورگەندە: «اعار سۋى بال تاتىعان، اق شاباعى ماي تاتىعان جەر ەكەن»، - دەپتى.

تەرىساققان دەگەن وزەندى كورگەندە: «سارى ارقانىڭ تۇزدىعى ەكەن»، - دەپتى.

جەتى قوڭىردى كورگەندە: «سارى ارقانىڭ ماۋسىمى ەكەن»، - دەپتى.

ۇزىن اققان سىر بويىن كورگەندە: «باسى بايتاق، اياعى تايپاق قونىس ەكەن، قارا تاۋدى جايلاسام، سىردىڭ بويىن قىستاسام، قونىس بولۋعا سوندا عانا دۇرىس ەكەن»، - دەپتى.

سۋلى كەلەس، نۇرلى كەلەس وزەندەرىن كورگەندە: «موڭىرەۋىن، سيىر بولىپ موڭىرەۋىن. سيىر تۇقىمى ۇزىلمەيتىن جەر ەكەن»، - دەپتى.

جيدەلىبايسىن جەرىنە قىزىعىپ: «اي، جيدەلىبايسىن، ارتىما بوكتەرىپ كەتەر ەدىم، اتتەڭ اتىم كوتەرە المايدى- اۋ!» - دەپتى.

ياسسى قالاسىن (قازىرگى تۇركىستان) ولاردىڭ قوجا- مولدالارىن كورگەندە: «ءاي، قارىس جەرى ءبىر ارىق، جەر سورلىسى مۇندا ەكەن، ايەلى سەمىز، ەرى ارىق، جۇرت سورلىسى مۇندا ەكەن»، - دەپتى.

شىڭعىرلاۋدى كورگەندە: «اي شىڭعىرلاۋ، جىلقى ءوزى وسكەن جوق، شىڭعىرلاۋ سەن ءوسىردىڭ!» - دەپ ءۇش اينالىپ، شىڭعىرلاۋدىڭ سۋىنا قولىن مالىپ وتىرىپ: «شىڭعىرلاۋ وكپەلەر، اتتىڭ ەرىن ال، قونايىق، ات سۋارىپ، اۋناپ- قۋناپ كەتەيىك»، - دەگەن ەكەن.

«ءاي جانارىستان، جىرىمداي سۋعا بولا شەتتە قالدىڭاۋ ەسىل ، ەرىم- اي»، - دەپ ءبىر توبەگە كەلىپ جىلاپ تۇرعان ەكەن.

massaget.kz


سوڭعى جاڭالىقتار