رۇستەم ابدىراشەۆ: «قازاق ەلى» فيلمىنە بىردە-ءبىر ۇلتتىق كومپانيا كومەكتەسپەدى، ەشبىر تەلەارنا ۇسىنىس جاساعان جوق - كەسكىن
بۇل تۋرالى اتالعان فيلم رەجيسسەرى رۇستەم ابدىراشەۆ بۇگىن الماتىدا تۇساۋى كەسىلگەن «الماس قىلىش» (العاشقى اتاۋى - «قازاق ەلى» ) فيلمىنىڭ العاشقى كورسەتىلىمىندە.
بۇگىن الماتىدا قازاق حاندىعىنىڭ 550 جىلدىعىنا، ەل تاۋەلسىزدىگىنىڭ 25 جىلدىعىنا تارتۋ ەتىلگەلى وتىرعان «الماس قىلىش» فيلمىنىڭ تۇساۋى كەسىلدى. 10 سەريادان ىقشامدالىپ، 2 ساعات 10 مينتۋتتىق فيلم رەتىندە جاسالعان كينوكارتينا جۋرناليستەر مەن الماتىنىڭ زيالى قاۋىمىنا تانىستىرىلدى.
«كومپيۋتەرلىك گرافيكاسى، مۋزىكاسى رەتتەلىپ، 16 -جەلتوقساندا فيلمنىڭ سوڭعى نۇسقاسى ۇسىنىلادى. قاتتى سىناماڭىزدار، ءالى جەتىسپەي جاتقان تۇستارى بار. فيلمگە بارلىعى 280 ميلليون تەڭگە جۇمسالدى. «بازيس ا» كومپانياسى مەن «فريدوم فينانس» كومپانياسىنا ۇلكەن العىسىمىزدى ايتامىز. 50 ميلليون تەڭگەدەي قارجى جەتىسپەۋشىلىگى بار ءالى دە. بيىلعى جىلى فيلم توقتاپ تۇرعان كەزدە الماتى قالاسى اكىمىنىڭ قولداۋىمەن «بازيس ا» كومپانياسى 180 ميلليون تەڭگە قارجىلاي كومەك كورسەتكەنىن ايتا كەتكىم كەلىپ وتىر.
سونىڭ ارقاسىندا جەتىستىككە جەتىپ وتىرمىز. ەندىگى جەتىسپەي وتىرعان قارجىنى مادەنيەت جانە سپورت ءمينيسترلى بولەدى دەگەن ءۇمىتىمىز بار. بۇگىنگى نۇسقا پروكاتقا ارنالعان. وسى كينو ۆەرسيانى تولىقتىرىپ 16 -جەلتوقساندا ۇسىنامىز، سوڭىنان 10 سەريا بىردەن كورسەتىلەدى. ءبىراق، بىردە- ءبىر تەلەارنامەن ازىرگە كەلىسىم جاساسقان جوقپىز. بىرەۋى كەلىپ، اۆتورلىعىنا ءبىز يە بولايىق دەگەن جوق. ەشبىرىنەن سۇرانىس تۇسكەن جوق. ۇلتتىق كومپانيالاردىڭ بىردە-بىرەۋىنەن كومەك بولمادى. بۇل اشتى شىندىق. قاراپايىم حالىق 1 ميلليون تەڭگە جيناپ بەردى. ارينە، بۇل ءبىر اكتەردىڭ جالاقىسى عانا. دەگەنمەن، ەلدىڭ ىقىلاسىن ايتىپ وتپەي بولمايدى. 1000 تەڭگە بولسا دا اۋدارعانىن كوردىك. فيلم الماتى وبلىسىنىڭ ماڭىندا ءتۇسىرىلدى»، - دەدى رۇستەم ابدىراشيەۆ.
رەجيسسەردىڭ ايتۋىنشا، فيلمدەگى اكتەرلەردىڭ كيىم، ساۋىت-سايمانداردى قىتايدا جاسالعان.
«كيىمدەردى قازاقستاندا تىكتىك، ساۋىت- سايمان، قارۋ- جاراق، ات ابزەلدەرىن قىتايدا كينوعا ارناپ قۇرال- سايمان ازىرلەيتىن كومپانيادا جاساتتىق. بولاشاقتا ونداي كومپانيانى وزىمىزدە اشقىمىز كەلەدى»، - دەدى ول.
فيلم سەناريىن جازعان جازۋشى سماعۇل ەلۋبايەۆ ەل كۇتكەن فيلمنىڭ قاعازداعى نۇسقاسىن تۇسىرۋگە 4-5 اي ۋاقىت كەتكەنىن ايتتى.
«ءىلياس ەسەنبەرليننىڭ «الماس قىلىش» تاريحي رومانىن ەكراندايىق دەگەن ەلباسىنىڭ ۇسىنىسىنان كەيىن تيمۋر جاقسىلىقوۆ دەگەن ورىسشا جازاتىن تالانتتى سەناريست ەكەۋىمىز 4-5 ايداي وتىرىپ دايىندادىق. سەناريگە ارينە، وزگەرىستەر ەنگىزىلدى. ءبىز جازعان نۇسقانىڭ 80 پايىزى ەكراندالدى. سەناري دايىن بولعاننان كەيىن رەجيسسەر تاڭداۋ ماسەلەسى ۇلكەن داۋ بولدى. سودان رۇستەمنىڭ كانديداتۋراسى ءوتىپ، مىناداي ءىس جاسالدى»، - دەدى سماعۇل ەلۋباي.
بۇگىن الماتىدا وتكەن فيلمنىڭ تانىستىرىلۋىنا ارنايى كەلگەن قازاق فيلمىنىڭ مەترى اسانالى ءاشىموۆ ءتۇسىرۋ توبى ۇلكەن جۇمىس اتقارعانىن اتاپ ايتتى.
«رۇستەم (ابدىراشەۆ) باستاعان، سماعۇل (ەلۋبايەۆ) قوستاعان ءتۇسىرۋ توبى ۇلكەن جۇمىس اتقارعان ەكەن. كورىنىپ تۇر، ۇلكەن جۇمىس جاسالعان. قازاق ەلىنە قۇتتى بولسىن»، - دەدى اسانالى ءاشىموۆ.
فيلمدە باستى رولدەردىڭ ءبىرىن سومداعان دوسحان جولجاقسىنوۆ بۇل فيلم ۇرپاعىمىزدىڭ رۋحاني ومىرىنە قىزمەت ەتسە ەكەن دەپ تىلەيتىنىن جەتكىزدى.
«بۇل فيلمدى تۇسىرگەندە قانداي قيىنشىلىق بولعانىن كورەرمەن، ارينە، بىلە بەرمەيدى. بۇل ۇلكەن رۋحاني كوشتىڭ باسى بولعاي»، - دەدى دوسحان جولجاقسىنوۆ.
اۆتور: الماس مۇقاش ۇلى