جيىرما جاسقا جەتپەي جەڭىسكە جەتكەندەر

استانا. قازاقپارات - الەم قىزىققا تولى. ءتىپتى كەيبىر نارسەلەرگە تاڭداي قاقپاسقا بولمايدى. كەمەڭگەر بوپ جاراتىلعان جاسوسپىرىمدەردى كورگەندە، ولار جايىندا ەستىگەندە كىمنىڭ بولسىن قىزىعۋشىلىق تانىتارى انىق.

 بالا كۇنىنەن عىلىم مەن بىلىمگە قۇشتار بولىپ، سول سالادا جاڭالىق اشىپ ۇلگەرگەن، بولمىستارى بولەك، جاستارى 20 عا جەتپەي جەتىستىككە جەتكەندەر جايىندا اڭگىمە وربىتەمىز.

 ميكاەلا فۋدوليگ

 ميكاەلا فۋدوليگ - 11 جاسىندا فيليپپين ۋنيۆەرسيتەتىنە وقۋعا ءتۇسىپ، باكالاۆر دارەجەسىن فيزيكا ماماندىعى بويىنشا 16 جاسىندا ءبىتىرىپ شىقتى. بۇل زەرەك قىز قازىر 25 جاستا، وسى ۋنيۆەرسيتەتتىڭ پروفەسسورى بولىپ جۇمىس جاسايدى.

  اكريت ياسۆال

  اكريت پران ياسۆال -  ءۇندىستاندىق بۇل جاس جەتكىنشەك الەمدى اۋزىنا قاراتقان تالانتتى بالا. ەڭ العاشقى حيرۋرگيالىق وپەراتسياسىن جاساعان كەزدە جاسى نەبارى جەتىدە بولعان. 12 جاسىندا ۋنيۆەرسيتەت تابالدىرىعىن اتتاپ، 17 جاسىندا ماگيسترلىك ءبىلىمىن قولدانبالى حيميا ماماندىعى بويىنشا جالعاستىرعان. ول بۇگىندە 23 جاستا، قاتەرلى ىسىككە قارسى ءدارى ويلاپ تابۋ ۇستىندە.

  تەيلور رامون ۋيلسون

  ول الەمدەگى ەڭ جاس تەرمويادرولىق رەاكتسيالاردىڭ قۇرىلعىسىن ويلاپ تاپقان عالىم. 10 جاسىندا يادرولىق قارۋ قۇراستىرىپ، 14 جاسىندا وسى جەتىستىككە قول جەتكىزگەن. رامون ۋيلسون 2011 -جىلدىڭ مامىر ايىندا حالىقارالىق تەحنيكا عىلىمدارىنىڭ شاكىرتاقىسىن جەڭىپ الدى.

  كامەرون تومپسون

 كامەرون تومپسون - سولتۇستىك ۋەلس ەلىنىڭ ەڭ جاس ماتەماتيگى. ول 4 جاسىندا ۇستازىنىڭ قاتەلىگىن تاۋىپ، تۇزەپ بەرگەن. 11 جاسىندا ۇلىبريتانيادا اشىلعان ماتەماتيكا عىلىمدارى سالاسىن وقىتاتىن ۋنيۆەرسيتەتتىڭ ستۋدەنتى بولىپ قابىلداندى. تۇسە سالىسىمەن عالىمداردىڭ بەرگەن ەسەبىن شەشىپ، BBC ارناسىنا قوناققا شاقىرتۋ الدى. قازىر نەبارى 19 جاستا.

  دجەيكوب بارنەتت

 دجەيكوب بارنەتت - ا ق ش- تىڭ ماتەماتيگى. ەكى جاسقا تولعان شاعىندا دارىگەرلەر ونىڭ بويىنان اۋتيزم اۋرۋىن تاۋىپ، وعان سويلەي المايدى جانە جازا دا المايدى دەگەن دياگنوز قويعان. دەگەنمەن 3 جاسقا تولعان شاعىندا بۇل دياگنوز جوققا شىعارىلدى. دجەيكوب الىپپەنى سوڭىنان باسىنا، باسىنان سوڭىنا دەيىن ەركىن وقي الاتىن بولعان. ول 10 جاسىندا يندياناپوليس ۋنيۆەرسيتەتىنە ءتۇستى. قازىر 17 جاستا، كۆانتتىق فيزيكا سالاسى بويىنشا جۇمىس ىستەپ جاتىر.

  مارك تيان بوەديحاردجو

 

گونكونگتا دۇنيەگە كەلىپ، گونكونگ ۋنيۆەرسيتەتىنىڭ ەڭ جاس ستۋدەنتى اتانعان بۇل جاسوسپىرىم ول كەزدە 9 جاستا بولعان. ونىڭ بۇگىندە ماتەماتيكا عىلىمدارى جانە ماتەماتيكاداعى فيلوسوفيا ماماندىقتارى بويىنشا قوس بىردەي ديپلومى بار. ەرەكشە جاراتىلۋىنىڭ ارقاسىندا مارك تيان ا ق ش- تىڭ ماتەماتيكاداعى فيلوسوفيا عىلىمدارىنىڭ دوكتورى دارەجەسىنەدگى شاكىرتاقى الىپ وتىر. قازىر 18 جاستا.

 

قاي جاستا بولماسىن، ادامنىڭ اقىل- ەسى ءوزىنىڭ تالابى مەن جاراتىلىسىنا قاراي دامىپ وتىرادى. ءسىزدىڭ دە ەرەكشە بولۋعا مۇمكىندىگىڭىز بار. ءاربىر ادام جەكە تۇلعا رەتىندە وزىنە سەنۋى كەرەك.

massaget.kz