قىتايدىڭ قازاقستانعا دەگەن قارىم- قاتىناسى ايرىقشا
يسپانيانىڭ EFE تاۋەلسىز اقپارات اگەنتتىگى قىتاي بيۋروسىنىڭ جەتەكشىسى رافاەل كاناس قازاقپارات تىلشىسىنە بەرگەن سۇحباتىندا وسىنداي پىكىر ءبىلدىردى.
«قازاقستان پرەزيدەنتى نۇرسۇلتان نازاربايەۆتىڭ G20 سامميتىنە قاتىسۋى قىتايدىڭ جاھاندىق كۇنتارتىپكە تارتىلعان ەلدەردىڭ سانىن كەڭەيتۋگە ۇمتىلىسىن دالەلدەيدى. قازاقستانمەن قاتار سامميتكە مىسىر، تايلاند، سەنەگال، چاد، لاوس، سونىمەن قاتار سينگاپۋر مەن يسپانيا شاقىرىلعان»، - دەدى ول.
يسپان ءتىلشىسى 2 - قىركۇيەك كۇنى قىتايدىڭ ورتالىق تەلەارناسىندا ق ح ر ءتوراعاسى شي جينپيڭ مەن قازاقستان كوشباسشىسىنىڭ كەزدەسۋى كورسەتىلگەنىن اتاپ ءوتتى.
«ولار بىرنەشە مارتە دوستىق پەيىلدە قۇشاق ايقاستىردى. مەنىڭ ەسىمدە قالعانى شي جينپيڭ ەشكىممەن ءدال بۇلاي امانداسقان ەمەس. ال بۇل ەكى مەملەكەت كوشباسشىلارى اراسىنداعى جەكە جىلى قارىم- قاتىناستىڭ عانا ەمەس، سونىمەن بىرگە قىتايدىڭ قازاقستانمەن ىنتىماقتاستىقتى دامىتۋعا ايرىقشا ءمان بەرگەندىگىنىڭ كورىنىسى»، - دەدى ر. كاناس.
ول قازاقستاننىڭ ورتالىق ازياداعى ءىرى ءارى ىقپالدى مەملەكەت ەكەندىگىن، سونداي- اق قىتاي ۇسىنىپ وتىرعان «جىبەك جولى ەكونوميكالىق بەلدەۋى» ستراتەگياسى جولىنداعى ءبىرىنشى مەملەكەت سانالاتىندىعىن باسا ايتتى.
«قازاقستان تەرريتورياسى ارقىلى ەۋروپاعا، سونىمەن بىرگە وڭتۇستىك ازياعا ساۋدا جولى وتەدى. بۇل تەك قازاقستان ءۇشىن عانا ەمەس، وڭىردەگى باسقا دا ەلدەرگە، ەڭ ءبىرىنشى كەزەكتە قىتايعا ماڭىزدى»، - دەدى ول.
EFE شەف- ءتىلشىسى قازاقستان پرەزيدەنتىنىڭ G20-عا قاتىسۋشى مەملەكەتتەردى ەكسپو-2017-گە بەلسەندى قاتىسۋعا شاقىرعانىن، ونىڭ اياسىندا جەكە شارا وتكىزۋدى ۇسىنعانىن ەسكە سالدى.
«مەنىڭ بىلۋىمشە، كورمە تاقىرىبى «بولاشاق ەنەرگياسى» بولماق. بۇل رەتتە يسپانيا بالاما ەنەرگەتيكانى دامىتۋعا، ءبىرىنشى كەزەكتە جەل ەنەرگياسىن پايدالانۋعا باسا نازار اۋدارىپ وتىر. بۇل سالادا ءبىزدىڭ ءبىراز جەتىستىگىمىز بار. سوندىقتان يسپانيانىڭ استانادا وتەتىن ەكسپو-2017 كورمەسىنە بەلسەندى قاتىسارىنا سەنىمدىمىن»، - دەدى ر. كاناس.
ەسكە سالساق، 1 - قىركۇيەكتە نۇرسۇلتان نازاربايەۆ ق ح ر ءتوراعاسى شي جينپيڭنىڭ شاقىرۋىمەن G20 سامميتىنە قاتىسۋ ءۇشىن قىتايعا باردى جانە 4-5 - قىركۇيەك كۇندەرى ۇلكەن جيىرمالىقتىڭ سامميتىنە قاتىستى. ءبىرىنشى سەسسيادا مەملەكەت باسشىسى جاھاندىق ەكونوميكا ماسەلەلەرىن شەشۋ جولدارى تۋرالى ءوز بولجامدارىن ايتتى.
اۆتور: مارلان جيەمباي