قازاقستان الەم مەملەكەتتەرىنە يادرولىق قارۋدان ازات الەم قۇرۋ تۋرالى ءوزىنىڭ ۇلگىسىن پايدانالۋدى ۇسىنادى - ق ر پرەزيدەنتى
بۇگىن استانادا ءوتىپ جاتقان «يادرولىق قارۋسىز الەم قۇرۋ» اتتى حالىقارالىق كونفەرەنتسيا بارىسىندا ءسوز سويلەگەن ق ر پرەزيدەنتى نۇرسۇلتان نازاربايەۆ وسىلاي مالىمدەدى.
«شيرەك عاسىر ىشىندە قازاقستان يادرولىق قارۋدان ازات الەمگە قول جەتكىزۋدىڭ ءتيىمدى مودەلىن قۇرا الدى. بۇل ۇلگىنى ءبىز الەمنىڭ بارلىق مەمەلكەتتەرىنە پايدالانۋدى ۇسىنامىز»، - دەي كەلە ەلباسى قازاقستاندىق ۇستانىمنىڭ ءبىرقاتار بازالىق نەگىزدەرىن اتاپ ءوتتى.
بىرىنشىدەن، كەڭ اۋقىمدى جالپىۇلتتىق باستامانىڭ نەگىزىندە سەمەي يادرولىق سىناق پوليگونى جابىلدى، يادرولىق قارۋدان باس تارتۋ جانە ونى الداعى بولاشاقتا ءوز اۋماعىندا ورنالاستىرۋعا تىيىم سالۋ تۋرالى ەرىكتى تۇردە شەشىمدەر قابىلداندى. «ءبىز تاۋەلسىزدىكتى يادرولىق پوليگونسىز يەلەندىك. تاۋەلسىز ەل قۇرىپ، ونى نىعايتتىق. يادرولىق قارۋسىز ونىڭ حالىقارالىق جوعارى دەڭگەيىنە قول جەتكىزدىك. يادرولىق قارۋدان ازات ورتالىق ازيا ايماعىن قۇرۋ تۋرالى شارتقا قول قويدىق. ونىڭ بارلىق قاتىسۋشىلارى قازاقستان، قىرعىزستان، وزبەكستان جانە تاجىكستان 2015-جىلى يادرولىق كلۋبتىڭ بەس الىپ مەملەكەتىنەن ارنايى قاۋىپسىزدىك كەپىلدىگىن الدى. وسىلايشا، بۋداپەشت مەموراندۋمىن ەسەپكە الساق، قازاقستاننىڭ قاۋىپسىزدىگىنىڭ ەكىجاقتى كەپىلدىگى بار»، - دەدى ن. نازاربايەۆ.
بۇدان بولەك، ەلباسى قازاقستاننىڭ يادرولىق قارۋسىز الەمگە قاتىستى بارلىق ىلگەرى شارتتاردىڭ قاتىسۋشىسى ەكەنىن اتاپ ءوتتى. «يادرولىق قارۋدى جويۋدىڭ قازاقستاندىق ۇلگىسى رەسەي، ا ق ش سەكىلدى ەلدەرمەن، باسقا دا ءبىرقاتار ەلدەرمەن، حالىقارالىق ۇيىمدارمەن اۋقىمدى حالىقارالىق ىنتىماقتاستىعىنا سۇيەنەدى»، - دەدى مەملەكەت باسشىسى.
اۆتور: قانات مامەتقازى ۇلى