قازاقستان شيرەك عاسىردان بەرى جەر بەتىن بەيبىتشىلىككە بولەۋ ءۇشىن بار كۇش-جىگەرىن سالىپ كەلەدى - ەلباسى
بۇل تۋرالى بۇگىن «يادرولىق قارۋسىز الەم قۇرۋ» اتتى حالىقارالىق كونفەرەنتسيادا ق ر پرەزيدەنتى نۇرسۇلتان نازاربايەۆ ايتتى.
«29- تامىز - بارشا ادامزاتتىڭ تاريحىنداعى ايتۋلى كۇن. 25 جىل بۇرىن، ءدال بۇگىن مەنىڭ جارلىعىمەن جەر بەتىندەگى ەڭ ۇلكەن يادرولىق سىناق الاڭدارىنىڭ ءبىرى سەمەي پوليگونى جابىلدى. قىرىق جىل بويى يادرولىق جارىلىس جاساعان پوليگوننىڭ ءۇنى ءبىرجولا ءوشتى. وسىلايشا، حالقىمىز تاۋەلسىزدىك تاڭى اتار ساتتە بەيبىتشىلىك جولىن تاڭدايتىندىعىن بارشا الەمگە پاش ەتتى. بۇل قازاقستاننىڭ جاھاندىق قاۋىپسىزدىك كوشىن باستاعان تەڭدەسسىز قادامدارىنىڭ باستاۋى ەدى. بيىل ءبىزدىڭ ەلىمىز تاۋەلسىزدىكتىڭ 25 جىلدىعىنىڭ مەرەيلى بەلەسىن اتاپ وتەدى. قازاقستان شيرەك عاسىردان بەرى تۇتاس جەر بەتىن بەيبىتشىلىككە بولەۋ ءۇشىن بار كۇش-جىگەرىن سالىپ كەلەدى»، - دەدى ەلباسى.
مەملەكەت باسشىسى قازاقستان قۋاتى جونىنەن الەمدە ءتورتىنشى ورىنعا يە يادرولىق قارۋدان ءوز ەركىمەن باس تارتقانىن باسا اتاپ ءوتتى.
«الەمدىك قاۋىپسىزدىك جولىندا كوپتەگەن تىڭ باستامالار كوتەردىك. قازاقستاننىڭ بۇل باعىتتاعى سان جىلدىق ەرىك-جىگەرى مەن ۇسىنعان «الەم ХХІ عاسىر» مانيفەسىندە كورىنىس تاپتى. ءبىزدىڭ بەيبىت باستامالارىمىزدىڭ ءبارى دە الەم قاۋىمداستىعىنىڭ جاپپاي قولداۋىنا يە بولدى. سونىڭ ناتيجەسىندە قازاقستان جاھاندىق يادرولىق قارۋسىز الەم قوزعالىسىنىڭ كوشباسشىسىنا اينالدى. ءبىزدىڭ ۇسىنىسىمىزبەن بۇگىن جەر ءجۇزى 29 تامىزدى حالىقارلىق يادرولىق سىناققا قارسى ءىس-قيمىل كۇنى رەتىندە قابىلدادى. بۇل قازاقستاننىڭ بەيبىت باستامالارى جەر بەتىندەگى بارشا ەلدەردىڭ مۇددەلەرىنە ساي كەلەتىنىن جانە ولاردىڭ قولدايتىندىعىن كورسەتتى. بۇگىنگى ءوتىپ وتىرعان فورۋمدا ءبارىمىزدى ورتاق ماقساتقا جۇمىلدىرىپ، جاھاندىق قاۋىپسىزدىكتى نىعايتا تۇسۋگە سۇبەلى ۇلەس قوسارىنا سەنەمىن»، - دەدى ن. نازاربايەۆ.
اۆتور: مارلان جيەمباي